Isaya 39:1-8
-
Vaimiriri vo Bhabhironi (1-8)
39 Mu mukuvowo, mambo wo Bhabhironi Merodhaki-bharadhani mwana wa Bharadhani wakatumira karata no cipo kuna Ezekiya, ngokuti wainga wakazwa kuti iyena wainga ecihwaja, asi wainga wavanga.
2 Ezekiya wakavaashira ngo mudakaro, wovatatija nyumba yake yo upfumi. Iyena wakavatatijazve sirivha, goridhi, mafuta o bharsamo no mafuta amweni anosisira, nyumba yake yese inovigihwa nvuti no zvese zvainga mu upfumi hwake. Ezekiya apana na cimwe caacikazivi kuvatatija mu nyumba yake pamwepo no mu umambo hwake hwese.
3 Perapo, muporofeti Isaya wakaenda kuna Mambo Ezekiya, womuvhunjisa kudari: “Vanarume ava vakanangenyi? Ivona vari kuvha kwapi?” Ezekiya wakadavira kudari: “Vari kuvha ku nyika yo ndhambo, ku Bhabhironi.”
4 Tevere, iyena wakavhunjisa kudari: “Ivona vavonenyi pa nyumba yako?” Ezekiya wakadavira kudari: “Vavona zvese zviri mu nyumba yangu. Apana na cimwe haco co upfumi hwangu candicikazivi kuvatatija.”
5 Isaya wakati kuna Ezekiya: “Izwai izwi ra Jehovha wo hondo.
6 ‘Jinozoguma njiku jokuti zviro zvese zviri mu nyumba yako, zvese zvakaunganijwa ngo majicekuru ako mbhera nyamasi, zvinozotohwa kwenda ku Bhabhironi. Akuzosari na cimwe haco,’ izvi ndizvona zvinonanga Jehovha.
7 ‘Vana vako vamweni vaunozobara vanozotohwa voitwa varanda, vozova no zvigaro pa nyumba yo umambo ya mambo wo Bhabhironi.’”
8 Ngo kudaro, Ezekiya wakadavira Isaya kudari: “Soko ra Jehovha rowanangaro, rakanaka.” Iyena wakaengejera kudari: “Ngokuti kunozova no runyararo no kugajana* pandinonga ndecipona.”*
