Genesisi 6:1-22
6 Vandhu pavakatanga kuwanda pa nyika, pobahwa vana vokaji,
2 vana va Mwari* wocokwadi, vakatanga kuvona kuti vasikane vainga vakaseja.* Ngo kudaro, vakasana vasikane vavaida kuti vaite vakaji vavo.
3 Perapo Jehovha wakati: “Andizoregereri mundhu mbhera narini ngokuti anoita zvakashata, ngo kudaro, makore ake anozoita 120.”
4 Kuvhira pondhopo, pasi pano painga paano magakanyara.* Mukati mo mukuvo wondhowo, vana va Mwari wocokwadi vakaenderera mberi vacivatana no vasikane, vasikane ava vaivabarira vana. Mu mukuvowo, ava ndivona vainga no simba no nduma.
5 Ngo ndava yazvo, Jehovha wakavona kuti kushata ko vandhu kwainga kwakura pasi pano. Wakavonazve kuti mukuvo wese vairangarira kuita zvakashata mu mwoyo mwavo.
6 Jehovha wakazvidemba* maningi ngo kuita vandhu pasi pano, iyena wakasuruvara* maningi.
7 Ngo kudaro, Jehovha wakati: “Ndinozopeja vandhu vandakasika pa nyika. Kuvhira ku vandhu mbhera ku zvifuyo, zvinyama zvinogwezva no shiri jinomburuka ku matenga ngokuti inini ndakazvidemba* ngo kuita vandhu pa nyika.”
8 Asi Nowa wakawana unyasha pamberi pa Jehovha.
9 Zvakaitika mu upenyu hwa Nowa nga izvi:
Nowa wainga mundhu wakarurama, wainga acina ndava pakati po vandhu vamweni vo mu njiku jake.* Nowa wakafamba na Mwari wocokwadi.
10 Pa kufamba ko mukuvo, Nowa wakabara vana vatatu, Semi, Kami na Jafeti.
11 Mwari wocokwadi, wakavona kuti pasi pano painga pavora no kuzara ngo vandhu vaiita zvakashata.
12 Ndizvona, Mwari wakasota pasi pano, wovona kuti painga papera kuvora, vandhu vese vainga vapeja kuvoja mufambiro wavo pasi pano.
13 Sure kwazvo, Mwari wakavhunja Nowa kudari: “Ndasunga kupeja vandhu vese, ngokuti nyika yazara ngo zviro zvakashata ngo ndava yavo. Ngo kudaro, inini ndinozovaparaja kubatanijavo no nyika.
14 Itai arka* ngo matabwa aushoni.* Mukati mwayo itai kwartu jakawanda, uiname ngo thara* mukati no kunja.”
15 Arka* iyi unodikana kuivakisa kudari: Inodikana kuva no 300 o makovhadho* o kureba, 50 o makovhadho o upambhi, no 30 o kovhadho o kukhwira.
16 Unozodira jhanera pa arka kuti mukatimo mueje.* Unozopima kovhadho imwe kuvha panotangira denga mbhera pa jhanera. Itai musuvo umwe ngo pamutivi. Mukatimo unozoita andari ndhatu. Unodikana kudira andari yo kutanga, andari yo cipiri no andari yo citatu.
17 “Inini ndinozoviisa ndambi huru* kuti ndipeje zvisikwa zvese zvino mwiha wo upenyu. Zvese zviri panyika zvinozofa.
18 Inini ndiri kuita citenderano na iwewe. Iwewe unozonghwina mu arka no vana vako no mukaji wako, no nyamwana jako.*
19 Nghwinisai mu arka mufumbo wese wo zvisikwa zvinopona, zviviri zviviri, kuti zvipone pamwepo na iwewe, corume no cokaji.
20 Nghwinisai zvisikwa zvinopona mukuzwirana no mufumbo wazvo, zvifuyo mukuzwirana no mukhaindi yazvo no zvinyama zvese zvinogwezva mukuzwirana no mukhaindi yazvo, zvinozonghwina zviviri zviviri kuti upone na izvona.
21 Iwewe unodikana kusana no kutora mukhaindi wese wo zvokuha, kuti uhe iwewe no zvinyama.”
22 Nowa wakaita zvese zvaakavhunjwa ndi Mwari. Iyena wakaita kudaro kamare.
Masoko o Pasi
^ Aya manangiro o Cihebheru acida kunangira ngirozi ja Mwari.
^ Kana: “vakanyara.”
^ Ku Cihebheru “Manefirimu,” kangaije zvingareva vawisi, izvi zvinoreva vandhu vanowisa vamweni. Vonanyi Kudurujihwa ko Magama pa gama ro kuti Manefirimu.
^ Kana: “wakazvivaza; wakahwajihwa.”
^ Kana: “wakacamwa.”
^ Kana: “ndakazvivaza.”
^ Gama ngo gama: “po mubarihwa wake.”
^ Gama ngo Gama: “bhokiso.” Ngarava yakakura maningi.
^ Muti uwu kangaije unobuda zviro zvinonama.
^ Kana: “katarau; ukapa.”
^ Mudida wo arka: 134 jo metro jo kureba, 22 metro jo upambhi 13 metro jo thuru.
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Gama ro cihebheru ngo rokuti tso′har. Vameni vanoti tso′har rinonga ricinangira denga rakakhwira pakati rino kovhadho imwe basi, kuciripi kunanga jhanera inoejesa mukati.
^ Kana: “guwe guru.”
^ Kana: “vakajimwana vako.”
