Isaya 23:1-18
-
Masoko o rutongeso kuitira Tiro (1-18)
23 Masoko o rutongeso ngo pamusoro po Tiro:
Cumbanyi, imwimwi piketi jo Tarishishi!
Ngokuti pa ndau panocevehwa, paphwanyiwa, azvicakwanisiki kupacevera.
Izvi zvakaziviswa pamainga mu nyika yo Kitimi.
2 Nyararanyi, imwimwi vagari vo mumbhiripiri mo jombe.
Vatengesi vo Sidhoni vanoambuka jombe, vakamuganyisa.*
3 Mucece wo Shihori* wakaenda uri panyezuru po kumwa yakawanda,Pamwepo no kukotora ko Niro, iri pfuma yo Tiro,Vakaviisira majinja upfumi hwakawanda.
4 Iwewe Sidhoni wakatendenejwa ngo jombe, pserukai,Ngokuti jombe riri kunanga kudari:
Andizivi kumbohwajihwa ngo kubara, nee andizivi kumbobara,Andizivi kumborera vana vorume nee kupangira vana vokaji.*
5 Vandhu vanozohwajihwa pavanozozwa masoko ngo pamusoro po Tiro,Inga zvakaitika vandhu pavakazwa masoko ngo pamusoro po Ejipita.
6 Ambukanyi jombe muende ku Tarishishi!
Cumbanyi, imwimwi vagari vo mumbhiripiri mo jombe!
7 Iri ndirona dhorobha raingaya rakazara ngo mudakaro kuvhira kare, mu nguva jo kutanga kamare?
Soka jaro jakariendesa mu nyika iri ndhambo kuti roogareyo.
8 Ndiyanyi wakaimisira zviro izvi Tiro?Wiya waipa korowa,Wiya wainga no vatengesi vainga majimambo,Wiya wainga no vatengesi vaireremejwa pasi pese?
9 Ndi Jehovha wo hondo wakaimisira zviro izvi,Kuti atuke kuzvikuja kwake ngo ndava yo kuseja kwake,Kuti adodokese vese vaireremejwa pasi pese.
10 Ambukai nyika yako inga Murambo wa Niro, iwewe mwana wokaji wo Tarishishi.
Ngokuti apacina ndau yo* piketi.
11 Iyena wakatambanujira nyara yake mu jombe;Wakazungunyisa majimambo.
Jehovha wakananga kuti ndau jakavanga jo Finisiya, jinodikana kuphwanywa.
12 Iyena wakati: “Iwewe auzodakarizve,Iwewe mwana wokaji anobzinyirihwa, mbhandwe yo Sidhoni.
Mukai, ambukai jombe uende Kitimi.
Pikija kondhoyo, auzowani ndau yokuzorora.”
13 Vonai! Nyika yo Vakaradhiya.
Ndivona vandhu vakona, haiwa Asiriya.Vakaicinja kuti ive ndau inoponera zvinyama zvo mucipare.
Ivona vakamusa rusingo jo hondo;Vosiya rusingo javo jakavangiswa jiri pambhene,Vojiita mathere.
14 Cumbanyi, imwimwi piketi jo TarishishiNgokuti ndau yenyu yakavangiswa yaphwanyiwa.
15 Pa njiku yondhoyo, Tiro inozokanganiwa ko makumanomwe o makore, makore anopona mambo umwe basi. Pasure po makumanomwe o makore, Tiro inozoezana no ndumbo inoimbiwa ngo hure yeciti:
16 “Torai cimadangari, tendererai dhorobha iwewe hure yakakanganiwa.
Nasai kurija cimadangari cako;Imbai ndumbo zinji,Kuti ivona vatame kukukanganwa.”
17 Pasure po makumanomwe o makore, Jehovha anozorangarira ngo pamusoro po Tiro. Iyona inozohwirira ku mabasa ayo, yohura no majimambo ese o nyika anogara pasi pano.
18 Asi upfumi hwayo no mupocero wayo zvinozoita zviro zvakacena kuna Jehovha. Azvizounganijwi nee kuvigwa ngokuti mupocero wayo unozoenda kuna vaya vanogara pamberi pa Jehovha. Kuti vahe mbhera vagute, no kusimira nguvo jakaseja.
Masoko o Pasi
^ Kana: “vakamukhupusa.”
^ Zvinoreva: “mugere wo murambo wa Niro.”
^ Gama ngo Gama: “mbhandwe.”
^ Kangaije: “yokucevera.”
