Genesisi 48:1-22
48 Pasure po zviro izvi, Josefa wakavhunjwa masoko aya: “Babako vari kuhwaja.” Ngo kudaro, iyena wakatora vana vake vaviri, Manase na Efraimi, woenda navo ka babake.
2 Tevere Jakobe wakavhunjwa kudari: “Mwana wenyu Josefa waviya kuzomuvona.” Ngo kudaro, Iziraeri wakavangisira wogara pa mubhedhu* wake.
3 Jakobe wakavhunja Josefa kudari:
“Mwari wo Masimba Ese wakandigumira ku Ruzi mu nyika yo Khanani, wondikomborera.
4 Iyena wakandivhunja kudari: ‘Ndinozokuita kuti ubare vana. Ivona vanozowanda maningi. Ndinozoitazve kuti uve baba wo majinja akawanda maningi. Ndinozopazve nyika iyi ku mubarihwana wako. Iyona inozova utaka hwako kwenda no kwenda.’
5 Vana vaviri vowakabarari ku Ejipita kuno ndicito ndaviya kuno, ngo vangu. Efraimi na Manase vanozova vana vangu inga Rubheni na Simiyoni. Ivona vana vangu.
6 Asi vana vanozotevera ngo vako. Ivona vanozoashira utaka ngo zina ro hama javo.
7 Pandainga ndecivha ku Padhani, Rakeri wakafa ari ngo pamutivi pangu mu nyika yo Khanani. Paakafira Rakeri painga pano mumango* wakatikuti kuti tigume ku Efrati. Inini ndakamuviga mu gwanja rinoenda ku Efrati, kana kuti, Bheterehema.”
8 Tevere, Iziraeri paakavona vana va Josefa, wakavhunjisa kudari: “Vana ava ngo vako?”
9 Josefa wakadavira babake kudari: “Hina, ngo vangu. Ndivona vana vondakapuwa ndi Mwari mu ndau ino.” Ngo kudaro, Jakobe wakati: “Ndapota, vaviisei kuno ndivakomborere.”
10 Meso a Iziraeri ainga ooita bute* ngo pamusoro po ndanga yake. Ngo kudaro, aazivi kukwanisa kuvavona. Josefa wakatora vana vake woenda navo phedo na babake. Jakobe wakavabhejhari no kuvakumbatira.
11 Iziraeri wakavhunja Josefa kudari: “Andicairangarirepi kuti ndaizokwanisa kuvonazve kumeso kwako. Asi Mwari wandiita kuti ndikwanisevo kuvona vana vako.”
12 Josefa wakavhisa vana vake phedo no makokovhi a Iziraeri, perapo wogwadama kumeso kwake kopsasa pasi.
13 Tevere, Josefa wakatora vana vake vaviri, wobata Efraimi ngo mukono wake wo muho, womudira ku mukono boshwe wa Iziraeri, wobata Manase ngo mukono wake wo boshwe, womukhwedeja ku mukono muho wa Iziraeri. Ngo kudaro, wakavaendesa kuna babake.
14 Pikija hazvo kuti Efraimi wainga ari mwana wo mudoko, Iziraeri wakadira mukono wake wo muho pamusoro pa Efraimi, wotora mukono wake boshwe woudira pamusoro pa Manase. Iyena wakaita izvi ngo cabomo,* ngokuti Manase wainga mwana wo dangwe.
15 Jakobe wakakomborera Josefa eciti:
“Mwari wo cokwadi waishandihwaya ngo majibaba angu Abhirahama na Izaki,Mwari wo cokwadi wiyani wainditungamiriraya* mu upenyu hwangu hwese mbhera na nyamasi,
16 Wiya anoshandisa ngirozi yakanditungamirira mu matambujiko angu ese, ngaakomborere varimbhwane ava.
Ivona ngavadanijwe ngo zina rangu no zina ro majibaba angu, Abhirahama na Izaki.Ngavaengejeke, vawande pasi pano.”
17 Josefa paakavona kuti babake avaripi kuvhisa mukono wavo wo muho wainga uri panyezuru po musoro wa Efraimi, iyena wakanyangajwa ndizvona, woeja kuvhisa mukono wa babake wainga pamusoro wa Efraimi kuti audire pamusoro wa Manase.
18 Josefa wakavhunja babake kudari: “Andizvopi babangu, ngokuti dangwe nga uwu. Diranyi mukono wenyu wo muho pa musoro wo mwana uwu.”
19 Asi baba wake vairamba vecinanga kudari: “Ndinozviziva mwanangu, ndinozviziva. Iyenavo anozova jinja. Iyena anozova mukuru. Cimwenizve, munukuna wake anozova mukuru kupinda iyena, mubarihwana wake unozova wakaezana no jinja guru.”
20 Ngo kudaro, iyena wakaenderera mberi ecivakomborera pa njiku yondhoyo, eciti:
“Iziraeri ngaidanije mazina avo povanonga vecikomborerana, veciti:‘Mwari ngaakuite inga ndi Efraimi na Manase.’”
Ngo kudaro, iyena wakaenderera mberi ecidira Efraimi pambeji pa Manase.
21 Tevere, Iziraeri wakavhunja Josefa kudari: “Inini ndiri kufa wari, asi ndinozviziva kuti Mwari anozoramba ana imwimwi. Iyena anozomuhwirija ku nyika yo majicekuru enyu.
22 Asi inini ndinozokupekeja ndau yakakura kupinda hama jako, ndau yondakatorera Vaamori ndecishandisa banga no uta.”
Masoko o Pasi
^ Kama.
^ Musango.
^ Kana: “uma.”
^ Kana: “cakwenye.”
^ Gama ngo Gama: “waindihavisaya.”
