Genesisi 49:1-33
49 Jakobe wakadanija vana vake wovavhunja kuti: “Ungananyi pamwepo kuti ndimuvhunje zvinozoitika mu njiku jo kupejisira.
2 Ungananyi muzwe, imwimwi vana va Jakobe, purukiranyi Iziraeri baba wenyu.
3 “Rubheni, ndiwe dangwe rangu, no simba rangu no wokutanga ko simba rangu ro kubara. Iwewe uri mukuru pa kukujwa, no mukuru pa kuva no simba.
4 Iwewe auzobudiriri, ngokuti ngo kutama kwako kujibata inga kumwa icikagajani, wakaenda pa kama ya* baba wako. Pa mukuvo wondhowo, wakasvipisa kama yangu.* Iyena kamare wakaendadi pa kama yangu!*
5 “Simiyoni na Revhi i hama no hama. Ivona vanoita zvo ugevenga veciuraya vandhu ngo mapanga.
6 Inini andizobatani navo nee andizonghwini pa cikwata cavo. Ngokuti vakauraya vandhu ngo ushungu hwavo. Vaidakajihwa ngo kudajura mujira jo murenje jo n’gombe.
7 Ngakutukwe kunyangajwa kwavo ngokuti kwakashata, no ushungu hwavo, ngokuti hunovaitisa kuti vaite zviro ngo hasha. Ndinovandhandhanisa mu ndharaundha ya Jakobe, ndovandhandhanisa mu Iziraeri.
8 “Iwewe Judha, hama jako jinozokusimba. Nyara yako inozova mu musipa mo vavengi vako. Vana va babako vanozogwadama pamberi pako.
9 Judha wakaita inga cimwana co mbhondoro. Mwanangu, unozopinda wapera kuha nyama yawaruma. Iyena anovata wodamura inga mbhondoro. Ndiyani angacunga kuenda komumusa?
10 Ndonga aizovhisihwi Judha, nee ndonga yo umambo iri pakati po soka jake, mbhera Shiro* aviye. Vandhu vese vanozoita zvaanozonanga.
11 Iyena anosungira mbongoyo yake pa muuvha no cimwana co mbongoyo yake pa muuvha wakanaka maningi. Iyena anopaja nguvo jake ngo vhinyu no mutotosvi* wo uvha.
12 Majiso ake akapsuka ngo vhinyu, meno ake akacena ngo mukaka.*
13 “Zebhuroni anozogara mumbhiripiri mo jombe, phedo no ndau inocevera piketi, mugano wake unozoenda koimira ku Sidhoni.
14 “Isakari i mbongoyo ino maphondo akavanga, inovata yakathwara mujiyo muviri pa musana payo.
15 Iyena anozovona kuti ndau yake yakanaka, iyona i nyika inodakajisa. Iyena anozotendera kuthwara mujiyo, wotendera kuita basa rakavanga.
16 “Dhani ndi umwe wo vhumbo ro Iziraeri, iyena anozotonga vandhu vake.
17 Dhani anozoita inga nyoka iri mu mbhiripiri mo citaka,* inga vhumbi riri mu mbhiripiri mo gwanja, rinoruma cisisinindho co haci, zvoita kuti mupakiri wayo awe ngo goci.
18 Ndinozoimira ruponeso hunovha komuri, imwimwi Jehovha.
19 “Gadhi anozohwiswa ngo cikwata co mambavha, asi iyena anoruma zvisisinindo zvavo.
20 “Zvokuha zva Azeri zvinozowanda maningi. Iyena anozopa vandhu zvokuha zvinofanera majimambo.
21 “Naftari i zahwi rinophuka maningi. Iyena anobhuya masoko anodakajisa.
22 “Josefa i davi ro miti uri pa ndimo, phedo no murambo wo kumwa, matavi awo anotambanuka panyezuru po mupfimbiji.
23 Vanofura ngo uta, vaimunesa, vaimufura, vainga no bundu naye.
24 Pikija zvakadaro, uta hwake hwainga mu ndau yaho, nyara jake jaigara jakavanga. Izvi zvaivha ka Mwari wa Jakobe ano simba, muhavisi, buwe ro Vaiziraeri.
25 Josefa anovha kuna Mwari wa baba wake. Mwari anozomubesera. Iyena ana wiya wo Masimba Ese. Mwari anozokukomborera ngo makomborero anovha kumatenga, ngo makomborero anovha pasi pakajika, ngo makomborero o kuva no vana vakawanda maningi no zvifuyo.
26 Makomborero a baba wake anozopinda makomborero o matundhu o kwenda no kwenda no zviro zvinodakajisa zvo matundhu zvinogara kwenda no kwenda. Iwona anozoenderera mberi ari pamusoro pa Josefa, pamusoro pa wiya wakasanwa pakati po hama jake.
27 “Bhenjamini anozoenderera mberi ecivhavhura inga bumbhi. Comangwanani anoha caabata, comadeko anokovanisa kafani.”*
28 Ese aya ndiona mavhumbo 12 o Vaiziraeri, izvi ndizvona zvovakavhunjwa ndi baba wavo pavaivakomborera. Iyena wakakomborera umwe na umwe mukuzwirana no zvaanofanera.
29 Pasure po zviro izvi, iyena wakananga kudari: “Inini ndinofa mbai-mbaipano. Ndivigenyi pamwepo no majibaba angu mu bako riri mu munda wa Efroni Muhiti.
30 Bako iri, riri mu munda wo Makipera pambeji po Mamure, mu nyika yo Khanani, Abhirahama wakatengesehwa munda uwu ndi Efroni Muhiti kuti uite svipa.
31 Kondhoyo ndikona kwakavigihwa Abhirahama no mukaji wake Sara. Ndikona kwakavigihwa Izaki no mukaji wake Rabheka, ndikonazve kondakavigira Reya.
32 Munda wakona no bako riri mukati mawo, zvakatengeswa ngo vana Vahiti.”
33 Ngo kudaro, Jakobe wakapekeja ndhungamiriro iji vana vake. Iyena wakavata pa mubhedhu wake,* wofa, woenda kovigwa ngo mavigihwe akaithwa vandhu vake.
Masoko o Pasi
^ Kana: “mubhedhu wa; mubhedhi wa.”
^ Kana: “mubhedhu wangu; mubhedhi wangu.”
^ Kana: “mubhedhu wangu; mubhedhi wangu.”
^ Zina iri rinoreva kuti “Mune Wayo.”
^ Muto.
^ Kana: “reti.”
^ Ruwa.
^ Kana: “zviro zvinosiiwa ngo mundhu wafa.”
^ Kana: “mubhedhi wake; kama yake.”
