Genesisi 45:1-28
45 Ngo kudaro, Josefa paakakonehwa kujibata pamberi po vandhu vaainga navo, wakananga kudari: “Mundhu wese ngaabude pamberi pangu.” Ngo kudaro, apana mundhu waingepo Josefa paakaita kuti hama jake jimuzive.
2 Iyena wakatanga kucema* ngo izwi guru, zvoita kuti Vaejipita vazvizwe no vo kumuzi ka Faro.
3 Pakupejisira, Josefa wakavhunja hama jake kudari: “Ndini Josefa. Babangu vaciri penye?” Asi hama jake ajizivi kukwanisa kumudavira ciro. Ngokuti jaithya pamberi pake.
4 Waro Josefa wakavhunja hama jake kudari: “Khwederanyi kuno ndapota.” Ngo kudaro ivona vakakhwedera, perapo wakavavhunja kuti: “Ndini Josefa hama yenyu, yamakatengesera Vaejipita.
5 Asi mucanyangajwa, amudikanizve kushorana ngocenyu, ngo pamusoro po kunditengesera Vaejipita. Ngokuti Mwari, wakanditungamija pamberi penyu kuti ndiponese upenyu hwo vandhu.
6 Iri, raagore rocipiri ro njara mu nyika ino. Tinozovazve no makore mashanu okuti akuzorimwi no kukotora.
7 Mwari wakanditumira pambeji penyu, kuti musare pa nyika ino no kuponesa upenyu hwenyu ngo njira inoshamaisa.
8 Waro asipi imwimwi mwakandiviisa kuno, asi ndi Mwari wo cokwadi wakandiviisa kuno kuti andigaje kuva mupangiri mukuru wa Faro, ndova mambo wo pamuzi pake no mutongi wo nyika yese yo Ejipita.
9 “Hwiriranyi ngo kukasika ka baba wangu, muvavhunje kudari: ‘Mwana wenyu Josefa, wananga kuti: “Mwari wandigaja kuva mambo wo nyika yese yo Ejipita. Viyanyi kuno, mucanonoka.
10 Imwimwi munozogara ndau yo Gosheni, kuti muve phedo na inini. Imwimwi, no vana venyu, no vazukuru, no mavhuta, no n’gombe no zvese zvamunazvo.
11 Kondhono ndinozomupekeja zvokuha, imwimwi, vo pamuzi penyu no zviro zvese zvamunazvo. Kuti mutame kuruza ciri cese no kutambujika ngo njara. Ngokuti kwasarazve makore mashanu o njara.”’
12 Imwimwi no munukuna wangu Bhenjamini, mungavona ngo majiso enyu kuti ndinidi kamare ndiri kubhuyari na imwimwi.
13 Waro vhunjanyi babangu nduma yese yandinayo ku Ejipita kuno, no zvese zvomavona. Wari pindanyi ngo kukasika muviise baba wangu kuno.”
14 Iyena wakakumbatira Bhenjamini munukuna wake, wotanga kucema.* Bhenjamini wakacemavo* naakamukumbatira.
15 Iyena wakabhejhari hama jake jese, wocema* naakajikumbatira. Perapo, hama jake jakabhuya naye.
16 Vese vo pamuzi wa Faro vakazwa masoko okuti: “Hama ja Josefa jaguma.” Izvo zvakadakajisa maningi Faro no vashandiri vake.
17 Waro Faro wakavhunja Josefa kudari: “Vhunjai hama jako kuti: ‘Itanyi kudari, pakijanyi zvokuha zvenyu pa zvinyama, mupinde ku nyika yo Khanani.
18 Toranyi baba wenyu no vandhu vavanogara navo muviye navo kuno. Inini ndinozomupa zviro zvaushoni maningi zvo nyika ino yo Ejipita. Imwimwi munozoha zviro zvo ndau yakanakisisa yo nyika ino.*
19 Imwimwi munodikana kuvavhunja kudari: “Itanyi kudari: Toranyi ngoro* jo mu Ejipita muno, kuti muende kopakija vana venyu no vakaji venyu. Baba wenyu ngavapakirevo mu ngoro* imwe kuti vaviye kuno.
20 Mucathimwa-thimwa ngo zviro zvamunazvo, ngokuti zviro zvese zvo nyika yo Ejipita ngo zvenyu.”’”
21 Vana va Iziraeri wakaita zvondhozvo. Josefa wakavapekeja ngoro* inga zvaakavhunjwa ndi Faro, no kuvapekejazve zviro zvokuha mugwanja.
22 Wakapekeja umwe na umwe wavo nguvo jo kucinja. Asi kuna Bhenjamini, wakamupekeja mangwenjere anokwana kuita 300 o sirivha no nguvo shanu jo kucinja.
23 Wakatumira babake zviro izvi: gumi ro mbongoyo jakathwara zvokuha zvaushoni zvo Ejipita, gumi ro mbongoyo jokaji jaithwara tirigu, pau no zvokuha zvimweni, kuti vazohe pavanozoita hwendo.
24 Ngo kudaro, iyena wakaenekana no hama jake. Pavaida kupinda, iyena wakavavhunja kudari: “Mucanyangajirana mu makwanjemo.”
25 Ivona vakavha Ejipita vopinda ku nyika yo Khanani ka Jakobe baba wavo.
26 Ivona vakavavhunja kudari: “Josefa aciri penye. Iyena ari kutonga mu nyika yese yo Ejipita.” Hana ya Jakobe yakamukira kubharuka. Ngokuti iyena aacaizvitenda.
27 Pavaindonanga masoko ese ovakavhunjwa ndi Josefa, no paakavona ngoro* jakaviiswa ndi Josefa kuti jivathware, Jakobe baba wavo, wakavazve no simba.
28 Iziraeri wakananga kudari: “Zvakwana! Mwana wangu Josefa aciri penye. Ndinodikana kwenda komuvona ndicito ndafa.”
Masoko o Pasi
^ Kana: “kurira.”
^ Kana: “kurira.”
^ Kana: “wakariravo.”
^ Kana: “worira.”
^ Kana: “munozoha zviro zvakakora zvo nyika ino.”
^ Kana: “kareta.”
^ Kana: “kareta.”
^ Kana: “kareta.”
^ Kana: “kareta.”
