Genesisi 43:1-34
43 Njara iyi yainga yakura maningi mu nyikemo.
2 Ngo kudaro, pavakapeja kuha zvokuha zvavakatengeraya ku Ejipita, baba wavo vakavavhunja kuti: “Hwiriranyi kotitengera zvokuha padoko.”
3 Asi Judha wakavavhunja kuti: “Mwanarumewo wakatikohomeja kuti: ‘Amudikani kuviyazve kuno mucina hama yenyu.’
4 Kudari mukatituma no hama yedu, tinozoenda tomutengera zvokuha.
5 Kudari mukatama kutiendesa no munukuna wedu, itusu atizoendi. Ngokuti mwanarumewo wakativhunja kuti: ‘Amudikani kuviyazve kuno mucina hama yenyu.’”
6 Iziraeri wakavhunjisa kuti: “Ngenyi muri kuda kundiviisira dambujiko iri ngo kuvhunja mwanarumewo kuti muno hama imwenizve?”
7 Ivona vakadavira kuti: “Mwanarumewo wativhunjisa kamare ngo pamusoro pedu no ukama hwedu, woti, ‘baba wenyu vaciri penye? Muno hama imwenizve?’ Itusu takamuvhunja zvese. Apana waizviziva kuti waizonanga kuti ‘viyanyi kuno no hama yenyuyo.’”
8 Judha wakavangirija Iziraeri baba wake, woti: “Tiendesenyi no mujaha uwu, kuti tienderere mberi no hwendo hwedu kuti tipone, titame kufa, itusu, imwimwi no vana vedu.
9 Inini ndinozoita mungwariri wake. Ciri cese cinozoitika, mushaishi ndini. Kudari ndikatama kuviya naye, ndomupekeja, inini ndinonga ndamushaishira mu upenyu hwangu hwese.
10 Nokwainga kuti atizivi kunonoka kudari, deno taviya kaviri.”
11 Ngo kudaro, Iziraeri baba wavo, wakavavhunja kuti: “Kudari zvicidikana kuitwa kudaro, itanyi kudari: Toranyi mucero jaushoni jo nyika ino, mudire mu saku jenyu, mujithware kwenda kopekeja mwanarumewo. Toranyi zviro izvi: bharsamo padoko, zviuci padoko, ngeji* jinonuhira, mapande anobudisa ngeji, mucero yo muti unodanijwa kuti mupistashe no amendowa.
12 Toranyi mutengo wo mare wakapetwa kaviri. Hwirijanyizve mare yakadihwaya mu saku jenyu, kangaije wakakhanganisa.
13 Toranyi munukuna wenyu mupinde. Hwiriranyi ku mwanarumewo.
14 Mwari wo Masimba Ese ngaaite kuti mwanarumewo amuitire unyasha, no kumutendera kuti muviye no hama yenyu imweni na Bhenjamini. Zvikadikana kuti ndigare ndicikana vana, ndinozogara hangu ndicina vana.”
15 Ngo kudaro, vana va Jakobe vakatora zvipo zviya, votora mutengo wo mare yakapetwa kaviri na Bhenjamini, ivona vakamuka vobata gwanja voenda Ejipita, voendazve pa mberi pa Josefa.
16 Josefa paakavavona vana Bhenjamini, iyena wakavhunja mwanarume waivonerera muzi wake kuti: “Torai vandhu ava uende navo kanyi, urayai zvinyama unasirire zvokuha, ngokuti inini ndiri kuda kusvusvura navo masikati ano.”
17 Mwanarume wiya wakaita zvaakavhunjwaya ndi Josefa ngo kukasika. Iyena wakavatora woenda navo kanyi ka Josefa.
18 Ivona vakathya maningi povakatohwa voenda kanyi ka Josefa. Votanga kunanga kuti: “Vari kutiviisa kuno ngo ndava yo mare yotakahwiriraya nayo mu saku jedu pa vhaza jatakaviyaya kuno. Wari vanozotitambuja, votiita varanda no kutitorera mbongoyo jedu.”
19 Ngo kudaro, vakakwederera mwanarume waivonerera nyumba ya Josefa vobhuya naye pa musuvo wo nyumbeyo.
20 Ivona vakati: “Munotiregereravo mambo wangu. Itusu takaviya kuno pa vhaza yokutanga kuti titenge zvokuha.
21 Asi potakaguma pa ndau yotaizovatira cousiku, takasujunura saku jedu, tovona mare yo umwe na umwe, iri mu saku yake. Mare yedu yese kamare. Ngo kudaro, taida kuti tiiviise tega.
22 Itusu taviya kotengazve zvokuha. Atizvizivi kuti ndiyani wakadira mare yedu mu saku jedu.”
23 Iyena wakavadavira kuti: “Zvakanaka. Mucathya. Mwari wenyu na Mwari wa baba wenyu, wakadira upfumi mu saku jenyu. Mare yenyu ndakaiashira.” Pasure pazvo wakavabudisira Simiyoni.
24 Perapo mwanarume wiya wakavanghwinisa mu nyumba ya Josefa, wovapa kumwa kuti vasambe soka javo no kupekeja zvokuha mbongoyo javo.
25 Ivona vakanasirira zvipo kuti vapekeje Josefa paaizoviya comasikati, ngokuti vakazwa kuti waizosvusvura na ivona.
26 Josefa paakanghwina mumba, ivona vakamuviisira zvipo zvavo mumbemo, vokotama pamberi pake no vakasikimara* pasi.
27 Pasure pazvo, Josefa wakavacungamija eciti: “Masoko enyu? Baba wenyu vamakanangaya vari ushoni? Vaciri penye havo?”
28 Ivona vakadavira kuti: “Mambo wangu, baba wedu vari ushoni. Vaciri penye.” Perapo, vakagwadama, vokotama.
29 Paakasota wovona Bhenjamini munukuna wake, mwana wa mai wake, wakati: “Nga uwu munukuna wenyu womakandivhunjaya?” Wakanangazve kuti: “Mwari ngaakuitire unyasha mwanangu.”
30 Josefa wakabuda kunja ngo kukasika, ngo kuti wakakonehwa kujibata ngo ndava yo hama yake. Iyena wakaenda kopsaka ndau yokoocemera.* Ngo kudaro, iyena wakanghwina mu kwaratu yainga icina vandhu, wocemeremo.*
31 Pasure pazvo, wakasamba mumeso, wobuda. Ecikwanisa kujibata, iyena wakati: “Perekeranyi* zvokuha.”
32 Ivona vakaperekerera* Josefa paega, hama jake pajegavo. Vaejipita vaaingaya navo, pavegavo. Ngokuti Vaejipita avacaihepi pondhopo no Vahebheru, ngokuti zvinovanyangaja.
33 Hama jake jakadihwa pamberi pake, umwe nga umwe pandau pake. Kuvhira ku mukuru mbhera ku mudoko. Ijona jaisotana ngo cajo jecikahamara.
34 Iyena waindoendesa zvokuha ku meza yavo zvicivha ngo kumeza kwake. Asi kuna Bhenjamini wakamupa rushanu kupinda vese. Ngo kudaro, ivona vaindoha no kumwa mbhera voguta.
Masoko o Pasi
^ Mukhaindi umweni wo ngeji jaishandiswa inga phurufumi mu nguva jo Bhaibheri.
^ Kana: “vakakhodomara.”
^ Kana: “yokoririra.”
^ Kana: “woririremo.”
^ Kana: “diranyi.”
^ Kana: “vakadirira zvokuha.”
