Isaya 42:1-25
42 Nga uwu muranda wangu wandinobesa!
Wandakasana, uwo anondidakajisa!
Ndamudira mujimu wangu;Iyena anozotonga majinja mu njira yakarurama.
2 Iyena aazokhuwi nee aazodaninjiri,Aazoiti kuti izwi rake rizike mu makwanja.
3 Aazoguri njanga yakabweshuka,Aazojimi turusida inopfukuta.
Iyena anozoviisa ururami ngo kugondeka.
4 Ruvheneko hwake ahuzoperi, simba rake arizopejwi mbhera aite kuti panyika pave no ururami;Zvirundu zviri kuenderera mberi zveciimira mutemo* wake.
5 Izvi ndizvona zvinonanga Jehovha Mwari wo cokwadi,Musiki wo matenga, uwo Mukuru wakamawaja,Iyena wakatambanuja nyika no zvese zvirimo,Iyena anopa vandhu varimo mwiha wo kufemaOpazve simba ro upenyu vaya vanofamba mukati mayo:
6 “Inini Jehovha, ndakudaninja mu ururami;Ndakakubata nyara yako.
Ndinozokungwarira no kukupekeja inga citenderano ku vandhuNdokupekejazve inga ruvheneko ku majinja,
7 Kuti ufunungure majiso o mapofu,Kuti ubudise mundhu wakafungihwa mukadheyaNo kubudisa mukadheya vaya vakagara mucidima.
8 Ndini Jehovha. Iri ndirona zina rangu;Andipekeji kukujwa kwangu ku mundhu ari wese,Nee kusimbwa kwangu ku zvithombe zvakavezwa.
9 Izwanyi, zviro zvokutanga zvakaitika;Wari ndiri kumuzivisa zviro zvipsa.
Zvicito zvaitika, inini ndinozozvizivisa kwamuri.”
10 Imbiranyi ndumbo imbza Jehovha,Muimbirenyi ndumbo jokumusimba muri kumagumo o nyika,Imwimwi munofamba mu jombe no pakati po zviro zvese zvirimo,Imwimwi zvirundu no vagari vazvo.
11 Zvipare no madhorobha azvo ngazvikhuwe,Kubatanijavo no vandhu vanogara mu Kadhari.
Ngavakhuwe ngo kudakara vagari vo mumapuwe;Ngavakhuwe vari panyezuru po matundhu.
12 Ngavakuje JehovhaNgavazivise kusimbhwa kwake ku zvirundu.
13 Jehovha anozobuda inga musoca ano simba.
Iyena anozoita inga musoca anomuka ngo simba kuti aende ku hondo.
Anozokhuwa, hina anozokhuwa mu njira inothyisa pa hondo;Iyena anozokhombija kuti ano simba maningi kupinda vavengi vake.
14 Ndakanyarara kuvhira kare.
Ndakajibata, ndotama kuvereketa.
Inga mwanakaji ari kuda kubara,Ndinogomera, ndinofemeruka no kupera mwiha pa mukuvo wondhowo.
15 Ndinozophwanya matundhu no zvimatundhuNdozovomesa zvese zvinomeremo.
Ndinozocinja murambo joita zvirunduNdozovomesa makandhwa akazara ngo njanga.
16 Ndinozofambisa mapofu mu gwanja ravacikaziviNdozovaita kuti vacike mu makwanja avacikazivi.
Ndinozoita kuti cidima cicinje coita ruvheneko pamberi pavoNdozoita kuti ndau jicizivi kuezana jo panyika jive jakaezana.
Izvi ndizvona zvandinozovaitira, andizovasii.”
17 Vaya vanothemba zvithombe zvakavezwa,Vaya vanovhunja zvithombe zvo simbi zvakanyunguruswa kudari: “Imwimwi muri zvimwari zvedu,”Vanozonyiswa, vonyowejeka maningi.
18 Izwanyi imwimwi vandhu vano mandondo;Sotanyi muvone, imwimwi mapofu.
19 Ndiyani bofu kunja ko mushandiri wangu?Ndiyani ano mandondo kamare akaezana no ndhumwa yangu yandinotuma?
Ndiyani ano upofu kamare wakaezana na wawiya wakapfupwa?Ndiyani ano upofu kamare wakaezana no wo mushandiri wa Jehovha?
20 Iwewe unovona zviro zvakawanda, asi auteyi njeve.
Njeve jako jakafununguka, asi auzwi.
21 Ngo ndava yo ururami hwake,Jehovha wakadakarira kukuja mutemo no kuuita kuti uve mukuru.
22 Asi vandhu ava vakatohwa no kubiwa;Vese vakafungihwa mu mapako no kufungihwa mu kadheya.
Vakatohwa pacina mundhu ari wese anovaponesa,Vobiwa pacina mundhu ari wese anonanga kudari: “Vahwirijenyi!”
23 Ndiyani pakati penyu anozozwa izvi?
Ndiyani anozoteya njeve ecirangarira zvamangwana?
24 Ndiyani wakaita kuti Jakobe atohwe ngo simba?Ndiyani wakaita kuti Iziraeri ibiwe ngo mbavha?
Asipi Jehovha wiya watakashaishira here?
Ivona avazivi kufamba mu makwanja ake,Nee avazivi kuzwira mutemo yake.
25 Iyena wakaenderera mberi ecidururira Iziraeri kucamwa kwake,Kunyangajwa kwake no ushungu wo hondo.
Izvona zvakapeja zviro zvese zvaizvitendeneja, asi iyena aazivi kuita ciri cese.
Zvaimupisa, asi iyena aazivi kuzvitaja.
Masoko o Pasi
^ Kana: “ndhungamiriro yake.”
