Isaya 3:1-26
3 Vonanyi! Mambo wo cokwadi Jehovha wo hondo,Anozovhisa mu Jerusarema no mu Judha zviro zvese zvinovabesera no zvavari kuwana,Zvokuha zvese no kumwa,
2 Anozovhisavo mwanarume ano simba no musoca,Mutongi no muporofeti, mufemberi no dhodha,
3 Mutungamiriri wo makumashanu o vandhu, govhernadhori, mupangiri,Shasha yo kuita masaramuso no muroi.
4 Ndinozoita kuti varimbhwane vave vatungamiriri vavo,Vandhu vacina hwiru vanozovatonga.
5 Vandhu vanozobzinyirirana ngocavo,Umwe no mudoni wake.
Mujaha anozohwisa harahwa,Mundhu anoshohwa anozonesa mundhu anoreremejwa.
6 Umwe na umwe anozobata hama yake pamuzi pa baba wake onanga kudari:
“Iwewe uno ciro cokufuka. Waro ivai mutongi wedu.
Tungamirirai dundhu iri raamathere wari.”
7 Asi iyena anozodavira kudari pa njiku yondhoyo:
“Andizobhandici* zvivonje zvenyu;Andina zvokuha nee nguvo kumuzi kwangu.
Mucandigaja kuti ndive mutungamiriri wo vandhu.”
8 Jerusarema yakhugunyika,Judha rawa,Ngokuti vanohwisa Jehovha ngo magama no zviito;Ivona vanopanduka pamberi po rukujo hwake.
9 Kumeso kwavo kunovaitira ucapupu,Ivona vanozivisa cishaishi cavo inga vandhu vo Sodhoma;Avavigi zvishaishi zvavo.
Nyathwa kwavari, ngokuti vari kujiviisira dambujiko!
10 Vhunjanyi varurami kuti zvese zvinozovafambira ushoni,Ivona vanozokomborehwa ngo zvavanoita.*
11 Nyathwa ku vashaishi!
Dambujiko rinozovawira,Ngokuti vanozoitihwavo zvavakaita ngo nyara javo!
12 Vandhu vangu vari kutambujwa nga vaya vanovashandisa,Vanakaji ndivona vanovatonga.
Imwimwi vandhu vangu, vatungamiriri venyu vari kumuhereresa,Vomuita kuti muende mu gwanja riciripi irona.
13 Jehovha ari kwenda pa ndau yake kuti ape ndava vandhu;Ari kumuka kuti atonge majinja.
14 Jehovha anozotonga madhodha no vatungamiriri vo vandhu vake.
“Imwimwi makapisa munda wo muuvha,Zviro zvamakabira varombo zviri mu nyumba jenyu.
15 Macunga here kupeja vandhu vanguNo kukwiya-kwiya kumeso ko varombo mu bukuta?” izvi ndizvona zvinonanga Mambo Mukuru-kuru Jehovha wo hondo.
16 Jehovha anoti: “Ngokuti vana vokaji vo Ziyoni vanozozvikuja,Vanofamba vakamusa musoro,Vanofamba padoko-padoko, vecivhinyira* vanarume majiso avo,Vanoririsa usanga uri mu makumbo avo,
17 Jehovha anozoita kuti musoro jo vana vokaji vo Ziyoni jizare ngo cigwembe,*Jehovha anozosiya huma javo pambhene.
18 Pa njiku yondhoyo, Jehovha anozovhisa zvese zvinovasejesaUsanga wo makumbo, maganshu o musoro no zviro zvokusejesa zvakaita inga mweji,
19 Mabiriku, mapurusera, mavheu,
20 Zvokusunga nazvo musoro, zvokusunga nazvo makumbo, kurupeti,Mabotiri o mafuta anonuhira, korari,*
21 Aneri, biriku jo pamiro,
22 Nguvo yo mutengo mukuru, zvokufuka, mabhurangeti, mapasta,
23 Supeya jo munyara, tunika,Madhuku,* no mavheu.
24 Pa ndau yo mafuta o bharsamo, panozonuha maningi,Pa ndau yo bhande, panozova no bote;Pa ndau po vhuji rakanasa kuvhukuzwa, panozova no mbhanja;Pa ndau yo nguvo yakanaka, panozova no mapendera o saku;Pa ndau po kuseja, panozova no cidhindo cino simbi inopisa.
25 Vandhu vako vanozourawa ngo bangaVandhu vano simba vanozofira ku hondo.
26 Musuvo jake jinozocema* jecihwajihwa,Iyena anozogara pasi acina ciro.”
Masoko o Pasi
^ Kana: “Andizovi medhiko wenyu.”
^ Gama ngo Gama: “vanozoha mucero yo mabasa avo.”
^ Kana: “vecicwanyira, vecipfinyira.”
^ Kana: “makhiridoza.”
^ Kana: “”mudhariya.”
^ Kana: “maturbhanti.”
^ Kana: “jinozorira.”
