Genesisi 47:1-31
47 Ngo kudaro, Josefa wakavhunja Faro kudari: “Babangu no hama jangu, no mavhuta no n’gombe javo no zvese zvovanazvo, vaviya kuvha ku Khanani, wari vari mu ndau yo Gosheni.”
2 Iyena wakatora hama jake shanu woenda najo ka Faro.
3 Faro wakavhunjisa hama ja Josefa kudari: “Munoita basa renyi?” Ivona vakadavira kudari: “Itusu vashandiri venyu, tiri vahavisi vo mavhuta inga zvaiitwa ngo majicekuru edu.”
4 Ivona vakavhunjazve Faro kudari: “Itusu taviya kuzogara kuno inga varendo, ngokuti ku Khanani akucina mahavo o mavhuta edu. Kondhoyo kuno njara maningi. Waro tapota, tenderanyi kuti itusu vashandiri venyu, tigare ku ndau yo Gosheni.”
5 Ngo kudaro, Faro wakavhunja Josefa kudari: “Babako no hama jako vaviya kuno kuzogara na iwewe.
6 Waro nyika yo Ejipita iri mu nyara jenyu, endai wodira babako no hama jako ku ndau yaushoni yo mu nyika muno. Ivona ngavagare mu ndau yo Gosheni. Kudari iwewe weciziva vanarume vanokwanisa pakati pavo, vagajei kuti vavonerere zvifuyo zvangu.”
7 Ngo kudaro, Josefa wakanghwinisa Jakobe, womuendesa ka Faro. Jakobe wakakomborera Faro.
8 Faro wakavhunjisa Jakobe kudari: “Muno makore mangana?”
9 Jakobe wakadavira Faro kudari: “Ndino makore anokwana kuita 130 ndicimbeya mu nyika. Makore aya akazara ngo zvineso, iwona mashoma maningi tikamaezanisa no makore akapeja majicekuru angu vecindombeya.”
10 Pasure pa izvi, Jakobe wakakomborera Faro, wopinda.
11 Waro Josefa wakatora babake no hama jake, woenda kovadira ku ndau yovaidikana kugara ku nyika yo Ejipita, ku divi raushoni ro nyikeyo, mu ndau yo Raamisesi inga zvakanangwa ndi Faro.
12 Josefa wakapekeja zvokuha baba wake no hama jake no vese vainga pamuzi pa babake, mukuzwirana no kuwanda kwakaita vana vavo.
13 Mwainga mucina zvokuha mu nyika yese, ngokuti njara iyi yaikura maningi. Nyika yo Ejipita no nyika yo Khanani, yakasara icina cokuita ngo ndava yo njara.
14 Josefa waitora mare yese yaivha ku nyika yo Ejipita no nyika yo Khanani, yaiviiswa ngo vandhu kuti vatenge zvokuha. Iyena waiiendesa ku nyumba ya Faro.
15 Pakufamba ko mukuvo, mare yese yo nyika yo Ejipita no nyika yo Khanani, yakapera. Vaejipita vese vatanga kuviya kuna Josefa vecimuvhunja kuti: “Tipei zvokuha! Ngenyi tingafa iwewe ucitisota ngokuti mare yedu yapera?”
16 Josefa wakavavhunja kudari: “Kudari mare yenyu yapera, viisanyi zvifuyo zvenyu. Tinozocinjana, imwimwi mondipekeja zvifuyo, inini ndomupekeja zvokuha.”
17 Waro ivona, vakatanga kuviisa zvifuyo zvavo kuna Josefa. Ngo kudaro, Josefa waivapekeja zvokuha ecicinjanisa no haci, mavhuta, n’gombe no mbongoyo. Iyena waivapa zvokuha ecicinjanisa no zvifuyo zvavo zvese mu gore rondhoro.
18 Parakapera gore iri, gore rakatevera, ivona vakaviya vomuvhunja kuti: “Atimufisiri mambo wedu, mare yedu no zvifuyo zvedu, tapera kumupekeja. Aticinazve ciro kuti timupekeje mambo wedu, tasara no muviri no ndau jedu.
19 Mungatisiirenyi ticifa, itusu no ndau jedu? Titengenyi no ndau jedu kuti tiwane zvokuha. Itusu no ndau jedu, tinozova varanda va Faro. Tipenyi zvokuha kuti tipone, titame kufa, kuti nyika yedu itame kugara icina vandhu.”
20 Josefa wakatengera Faro nyika yese yo Vaejipita. Ngokuti, Vaejipita vese vaitengesa minda yavo. Njara iyi yaikura maningi. Nyika yese yakazova ya Faro.
21 Perapo, wakathuthisa vandhu vese wovaendesa kumadhorobha, kuvha mu ndharaundha jese jo Ejipita.
22 Asi ndau yo vapiri ndiyona yaacizivi kutenga, ngokuti vaipuwa zvokuha ndi Faro. Ivona vaipona ngo zvokuha zvovaipuwa ndi Faro. Ndizvona zvakaitisa kuti ivona, vatame kutengesa ndau yavo.
23 Josefa wakavhunja vandhu kudari: “Vonanyi, nyamasi ndamutenga, imwimwi no ndau jenyu kuti muve va Faro. Nga iyi mbeu kuti muende kosima mu munda.
24 Pa zvinozoivha zvokuha, pa mututu mushanu, umwe nghwa Faro murongomuna ngo jenyu, kuti muite mbeu yenyu no zvokuha zvenyu no vana venyu, kubatanijavo no vandhu vamunogara navo.”
25 Waro ivona vakati: “Imwimwi mwatiponesa. Tiitirenyi unyasha mambo wedu, itusu tinozova varanda va Faro.”
26 Perapo Josefa wakazviita kuti zvive mutemo mu nyika yese yo Ejipita, mbhera na nyamasi, kuti pa mututu mushanu, umwe nghwa Faro. Asi ndau yo vapiri basi ndiyona icizivi kuva ya Faro.
27 Vaiziraeri vakaenderera mberi vecigara mu nyika yo Ejipita mu ndau yo Gosheni. Ivona wakawana zviro zvakawanda, vobarana, vowanda.
28 Jakobe wakagara mu nyika yo Ejipita makore anokwana kuita 17. Makore ese a Jakobe, akava 147.
29 Jakobe paakaziva kuti wainga woda kufa, wakadanija Josefa mwanake, womuvhunja kuti: “Kudari nowaindiitiravo unyasha, ndapota, pikai,* kuti unozondiitira rudo ucikacinji no kuva wakagondeka kwandiri. Ndapota, ucandivigira mu Ejipita muno.
30 Ndikambhera ngo kufa, ndivhisei mu Ejipita muno, uende kondiviga mu guva ro majicekuru angu.” Ngo kudaro, Josefa wakati: “Ndinoita zvamanangaro.”
31 Waro iyena wakati: “Pikai.” Josefa wakapika. Kuvha apo, Jakobe wakasheyamija musoro wake pa mucago wo kama yake.*
Masoko o Pasi
^ Gama ngo Gama, “dirai nyara pasi po mutezo wangu.” Zvinovoneka kuti aya ainga manera o kugondesa mbhiko.
^ Kana: “mubhedhu wake.”
