Genesisi 44:1-34
44 Pa kufamba ko nguva iyena wakavhunja muvonereri wo muzi wake kudari: “Zajai saku javo ngo zviro zvokuha. Dirai mutengo wavanokwanisa kuthwara. Udirezve mare ya umwe nga umwe mu saku yake.
2 Asi mu saku ya Bhenjamini, diremo kopo yangu yo sirivha no mare yake yaatenga ndiyona. Zvivhenganijei no zvokuha zviri mu saku makemo.” Ngo kudaro, iyena wakaita zvese zvaakavhunjwa ndi Josefa.
3 Comangwana fumi, zuva parainga roobuda, vanarume vayani vakaenekwa vopinda no mbongoyo javo.
4 Vanarume vaya vainga vacito vaandhambo maningi Josefa paakavhunja muvonereri wo muzi wake kudari: “Mukai! Teverai vanarume vayani! Ukavabata vavhunjei kudari: ‘Ngenyi matiitira zvakashata kuveni itusu takamuitira zvakanaka?
5 Ngenyi makaba kopo ya patarau wangu? Imwimwi amuzvizivi kuti ndiyona yavanoshandisa kuti vadurujire zvinozoitika? Waro imwimwi maita zviro zvakashata maningi.’”
6 Ngo kudaro, iyena wakavabata wovavhunja masoko ondhowo.
7 Ivona vakamuvhunja kudari: “Ngenyi muri kunanga kudari mambo wangu? Azvingaitiki kuti itusu vashandiri venyu timuitire zviro zvakadari.
8 Vonanyi basi, itusu takaviisa mare yainga musaku jedu, yatakavona patakaguma ku Khanani. Waro zvingaitisa kudini kuti itusu tiende koba sirivha kana goridhi, zviro zvopamuzi wa patarau wenyu?
9 Kudari ikawanika na umwe wedu, ngaafe mundhu endhowo. Itusu tese tinozova varanda va patarau wenyu.”*
10 Ngo kudaro, iyena wakananga kudari: “Mukuzwirana no zvamananga, ngatiite kudari: Wiya anozokhandika no kopo yandanangari, anozova muranda wangu. Asi imwimwi mwese munozova mucina ndava.”
11 Ngo kudaro, umwe nga umwe wakabzusa khonyo rake pasi, vorifunungura.
12 Iyena wakanasa kupsaka kamare. Wakatanga ngo khonyo ro musharuka mbhera ku khonyo ro mufana. Pejisire, kopo yaipsakwaro yakazowanika mu khonyo ra Bhenjamini.
13 Ivona vakamwesa nguvo javo, perapo vakatora makhonyo avo vopakija pa mbongoyo kuti vahwirire kudhorobha.
14 Judha no hama jake pavakaenda kumuzi ka Josefa, iyena wainga aciriyo. Ngo kudaro, ivona vakaguma vogwadama pasi pamberi pake.
15 Josefa wakavavhunja kudari: “Zvicinyi zvamaitari? Imwimwi amuzvizivi kuti mundhu wakadari inga ndini, ndinokwanisa kunasa kufembera* kamare zvinozoitika?”
16 Ngo kudaro, Judha wakadavira kudari: “Ngozvapi zvatingananga kwamuri? Tinganangenyi? Apana zvatingananga zvingativonesa kuti itusu atina ndava. Mwari wo cokwadi, wabudisa pambhene zvishaishi zvedu. Wari uno, itusu pamwepo no mundhu wakhandikari ano kopo, tiri vashandiri venyu!”
17 Asi iyena wakadavira kudari: “Andingamboiti zvondhozvo! Wiyani wakhandikaya no kopo yangu, ndiyena anozova muranda wangu. Asi imwimwi mwese endanyi henyu* ka baba wenyu.”
18 Judha wakakhwedera phedo wonanga kudari: “Ndiri kudeketera mambo wangu, ndapota! Nditenderenyi kuti ndiverekete pamberi penyu. Mucatinyangajira. Ngokuti imwimwi makaezana na Faro kamare.
19 Imwimwi makativhunjisa kudari: ‘Imwimwi muna baba kana kuti hama?’
20 Itusu takamudavira kudari: ‘Itusu tinavo baba vaamusharuka maningi. No munukuna wakabahwa ndi baba vedu pavainga vaamusharuka kamare. Asi hama yake yakatamika. Iyena ndiyena wainga asara basi mu ndani ma mai wake. Cimwenizve, baba vakona vanomuda maningi.’
21 Patakapera kubhuya izvi, imwimwi makativhunja kudari: ‘Muviisenyi kuno, kuti ndimuvone.’
22 Asi itusu takamuvhunja kudari: ‘Mufana uwu aavhiri kusiya babake. Ngokuti akambhera ngo kupinda, babake vanofa kamare.’
23 Imwimwi makativhunja kudari: ‘Imwimwi amudikani kuviya kuno mucina mufana wondhowo.’
24 “Ngo kudaro, itusu takaenda ka baba wedu, tovavhunja masoko ese amakativhunja.
25 Pa kufamba ko nguva baba vedu vakativhunja kudari: ‘Hwiriranyi muende kotenga zvokuha.’
26 Itusu takavapingura kudari: ‘Atihwiriri. Itusu tinozoenda kudari tikava no munukuna wedu. Ngokuti atidikani kuhwirira kondhoyo ticina munukuna wedu.’
27 Asi baba vedu vakatidavira kudari: ‘Imwimwi munozviziva kuti mukaji wangu wakandibarira vana vaviri basi.
28 Asi umwe wavo aacipo. Inini ndakananga kudari: “Ndizvona kamare kuti zvinoita inga kuti iyena wakahiwa ngo cinyama!” Andizivi kuzomuvonazve mbhera na nyamasi uno.
29 Kudari mukatorazve mwana wangu uwu momupindisa, koitika ngozi yakakura mugwanjemo, munozoita kuti inini ndiende mu Guva* ndakanyangajwa no vhuji rangu rakacena.’
30 “Waro kudari tikahwirira ticina mufana uwu, zvecivoneka kuti ivona vanomuda maningi inga madire avanoita upenyu hwavo,
31 pavanondotivona ticina mufana uwu, baba vedu, zvokadi vanozoenda kamare mu Guva* vakanyangajwa no vhuji rakacena.
32 Inini ndakagondesa kudari baba wangu ngo pamusoro po mufana uwu: ‘Kudari ndikatama kuviya naye, ndomupekeja, inini ndinonga ndamushaishira mu upenyu hwangu hwese.’
33 Waro ndapota ndiregerenyi ndiite muranda wenyu inini. Kuti mufana uwu ahwirire no hama jake.
34 Ndingazviitisa kudini kuti ndihwirire ka babangu ndicina mufana uwu? Andicaizokwanisepizve kuvona matambujiko aya eciwira babangu!”
Masoko o Pasi
^ Gama ngo Gama: “wangu.”
^ Kana: “kuthokera.”
^ Kana: “murunyararo.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
