Isaya 19:1-25
19 Masoko o rutongeso kuitira Ejipita:
Izwanyi! Jehovha ari pamakwiti anogogoma ecinghwina mu Ejipita.
Zvimwari zvo Ejipita zvicikashandi zviri kutetemera pamberi pake,Mwoyo yo Vaejipita yapera simba.
2 Ndinozokukumijira Vaejipita kuti vatakane no Vaejipita doni,Ivona vanozotakana umwe no umweni,Umwe anozotaka hama yake no wocigarisano wake.Dhorobha rotakana no dhorobha rimweni, umambo wotakana no umambo umweni.
3 Ejipita inozopera simba,Ndinozoita kuti mazano ayo atame kubudirira.
Ivona vanozoenda ku zvimwari zvicikabesi ciro,Ku vandhu vanoita zvomasaramuso, ku vandhu vanodaninja mujimu no vandhu vanoita zvokufembera.
4 Ndinozodira Ejipita mu nyara jo mundhu anoita zvakashata,Mambo acikaregereri anozovatonga,” izvi ndizvona zvinonanga Mambo wo cokwadi, Jehovha wo hondo.
5 Kumwa yo mu jombe inozovoma,Murambo unozopera kumwa wozovoma.
6 Murambo jinozonuha maningi;Mugere jo Niro jo Kuejipita jinozophwa jovoma.
Njanga* no ndhokwe zvinozovora.
7 Zviro zvakamera mumbhiripiri mo Murambo wo Niro, panobudira murambo wa Niro zvinozovoma,Ndau yese yakasimwa mbeu phedo no Murambo wo Niro, inozovoma.
Zvese zvinozotohwa ngo mbhepo azvizowanikizve.
8 Vabati vo hove vanozocema,Vaya vanokhandira zvivejo mu Murambo wo Niro, vanozocumba,Vanowaja majuya mukumwa vanozosara vashoma.
9 Vaya vanoita nguvo ngo uruji,Na vaya vanosona nguvo jokucena, vanozopserujwa.
10 Vasoni vavo vanozopejwa;Vashandi vese vanozohwajihwa.
11 Vatungamiriri vo Zowani imapenji.
Vapangiri vanoziva maningi va Faro, vanopa mbhangiro jicikashandi.
Munganangisa kudini kuna Faro kudari:
“Ndiri mubarihwana wo vazivi,Ndiri mubarihwana wo majimambo okare”?
12 Waro, vari kwapi vazivi vako?
Kudari vecizviziva, ngavakuvhunje zvasungwa ndi Jehovha wo hondo ngo pamusoro po Ejipita.
13 Vatungamiriri wo Zowani vakaita zvoupenji;Vatungamiriri vo Nofi* vakacengejwa;Madhodha o mavhumbo avo akacengeja Ejipita.
14 Jehovha wadururira ku Ejipita mujimu wo kubararisa hwiru;Vatungamiriri vo Ejipita vanocengeja Vaejipitevo ngo zvese zvavanoita,Inga cidhakwa cinothetherekera pamaruco aco.
15 Ejipita aizovi no basa riri rese rokuita,Ringava basa rinoithwa ngo musoro kana ngo mushe, ngo thobwe kana ngo sora rakareba.
16 Pa njiku yondhoyo, Vaejipita vanozoita inga vanakaji, vanozotetemera vozogara vecithya ngo ndava yo nyara inothyisa ya Jehovha wo hondo yaanozovatambanujira.
17 Nyika yo Judha inozova ciro cinothyisa co Ejipita. Pavanozozwa mabhuyo ngo pamusoro payo, Vaejipita vanozothya ngo ndava yo zviro zvakasungwa ndi Jehovha wo hondo ngo pamusoro pavo.
18 Pa njiku yondhoyo, kunozova no madhorobha mashanu o nyika yo Ejipita anozobhuya ndumi yo Khanani, vanozopika kushandira Jehovha wo hondo vakagondeka. Dhorobha rimwe rinozodaninjwa kuti Dhorobha Rinowisa.
19 Pa njiku yondhoyo, pakati po nyika yo Ejipita, panozova no artari ya Jehovha, kumugano kwavo kunozova no njiki ya Jehovha.
20 Iyona inozoshanda inga citatijo no ucapupu ngo pamusoro pa Jehovha wo hondo mu nyika yo Ejipita. Ngokuti ivona vanozocemera Jehovha ngo ndava yo vabzinyiriri. Iyena anozotumira muponesi mukuru, anozovaponesa.
21 Jehovha anozozivika ngo Vaejipita. Vaejipita vanozoziva Jehovha pa njiku yondhoyo, ivona vanozomuitira mupiro, vozomupa zvipo. Vanozoitira mbhiko Jehovha, vozoikwanirisa.
22 Jehovha anozotaka Ejipita, iyena anozoitaka no kuirapa; Vaejipita vanozohwirira kuna Jehovha, iyena anozozwa kudeketera kwavo ovarapa.
23 Pa njiku yondhoyo, panozova no citaka cinovha Ejipita cecienda Asiriya. Ngo kudaro, Vaasiriya vanozoenda Ejipita, Vaejipita vanozoenda Asiriya. Vaejipita vanozoshandira Mwari pamwepo no Vaasiriya.
24 Pa njiku yondhoyo, Iziraeri inozova yocitatu yakabatana no Ejipita no Asiriya, yova makomborero pakati po nyika.
25 Ngokuti Jehovha wo hondo anonga avakomborera ecinanga kudari: “Ngavakomborehwe Vaejipita vandhu vangu. Ngaakomborehwe Asiriya basa ro nyara jangu no ndhaka yangu Iziraeri.”
