Genesisi 8:1-22
8 Mwari wakaponesa* Nowa, zvinyama zvese zvo musora no zvifuyo zvese zvaainga nazvo mu arka. Mwari wakaita kuti kuvhunguze mbhepo, kumwa yotanga kuphwa.
2 Nvura yakagaramuka, no musuvo jo mugore jakafungwa, nvura yogaramuka.
3 Ngo kudaro, kumwa yakatanga kuphwa padoko ngo padoko. Pakupera ko njiku jinokwana kuita 150, kumwa yainga yapunguka.
4 Pa njiku 17 yo mweji wo cinomwe, arka yakaceva pa matundhu o Ararati.
5 Kumwa yaindophwa mbhera pa mweji wo cigumi. Pa njiku yo kutanga yo mweji wo cigumi, pa nyezuru po matundhu aya pakatanga kuvoneka.
6 Pasure po 40 o njiku, Nowa wakazaura jhanera yaakadira pa arka
7 womburusa gunguhwe, irona raindopinda kunja reciviya, mbhera kumwa yainga pa nyika yooma.
8 Pakufamba ko mukuvo wakamburusa njiva, kuti avone dangani kumwa yainga yaphwa kana kuti yainga icito.
9 Njiva aizivi kuwana ndau yokumata, ngo kudaro, yakaviya mu arka mwaaingaya, ngokuti kumwa yainga icakazara pasi pese. Ngo kudaro, iyena wakatambanuja nyara yake woinghwinisa mu arka.
10 Iyena wakagarazve njiku nomwe, perapo womburusazve njiva.
11 Njiva poyakahwirira comadeko, iyena wakaivona yakaruma sakani ro mu maorivhe, ravha kuvhiswa! Nowa wakakwanisa kuziva kuti kumwa yainga yapunguka.
12 Iyena wakagarazve njiku nomwe, perapo wakamburusazve njiva, asi iyona aizivi kuviyazve kwaari.
13 Pa njiku yo kutanga yo mweji wo kutanga wo gore ro 601, kumwa yainga yapera kuphwa, Nowa wakavhisa denga ro arka wovona kuti pasi painga paoma.
14 Mu njiku 27 yo mweji wocipiri, pasi pese painga papera kuoma.
15 Mwari wakavhunja Nowa kudari:
16 “Budai kunja ko arka iwewe, mukaji wako, vana vako pomwe no nyamwana jako.*
17 Budisai kunja zvisikwa zvinopona zvo mushovo wese. Zvisikwa zvinomburuka, zvinyama no zvinyama zvese zvinogwezva pa nyika, kuti zviite zvizinji pa nyika, zvibarane no kuwanda.”
18 Nowa wakabuda no mukaji wake, no vana vake no nyamwana jake.*
19 Zvisikwa zvese zvinopona, zvinyama zvinogwezva, zvisikwa zvese zvinomburuka no zvese zvinofamba pasi pano, zvakabuda mu arka mukuzwirana no mukhaindi wazvo.
20 Ngo kudaro, Nowa wakavakira Jehovha artari, wotora zvinyama zvinganani zvakacena no zvisikwa zvinomburuka zvinganani zvakacena, woita zvipo zvo kupiswa pa artari.
21 Jehovha wakatanga kuzwa munuhi unodakajisa.* Jehovha wakananga kudari mu mwoyo mwake: “Andicatukizve mavhu ngo ndava yo mundhu, ngokuti murangariro wake wakashata kuvhira mu udoko hwake. Andicaparajizve zviro zvese zvinopona inga zvondakaita.
22 Kuvhira wari nyika inozova no mukuvo wo kusima no kukotora, kutondhora no kupisa, cirimo* no cipepo, usiku no masikati.”
Masoko o Pasi
^ Gama ngo Gama: “wakaceukija.”
^ Kana: “vakajimwana vako.”
^ Kana: “vakajimwana vake.”
^ Gama ngo Gama: “unozoroja.”
^ Kana: “mayanga.”
