Isaya 33:1-24
33 Uno nyathwa iwewe unourayaro vamweni, ngokuti auzivi kuurawa;Iwewe mucengeji, ngokuti auzivi kucengejwa!
Paunozopeja kuuraya, iwewe unozourawavo.
Paunozopeja kucengeja, iwewe unozocengejwavo.
2 Jehovha tiitirenyi unyasaha.
Vetero yedu ina imwimwi.
Ivanyi simba redu mangwanani ese,Hina, ivanyi ruponeso hwedu pa mukuvo wo kutambujika.
3 Vandhu vanotiza pavanozwa joweyowe.
Majinja anotiza, imwimwi pamunomuka.
4 Zviro zvenyu zvinozotohwa zvozounganijwa inga kuunganijwa ko ndere jinoha zvese jicikasiyi ciro;Vandhu vanozoenda kwazviri vakaita inga guzo ro ndere.
5 Jehovha anozokujwa,Ngokuti iyena anogara mu ndau jakakhwirira.
Iyena anozozaja mu Ziyoni ngo ururami no urungami.
6 Iyena ndiyena anokuita kuti iwewe uve wakangwaririka;Ruponeso hwakakura, uzivi, zivo no kuthya Jehovha.Uwu ndiwona upfumi hwake.
7 Izwanyi! Vanarume vake vanothyisa vari kukhuwa mugwanja;Ndhumwa jo runyararo jiri kucema maningi.
8 Zvitaka azvicafambiwi;Apacina mundhu acafamba ngo mumakwanja.
Iyena* waphwanya citenderano;Waramba madhorobha;Aana basa no mundhu ari wese.
9 Nyika iyi iri kucema no kupera.
Rebhanoni yapserujwa; yavora.
Saroni yaita inga cipare,Bhashani na Kameri zviri kuzuzika masakani azvo.
10 “Zvino wari ndinozomuka,” izvi ndizvona zvinonanga Jehovha,“Wari ndinozoita kuti ndikujwe;Wari ndinozokhombija simba rangu.
11 Imwimwi munoitisa mimba sora, mobara ushwa.
Mujimu wenyu kamare unozomupisa inga muriro.
12 Vandhu vanozoita inga ciro capiswa ngo cinambo.
Vanozopisihwa pa muriro inga muzwa yatemwa.
13 Imwimwi muri ndhambo, izwanyi zvandicaita!
Imwimwi muri phedo, tenderanyi kuti inini ndino simba!
14 Vashaishi vari mu Ziyoni vari kuthya;Vapanduki vari kutetemera ngo kuthya vecinanga kudari:
‘Ndiyani pakati pedu angaenda koogara no muriro unopisa?
Ndiyani pakati pedu angaenda koogara no murazvu icikajimi?’
15 Mundhu anoenderera mberi eciita zviro zvakarurama,Anovereketa zviro zvokadi,Anoramba kuwana zviro ngo njira yakashata no yokuba,Wiya ano nyara jinoramba kudhyekehwa kusiyapo kutendera,Wiya anofunga jeve jake kuti jitame kuzwa masoko ngo pamusoro po kuurayana,Na wiya anofunga majiso ake kuti atame kuvona zviro zvakashata.
16 Ndiyena anozogara mu ndau jakakhwirira;Ndau yake yokutizira inozova ndau yo mapuwe,Iyena anozopuwa zvokuha,Kumwa yaanozopuwa, aizoperi.”
17 Majiso enyu anozovona mambo ari mu nduma yake;Imwimwi munozovona nyika iri ndhambo.
18 Ngo mu mwoyo mwenyu imwimwi munozoceuja zviro zvaithyisaya kare mecinanga kudari:
“Ari kwapi mutari?
Mundhu waishabisaya ari kwapi?
Mundhu waiverengaya rusingo ari kwapi?”
19 Iwewe auzovonizve vandhu vacina nderemejo,Vandhu vanovereketa ndumi inonesa maningi kuzwisisa,Vano rurumi unokakamira, waucikazwisisi.
20 Vonai Ziyoni, dhorobha ro mabuso edu!
Majiso enyu anozovona Jerusarema inga ndau yokugara ino runyararo,Tende icikazovhiswi.
Mamuti ako o tende aazovhithwi,Apana bote rako rinozodajuhwa.
21 Mondhomo Jehovha uwo Mukuru,Anozoita kwatiri inga ndharaundha yo murambo, ino mugere yakakura,Icikanghwini ngarava jo hondoNee piketi jakakura, ajizopindivo ndimona.
22 Jehovha ndiyena Mutongi wedu,Jehovha ndiyena Mupi wedu wo Mutemo,Jehovha ndiyena Mambo wedu;Iyena anozotiponesa.
23 Mapote o muvengi anozothujuka;Imwimwi amuzokwanisi kusunga muringoti no kugwimba thanga.
Pa mukuvo wondhoo, panozova no zviro zvakawanda maningi zvakasara zvinodikana kupauhwa;Pikija vandhu vakaremara, vanozotoravo zviro zvakawanda.
24 Apana mugari wo nyika anozonanga kudari: “Ndiri kuhwaja.”
Vandhu vanozogaremo, vanozoregerehwa kuposa kwavo.
Masoko o Pasi
^ Zviri kunangira muvengi.
