Isaya 1:1-31
1 Civoniso cakava na Isaya* mwana wa Amozi ngo pamusoro po Judha no Jerusarema mu njiku ja Uziya, Jotami, Akazi na Ezekiya majimambo o Judha nga ici:
2 Izwanyi imwimwi matenga, nasai kuteya njeve iwewe nyika,Ngokuti Jehovha wakananga kudari:
“Ndakarera no kupangira vana,Asi ivona vakandipandukira.
3 N’gombe inonasa kuziva mune wayo,Mbongoyo inoziva ndau inohira zvinyama zvo mune wayo;Asi Vaiziraeri avandizivi,Vandhu vangu avazwisisi.”
4 Nyathwa ku jinja rinoshaisha,Vandhu vakazara ngo kuposa,Mubarihwana wo vashaishi, vana vanoita zvakashata!
Vakasiya Jehovha;Avazivi kureremeja Mucena wo Iziraeri;Vakamufuratira.
5 Munodazve kutakwa papi zvecivoneka kuti muri kuenderera mberi mecipanduka?
Musoro uri kuphanda,Mwoyo uri kuhwajihwa.
6 Kuvhira kumusoro mbhera pasi po soka, apana pacizivi kukhuvazika.
Pano zvivonje, muzvimbiri no mapandwa.Azvizivi kuraphwa, kubhandicwa nee azvizivi kupfaviswa ngo mafuta.
7 Nyika yenyu yaita mathere.
Madhorobha enyu apera kupiswa ngo muriro.
Vonyikanja vari kuparaja nyika pamberi penyu.
Yaita inga nyika yaparajwa ngo vavengi.
8 Mwana wokaji wo Ziyoni wasiiwa inga dumba riri mu munda wo muuvha,Inga dumba riri mu munda wo makaka,Inga dhorobha rakatendenejwa ngo vavengi.
9 Kudari Jehovha wo hondo naacizivi kutisiira vamweni vedu kuti vapone,Taizoita inga Sodhoma,Toezana no Gomora.
10 Izwanyi soko ra Jehovha, imwimwi vatongi vanobzinyirira vo Sodhoma.
Nasanyi kuteya njeve ku mupango wa Mwari wedu, imwimwi vandhu vo Gomora.
11 “Mupiro jenyu jakawanda jinoshandenyi kwandiri?” izvi ndizvona zvinonanga Jehovha.
“Andidakariri mupiro jenyu jo kupiswa jo mavhuta no jomafuta* o zvinyama zvakanasa kupunda,Andidakaririzve sangi yo zvivana zvo n’gombe zvorume,* mavhuta* no mbuji.
12 Pamunoviya pamberi pangu,Ndiyani wakamuvhunja,Kuti mucike-cike ruvanje jangu?
13 Imanyi kuviisa mupiro jo zvokuha* zvicikashandi.
Rubani hwenyu hunondisembhusa.
Kugara ko mweji mupsa, masabudu, kunasirihwa ko magungano.Ndaremba ngo musongano yamunoita yakacena pamwepo no zviito zvenyu zvomasaramuso.
14 Ndinozonda mabusso enyu o kugara ko mweji mupsa no mutambo jenyu.
Yaita inga mutoro kwandiri;Ndaremba kuicungirira.
15 Imwimwi pamunotambanuja nyara jenyu,Ndinofundurusa majiso angu kwamuri.
Pikija pamunoita mukumbiro jakawanda,Inini andijizwi,Ngokuti nyara jenyu jakazara ngo sangi.
16 Sambanyi, jicenesenyi;Vhisanyi mabasa enyu akashata pamberi pangu;Imanyi kuita zvakashata.
17 Jijanyi kuita zvakanaka, psakanyi ururami,Pangiranyi vanobzinyirira,Itiranyi ndherera zvakarungama,Imiriranyi shwiro jo noni.”
18 “Viyanyi, titonge shwiro iri pakati pedu,” izvi ndizvona zvinonanga Jehovha.
“Pikija zvishaishi zvenyu zvakapsukirikira,Zvinozocena inga cando;Pikija zvakapsuka inga sangi,Zvinozocena inga nguvo yokucena.
19 Kudari mukava no cido, mopurukira,Munozoha zviro zvakanaka zvo nyika iyi.
20 Asi kudari imwimwi mukaramba mopanduka,Munozopejwa ngo banga,Ngokuti Jehovha ndiyena wakazvinanga izvi.”
21 Dhorobha rainga rakagondeka, raahure!
Irona rainga rakazara ngo ururami;Urungami hwainga mukati mwaro,Asi wari rinogara vaurai.
22 Sirivha yako yaezana no musanga,Serevheja* yako yavhenganijwa no kumwa.
23 Vatongi vako vakavoma musoro, ivona ishamwari jo mambavha.
Umwe na umwe wavo anoda kudyekehwa, anodakarirazve zvipo.
Avatongi ndava jo ndherera ngo njira yakarurama,Ndava jo noni ajigumi kwavari.
24 Ngo kudaro, Mambo wo cokwadi Jehovha wo hondo,Uwo ano Simba wo Iziraeri anonanga kudari:
“Zvakwana! Ndinozohwirijira vavengi vangu,Ndozopanicazve vavengi vangu.
25 Ndinozokuhwisa ngo nyara yangu,Ndinozovhisa svina iri pauri inga zvinoizwa ngo sabau,Ndinozovhisa zvese zvicizivi kucena pauri.
26 Ndinozohwirija vatongi vako inga zvavainga pakutangaNdozohwirija vapangiri vako inga zvavainga pakutanga.
Perapo, iwewe unozodaninjwa Dhorobha ro Ururami, Dhorobha Rakagondeka.
27 Ziyoni rinozoponeswa ngo ururami,Vaya vanozohwirira kwariri vanozoponeswa ngo urungami.
28 Vapanduki no vashaishi vanozoparajwa pamwepo,Vaya vanosiya Jehovha vanozopejwa.
29 Ngokuti vaya vaida muti mukuru jamaida vanozonyowejeka,Imwimwi munozonyowejeka ngo ndava yo munda* jamakakheta.
30 Imwimwi munozoita inga muti mukuru uno masakani ari kufota,Inga munda ucina kumwa.
31 Mundhu wakavanga anozoita inga maushwa.Mabasa ake inga muriro uri kuputika-putika.Vese vanozopsa pamwepoPacina mundhu anoujima.”
Masoko o Pasi
^ Zvinoreva: “Ruponeso hwa Jehovha.”
^ Kana: “jomabembhe.”
^ Kana: “thoyo, buru.”
^ Kana: “magundata.”
^ Kana: “mucece jicikashandi.”
^ Kana: “Serevheja yo tirigu.”
^ Panonangira muti no munda jaishandiswa pa kunamata zvithombe.
