Genesisi 50:1-26
50 Josefa wakawira babake ecicema* perapo wovabhejhari.
2 Pasure pa izvi Josefa wakavhunja vashandiri vake vainga varapi kuti vazoje mutembo wa* babake kuti utame kuvora. Ngo kudaro, varapi vayani vakazoja Iziraeri.
3 Ivona vakatora 40 o njiku veciita basa iri. Iji ndijona njiku jinodiwa pa basa ro kuzoja mutembo* kuti utame kuvora. Asi va Ejipita vakaenderera mberi veciita ciriro mbhera 70 o njiku.
4 Njiku jo ciriro pajakapera, Josefa wakavhunja banje ra* Faro kudari: “Ndinokumbiravo kuti muende kovhunja mambo Faro masoko aya:
5 ‘Babangu vakandivhunja kudari: “Inini ndoda kufa wari! Pikai kuti iwewe unozoenda kondivigira kuguva rangu, randakaca ku nyika yo Khanani.” Ndapota, ndiri kukumbiravo kwenda koviga babangu. Ndikapeja ndinoviya.’”
6 Faro wakadavira kudari: “Endai koviga babako inga zvawakavapikira.”
7 Ngo kudaro, Josefa wakaenda koviga baba wake. Vashandiri vese va Faro, no vakuru vo banje rake, no vakuru vese vo mu Ejipitemo, vakaendavo naye.
8 Josefa wakatorazve vese vo pamuzi pake no hama jake no vopamuzi pa babake. Ku ndau yo Gosheni kwakasara basi vana vavo, mavhuta no n’gombe javo.
9 Ngoro,* vapakiri vo haci vakaendavo naye. Ngo kudaro, akampamento iyi yainga yakakura maningi.
10 Perapo, ivona vakaguma ku cimbuwa* co Atadhi, ciri kundharaundha yo Jordhani. Ivona vakagarepo, voitirepo ciriro cakakura maningi. Josefa wakaita njiku nomwe ari pa ciriro ca babake.
11 Vakhanani, vagari vo nyikeyo, vakavona ciriro co va Ejipita pa cimbuwa* co Atadhi, vokahamara veciti: “Ici ciriro cikuru maningi co va Ejipita!” Ndizvona zvakaitisa kuti ndau inowanikaro ku ndharaundha yo Jordhani, idanijwe kuti Abheri-miziraimi.*
12 Ngo kudaro, vana va Jakobe vakamuitira zvese zvaakavavhunja.
13 Vana vake vakamuthwara voenda naye ku nyika yo Khanani. Perapo vakamuviga mu bako riri mu munda wo Makipera; munda uri ngo kumbeji ko Mamure. Abhirahama wakatengesehwa munda uwu ndi Efroni, Muhiti, kuti uite svipa.
14 Paakapera kuviga babake, Josefa wakahwirira ku Ejipita no hama jake no vese vaakaenda navo koviga babake.
15 Hama ja Josefa pajakavona kuti baba wavo vainga vafa, jakavhunjana kudari: “Zvingaita kuti Josefa ano bundu na itusu. Iyena angatoda kutihwirijira zvakashata zvese zvatakamuitiraya.”
16 Ngo ndava yazvo, ivona vakatumira masoko aya kuna Josefa: “Baba venyu vacito vafa vakananga kudari:
17 ‘Vhunjanyi Josefa masoko aya: “Mwana wangu, zvakaithwa ngo hama jako zvakashatadi kamare. Asi ndinokumbira kuti uvaregererevo pa zviro zvese zvakashata zvavakakuitira.”’ Waro tapota, tiregererenyivo itusu vashandiri va Mwari wainamata baba wenyu!” Josefa waicema* maningi pavainga vecibhuya naye.
18 Hama jake jakaviyavo jogwadama pamberi po soka jake, vonanga kuti: “Itanyi zvamunoda! Tiri pano itusu vashandiri venyu!”
19 Josefa wakavavhunja kudari: “Mucathya. Ndiri Mwari inini kuti ndimutonge?
20 Pikija hazvo kuti imwimwi maida kundiitira zvakashata, Mwari wakazviphinduja kuti zvipere ushoni. Zvoitisa kuti vandhu vazinji vaponeswe. Ndizvona kamare zvaari kuitari nyamasi.
21 Waro mucathya inini ndinozoenderera mberi ndecimusapota, ndecimupekeja zvokuha pomwe no vana venyu.” Iyena wakavatondhoja ngo magama anodakajisa.
22 Josefa no vo pamuzi pa babake, vakaenderera mberi vecigara ku Ejipita. Josefa wakava no makore anokwana kuita 110.
23 Iyena wakavona mubarihwana wo citatu wo vana va Efraimi. Wakavonazve vana va Makiri. Makiri wainga ari mwana wa Manase. Josefa waivavona inga vana vake.*
24 Pejisire, Josefa wakavhunja hama jake kudari: “Inini ndinofa sasambi. Asi Mwari anozoenderera mberi ana imwimwi. Zvokadi kamare iyena anozomuvhisa mu nyika ino, womuendesa ku nyika yaakagondesaya kuti waizopekeja Abhirahama, Izaki na Jakobe.”
25 Ngo kudaro, Josefa wakavhunja vana va Iziraeri kudari: “Zvokadi kamare Mwari anozomubesera. Iyena paanozomubesera kuti mubude mu nyika ino, toranyi maphondo angu mupinde nawo.” Ngo kudaro, Josefa wakavakumbira kuti vapike kuti vanozozviitadi kamare.
26 Josefa wakafa ano makore anokwana kuita 110. Ivona vakazoja mutembo wa* Josefa kuti utame kuvora perapo voudira mu kashau ku Ejipita.
Masoko o Pasi
^ Kana: “ashirira.”
^ Kana: “tembe ya.” Gama ro kuti tembe rinonagira muviri wo mundhu wakafa.
^ Kana: “tembe.” Gama ro kuti tembe rinonagira muviri wo mundhu wakafa.
^ Kana: “wakavhunja wo pamuzi pa.”
^ Kana: “kareta.”
^ Kana: “civanje.”
^ Kana: “civanje co.”
^ Zina iri rinoreva kuti “Ciriro co va Ejipita.”
^ Kana: “wairira.”
^ Gama ngo Gama: “vana vakabahwa pa makokovhi ake.”
^ Kana: “tembe ya.” Gama ro kuti tembe rinonagira muviri wo mundhu wakafa.
