Isaya 13:1-22
13 Masoko o rutongeso kuitira Bhabhironi, akavoniwa mu civoniso ndi Isaya mwana wa Amozi nga aya:
2 Musanyi citatijo pa dundhu rino mapuwe ari pambhene.
Vadaninjirenyi mecivamusira nyara,Kuti vanghwine ngo musuvo jo vandhu vanoreremejwa.
3 Ndakavhunja zvokuita vaya vandakagaja.
Ndakadaninja masoca angu ano simba kuti akhombije ushungu hwangu,Ivona vanodakara vecizvikuja.
4 Izwanyi! Cikwata cikuru co vandhu ciri mu matundhu;Bope raco rakaezana no bope ro vandhu vakawanda!
Izwanyi! Bope ro umambo,Ro majinja akaungana!
Jehovha wo hondo ari kuunganija masoca ake kuti aende ku hondo.
5 Jehovha no nvuti jo ushungu hwakeVari kuvha ku nyika yo ndhambo,Kunogumira matenga,Kuti vaparaje nyika.
6 Cumbanyi, ngokuti njiku ya Jehovha yaaphedo!
Inozoviya inga kuparaja kunovha ku wo Masimba Ese.
7 Ngo kudaro, nyara jo vandhu vese jinozoremba,Mwoyo jo vanarume vese jinozopera simba.
8 Vandhu vari kuthya.
Ivona vari kukotama vecihwajihwa,Inga mwanakaji ari kuda kubara.
Vanosotana vecithya,Kumeso kwavo kwakazvimba ngo kuhwajihwa.
9 Vonanyi! Njiku ya Jehovha iri kuguma,Iyona yakashata, yakacamwa, ino ushungu hunobwaka,Kuti iite kuti nyika iyi, ive ciro cinothyisa,Kuti ipeje vandhu vakashata pa nyika.
10 Ngokuti ndhondho jo kumatenga no ma Khesiri* ajoAjizovheneki;Zuva rinozosvipa parinozobuda,Mweji auzovheneki.
11 Ndinozotonga nyika ngo ndava yo zviro zvayo zvakashata,Ndinozotonga vandhu vanoita zvakashata ngo ndava yo kuposa kwavo.
Ndinozopeja kuzvikuja ko vandhu vanodada,Ndozododokesa kuzvikukumuja ko vabzinyiriri.
12 Ndinozoita kuti vandhu vave vashoma kupinda goridhi rakaperera,Ndozoitazve kuti vandhu vave vashoma kupinda goridhi ro ku Ofiri.
13 Ngo kudaro, ndinozotetemeresa matenga,Nyika inozozungunyiswa yozobuda pa ndau payoPamberi po kucamwa kwa Jehovha wo hondo, pa njiku yo ushungu hwake hunobwaka.
14 Inga shoma iri kuteverehwa pamwepo no mushambi ucina mundhu anounganija,Umwe na umwe anozohwirira ku vandhu vake;Umwe na umwe anozotizira ku nyika yake.
15 Wiya anozowanika anozobaiwa,Wiya anozobatwa anozourawa ngo banga.
16 Vana vavo vanozoguhwa ngo pakati vecizvivona,Nyumba javo jinozotohwa,Vakaji vavo vanozojipwa.
17 Ndiri kuvatumira Vamedhiya,Avo vanovona sirivha inga icikashandi ciroIvona avadakaririzve goridhi.
18 Mupasha javo jinozopeja majahaIvona avazoitiri pena vana vateteNee usizi ku vana vadoko.
19 Bhabhironi, umambo unokujwa maningi kupinda umweni wese,Kuseja no kudada ko Vakaradhiya,Rinozoita inga madhorobha o Sodhoma no Gomora paakaparajwa ndi Mwari.
20 Aricazogahwizve,Nee arizovi ndau yo kugara ko mubarihwana no mubarihwana.
Apana Muarabhiya anozodira tende yake mondhomo,Vahavisi avazotori zvifuyo zvavo kuti zviende koozororera mondhomo.
21 Zvinyama zvo muzvipare zvinozovatiremo;Nyumba javo jinozozara ngo mazizi.
Mondhomo munozogara ice,*Mbuji jo musora jinozotambiremo.
22 Zvinyama zvinozobhongera mu rusingo jaro,Imbhwa jo musora jinozoukurira mu nyumba javo jakaseja.
Nguva yaro yaaphedo, njiku jaro ajizoengejehwi.”
Masoko o Pasi
^ Kangaije zviri kunangira cikwata co ndhondho cinodaninjwa kuti Oriyoni no cikwata co ndhondho jimweni jakajitendeneja.
^ Kana: “gundhya.” Uwu imushovo wo shiri yakakura icikakoni kumburuka.
