Genesisi 46:1-34
46 Ngo kudaro, Iziraeri wakatora zvese zvaainga nazvo wopinda. Paakaguma Bheri-shebha wakaitira mupiro Mwari wa Izaki, babake.
2 Perapo Mwari wakabhuya na Iziraeri mu civoniso co usiku. Mwari wakadanija kudari: “Jakobe, Jakobe!” Iyena wakadavira kuti: “Ndauwe!”
3 Iyena wakati: “Ndiri Mwari wo cokwadi, Mwari wa baba wako. Ucathya kwenda Ejipita. Ngokuti ndinozokuita jinja guru.
4 Inini ndinozoenda na iwewe Ejipita ndozokuviisazve kuno. Paunozofa, Josefa anozova pamutivi pako.”*
5 Pasure pazvo, Jakobe wakavha Bheri-shebha. Vana va Jakobe vaipakija Iziraeri baba wavo no vana vavo mu kareta* jakatumihwaya ndi Faro.
6 Ivona vakatora upfumi hwavo no mushambi javo javainga najo mu nyika yo Khanani. Ngo kudaro, Jakobe no mubarihwana wake wese, vakaguma mu nyika yo Ejipita.
7 Iyena wakaenda ku nyika yo Ejipita no vana vake vorume no vazukuru vake vo rume, vana vake vokaji no vazukuru vake vokaji; mubarihwana wakewo wese.
8 Mazina o vana va Iziraeri, kana kuti, vana va Jakobe vakaenda ku nyika yo Ejipita, nga aya: Dangwe ra Jakobe wainga Rubheni.
9 Vana va Rubheni vainga Anoki, Paru, Ezironi na Karimi.
10 Vana va Simiyoni vainga Jemuweri, Jamini, Ohadhi, Jakini, Zohari na Shauri, waingaya mwana wo mwanakaji wo ku Khanani.
11 Vana va Revhi vainga Gerishoni, Kohati na Merari.
12 Vana va Judha vainga Ere, Onani, Shera, Perezi na Zera. Asi Ere na Onani vakatamikira ku nyika yo Khanani. Vana va Perezi vakava Ezironi na Hamuri.
13 Vana va Isakari vainga Tora, Puvha, Yobo na Shimironi.
14 Vana va Zebhuroni vainga Seredhe, Eroni na Jareeri.
15 Ava ndivona vana va Reya vaakabara na Jakobe mu nyika yo Padhani-arami, kubatanijavo, mwana wake wokaji, Dhaina. Vana vake vese vorume no vokaji vakakwana kuita 33.
16 Vana va Gadhi vainga Zifiyoni, Agi, Shuni, Ezibhoni, Erai, Arodhi na Areri.
17 Vana va Azeri vainga Iminaa, Ishiva, Ishivi, Bheriya, no hambzaji yavo yaidanijwa kuti Sera.
Vana va Bheriya vainga Hebheri na Marikiyeri.
18 Ava ndivona vana va Ziripa. Ziripa uwu wainga mushandiri wa Rabhani, waakazopekeja mwana wake Reya. Iyena wakabara vana ava na Jakobe. Vese vaikwana kuita 16.
19 Vana va Rakeri mukaji wa Jakobe vainga Josefa na Bhenjamini.
20 Josefa na Asenati, mwana wokaji wa Potifera mupiri wo Oni,* vakabara Manase na Efraimi mu nyika yo Ejipita.
21 Vana va Bhenjamini vainga Bhera, Bhekeri, Ashibheri, Gera, Naamani, Ehi, Roshi, Mupimi, Hupimi na Aridhi.
22 Ava ndivona vana va Rakeri vaakabara na Jakobe. Vese vaikwana kuita 14.
23 Mwana wa Dhani wainga Hushimu.
24 Vana va Naftari vainga Jazeeri, Guni, Jezeri na Shiremi.
25 Ava ndivona vana va Bhiriha. Bhiriha uwu wainga ari mushandiri wa Rabhani waakazopekeja mwana wake Rakeri. Iyena wakazobara vana ava na Jakobe. Vese vaikwana kuita vanomwe.
26 Vana vese va Jakobe, vaakaenda navo ku Ejipita, vaikwana kuita 66, ticikaverengi vakaji vo vana va Jakobe.
27 Josefa wakabara vana vaviri mu nyika yo Ejipita. Vandhu vese vo pamuzi pa Jakobe vakaenda mu nyika yo Ejipita, vaikwana kuita 70.
28 Jakobe wakatuma Judha kuti atungamire kovhunja Josefa kuti vainga vecienda Gosheni. Povakaguma mu ndau yo Gosheni,
29 Josefa wakanasirira ngoro* yake, woenda kosongana na Iziraeri baba wake ku ndharaundha yo Gosheni. Paakavonana navo, wakavakumbatira, wocema* pa mukuvo wakati kuti.
30 Perapo Iziraeri wakavhunja Josefa kuti: “Wari ngandicife hangu azvicina ndava; ndavona kumeso kwako, ndoziva kuti uciri penye.”
31 Perapo Josefa wakavhunja hama jake no vandhu vo pamuzi pa baba wake kuti: “Ndiri kuhwirira kovhunja Faro kuti: ‘Hama jangu no vandhu vo pamuzi pa baba wangu vaingaya mu nyika yo Khanani, vaguma muno.
32 Vandhu ava vanoita basa ro kuhavisa, ivona vanorera zvifuyo. Wariu vaviisa mavhuta avo, n’gombe javo no zvese zvovanazvo.’
33 Faro paanomudanija womuvhunjisa kuti: ‘Munoita basa renyi?’
34 Imwimwi munodikana kudavira kuti: ‘Itusu tinoita basa ro kurera zvifuyo kuvhira pa udoko hwedu mbhera wari, inga zvaiita majicekuru edu,’ kuti mugare mu nyika yo Gosheni, ngokuti vahavisi vese vanonyangaja Vaejipita.”
Masoko o Pasi
^ Kana: “Josefa anozofunga majiso ako ngo nyara jake.”
^ Kana: “ngoro.”
^ Kana kuti, Heriyoporisi.
^ Kana: “kareta.”
^ Kana: “worira.”
