Isaya 12:1-6
12 Pa njiku yondhoyo, zvokadi iwewe unozonanga kudari:
“Ndinomubonganyi, imwimwi Jehovha,Ngokuti pikija mainga makanyangajwa na inini,Ushungu hwenyu hwakapera, imwimwi mondipendejera.
2 Izwanyi! Mwari muponesi wangu.
Ndinogonda iyena, andizothyizve;Ngokuti Jehovha,* Jehovha ndiyena simba rangu, ndiyena anondijivirira,Ngokuti iyena wakava muponesi wangu.”
3 Muno mudakaro, munozocera kumwaPa dima* ro ruponeso.
4 Pa njiku yondhoyo, imwimwi munozonanga kudari:
Bonganyi Jehovha, daninjanyi zina rake,Zivisanyi mabasa ake pakati po majinja!
Zivisanyi kuti zina rake rakakura maningi.
5 Imbiranyi ndumbo jo kukuja Jehovha, ngokuti iyena waita zviro zvinoshamaisa.
Zviro izvi, ngazviziviswe pasi pese.
6 Khuwanyi ngo kudakara, tambanyi vagari vo Ziyoni,Ngokuti Mucena wo Vaiziraeri uwo ari pakati pako, mukuru.”
