Isaya 14:1-32
14 Ngokuti Jehovha anozoitira usizi Jakobe, ozosanazve Iziraeri. Iyena anozoita kuti ivona vagarezve mu nyika yavo, vagari vo nyikanja vanozoenda kwavari vozobatana na ivona pa nyumba ya Jakobe.
2 Vandhu vanozovatora vovahwirija pa ndau yavo, Vaiziraeri vanozoita kuti vandhu vondhovo vave vashandi vokaji no vashandi vorume mu nyika ya Jehovha. Vese vaivaita varanda vanozovavo varanda, vese vaivavangirija kuti vashande, vanozovangirijwavo ndivona.
3 Pa njiku ya Jehovha yaanozokuzoroja pa kuhwajihwa kwako, pa kuvhiringijwa kwako no pauranda hwako hwakavanga hwawakavangirijwa,
4 iwewe unozobhuya masoko okushora mambo wo Bhabhironi, weciti:
“Wiya waivangirija vamweni kuti vashande waguma kumagumo!
Ubzinyiriri hwazopera!
5 Jehovha wagura mushakwe wo vashati,Ndonga yo magovhernadhori,
6 Wiya waitaka vandhu akacamwa ngo zvibhakera zvicikaperi,Wiya wainyisa majinja akacamwa, ecimateverera pacina mundhu waimupinga.
7 Wari nyika yese yakazorora, icina anoinesa.
Vandhu vari kumima ngo mudakaro.
8 Pikija muti jo junipa jiri kudakara ngo ndava yako,Kubatanijavo no muti jo sedhro jo Rebhanoni.
Jeciti: ‘Kuvhira pawakawa,Akuna mutemi wo huni ari kuviya kuzotitema.’
9 Pikija Guva* riri pasi, ranyanduhwaKuti risongane newe paunozoviya.
Ngo ndava yako, irona rinomusa vandhu vacina simba vari mu rufu,Vatungamiriri vese vo panyika vanobzinyirira.
Irona rinoita kuti majimambo ese o majinja amuke pa zvigaro zvawo zvo umambo.
10 Ese ari kukuvhunja kudari,‘Iwewevo aucina simba inga ndisu here?
Waezana na itusu.
11 Kuzvikuja kwako kwakhandihwa mu Guva,*Kubatanijavo zvinorijwa zvako ngo shinda.
Pasi pako pawajwa kama yo honye,Zvokufuka zvako ihonye.’
12 Wawa kuvha kudenga,Iwewe ndhondho inovheneka, mwana wo maamba kueja.
Wawiswa pasi,Iwewe wainyisaya majinja!
13 Iwewe wakati mu mwoyo mako, ‘ndinozokhwira kumatenga.
Ndinozokhwija cigaro cangu co umambo panyezuru po ndhondho ja Mwari,Ndinozogara pa dundhu ro musonganoKu mativi ari ndhambo maningi o kanjikazi.
14 Ndinozokhwira panyezuru po makwiti;Ndinozoezana no Mukuru-Kuru.’
15 Asi iwewe unozokhandihwa mu Guva,*Pasi pakajikisisa po rindi.
16 Vaya vanozomuvona vanozoenderera mberi vecimusotesesa;Ivona vanozomusotesesa ngo phedo vonanga kudari,‘Uwu andiyepi mwanarume waizungunyisaya nyika,Ecitetemeresa umambo?
17 Wiya wakaita kuti nyika ive cipareNo kupeja madhorobha ayo,Iyena aacaitenderepi kuti vandhu vake vakasungwa vahwirire kanyi.’
18 Majimambo amweni ese o majinja,Hina, ese kamare akavata mu rukujo hwao,Umwe na umwe mu guva* rake.
19 Asi iwewe wakhandihwa kunja kucina guva,Inga davi ricikadiki,Wakafukijwa ngo vandhu vakafa vakabaiwa ngo banga,Vanodihwa mu rindi ro mapuwe,Inga mutembo* unocikwa-cikwa.
20 Iwewe auzovi mu guva rimwero na ivona,Ngokuti wakaparaja nyika yako kamare,Wouraya vandhu vako.
Zina ro mubarihwana wo vandhu vakashata narini arizodaninjwizve.
21 Nasiriranyi ndau yokuuraira vandhu vakeNgo ndava yo zvishaishi zvo majicekuru avo,Kuti vatame kumuka votora nyikaNo kuzaja nyika yese ngo madhorobha avo.”
22 “Ndinozovahwisa,” izvi ndizvona zvinonanga Jehovha wo hondo.
“Ndinozopeja mu Bhabhironi zina rake, vakasara vake, mubarihwana wake no vana vake,” izvi ndizvona zvinonanga Jehovha.
23 “Ndinozoriita ndau inogara zvinungu no mutundhu ino makandhwa ano kumwa yakavora, ndinozoripsaira ngo mupsairo unoparaja,” izvi ndizvona zvinonanga Jehovha wo hondo.
24 Jehovha wo hondo wakapika eciti:
Zvinozoitika ngo manera o ndakaronga,Zvandakasunga zvinozokwanirisika,
25 Ndinozopeja Muasiriya mu nyika yangu,Ndinozomucika-cika mu matundhu angu
Kanga yake inozovhiswa panyezuru po vandhu vanguMuthwaro wake unozovhiswa pamapfuji* avo.”
26 Izvi ndizvona zvakarongwa kuitira kuhwisa nyika yese,Iyi ndiyona nyara yakatambanujwa kuitira kuhwisa majinja ese.
27 Ngokuti Jehovha wo hondo wakasunga kuti izvi zviitike kudaro,Waro ndiyani angamuphinga kuti izvi zvitame kuitika?
Nyara yake ikatambanujwa,Ndiyani angaihwirija sure?
28 Gore rakafa mambo Akazi, kwakaziviswa masoko aya:
29 “Vafiristiya, mucadakara basi,Ngokuti mushakwe wa wiya waaimuhwisa waguhwa.
Ngokuti pa muji* wo nyoka panozobuda buura,Mwana waro, anozova buura rinomburuka.
30 Matangwe o vandhu vakaderera anozova no zvokuhaVarombo vanozogara vakangwaririka,Asi inini ndinozouraya muji wako ngo njara,Vanosara vako vanozourawa.
31 Musuvo, cumbai! Dhorobha, cemai!
Firistiya, vagari vako vese vanozopera simba!
Ngokuti kuno usi uri kuvha kanjikazi,Ngokuti apana musoca ari kubuda pandau yake.”
32 Ndhumwa jo majinja jinozodavihwenyi?
Kuti Jehovha wadira maambo o Ziyoni,Vandhu vake vakaderera vanozotiziremo.
Masoko o Pasi
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Gama ngo Gama: “mu nyumba yake.”
^ Muviri wo mundhu wakafa.
^ Vonanyi Kudurujihwa ko Magama.
^ Kana: “mubarihwana.”
