Isaya 27:1-13
27 Pa njiku yondhoyo, Jehovha anozoshandisa banga rake guru, rinopinja, rino simba,Kuti atonge Revhiyatani,* nyoka ino gombama-gombama,Revhiyatani, nyoka inogwezva,No kuuraya zinyama ziguru riri mu jombe.
2 Imbiranyi mwanakaji* uu pa njiku yondhoyo meciti:
“Munda wo muuvha unobara uvha jinoita vhinyu inopupira!*
3 Inini Jehovha, ndiri kumungwarira.
Ndinomudurujira nguva yese.
Ndinomungwarira usiku no masikati,Kuti patame ari wese anomukhuvaza.
4 Andizivi kunyangajwa.
Ndiyani anozoviya pamberi pangu no muti ino muzwa no sora kuti andihwise pa hondo?
Ndinozovacika-cika no kuvapisa pamwepo.
5 Kusiyapo izvi, ngaatizire mu ndau yangu yo kufindara.
Ngaaite runyararo na inini;Iyena ngaaite runyararo na inini.”
6 Mu njiku jinozoza Jakobe anozocira muji,Iziraeri inozokura, yozobara matavi mapsa,Ivona vanozozaja nyika ngo mucero.
7 Kureva kuti iyena anodikana kutakwa ngo mushakwe wa wiya ari kumutaka?
Kureva kuti iyena anodikana kuurawa inga mauraihwe akaithwa vandhu vake vakafa?
8 Imwimwi munozotonga jinja iri, mozorigogomera ngo kukhuwa kunothyisa.
Iyena anozovagogomera ngo kufurija kwake kunothyisa pa njiku yo mbhepo yo kumavhazuva.
9 Ngo kudaro, cishaishi ca Jakobe cinozopfujuhwa,Cishaishi cake cikazovhiswa, muviyo wakona unozova uwu:
Iyena anozoita kuti mapuwe ese o pa artariAgare inga mapuwe o cinambo akaceneswa,*Apazosari no njiki imwe hayo yakaceneswa nee artari yo rubani.
10 Ngokuti dhorobha rakavangiswa rinozosara ricina mundhu;Mahavo anozokanganika osara inga cipare.
Mondhomo, mwana o n’gombe* anozohava no kuvatemoAnozoha masakani o muti o mudhorobhemo.
11 Zvimatavi zvawo zvikavoma,Vanozoviya vanakaji vozvigura-gura,Vobwakija ndizvona muriro.
Ngokuti vandhu ava avazwisisi.
Ndizvona zvinoitisa kuti wiya wakavaita atame kuvakhombijira usizi,Wiya wakavasika atame kuvakhombijira unyasha.
12 Pa njikuyo, Jehovha anozozuza mucero kuvhira ku mugere yo murambo Eufrate mbhera ku Mugere* yo Ejipita. Imwimwi Vaiziraeri munozobatanijwa mwese.
13 Mu njikuyo, kunozorijwa mbayapaya huru. Vaya vanonga vakandhandhanika mu nyika yo Asiriya na vaya vanonga vakandhandhanika mu nyika yo Ejipita, vanozoviya vogwadama pamberi pa Jehovha pa dundhu rakacena mu Jerusarema.
Masoko o Pasi
^ Vonanyi Kudurujihwa ko Magama.
^ Zvinovoneka kuti jinja ro Iziraeri ndirona riri kunangihwari apa, rinobhuiwa inga mwanakaji, reciezaniswa no munda wo muuvha.
^ Kana: “inofufumira.”
^ Vonanyi Kudurujuhwa ko Magama.
^ Kana: “thoyo, buru.”
^ Kana: “Uwadhi.” Vonanyi Kudurujihwa ko Magama.
