Isaya 43:1-28
43 Zvino, izvi ndizvona zvinonanga Jehovha,Musiki wako, iwewe Jakobe, na wiya wakakuumba, iwewe Iziraeri:
“Ucathya ngokuti inini ndakakuponesa.
Inini ndakakudaninja ngo zina rako.
Iwewe uri wangu.
2 Paunozopinda ngo mukumwa, inini ndinozova newe,Paunozoambuka murambo, ijona ajizokuboboji.
Iwewe paunozofamba pakati po muriro, auzovhuhwi,Nee auzopiswi ngo murazvu wakona.
3 Ngokuti inini ndini Jehovha Mwari wako,Mucena wo Iziraeri, Muponesi wako.
Ndakapa Ejipita kuti ive muponesi wako,Etiyopiya na Sebha pa ndau yako.
4 Ngokuti iwewe wakava no mutengo mukuru pamberi pangu,Iwewe wakakujwa, inini ndakakuda.
Ngo kudaro ndinozopa vandhu pa ndau yakoMajinja pa ndau yo upenyu hwako.
5 Ucathya ngokuti inini ndinewe.
Ndinozovisa mubarihwana wako kuvha kumavhazuvaNdozouunganija kuvha kumavirira.
6 Ndinozovhunja vokanjikazi kudari: ‘Vaviisenyi!’
Ndozovhunjazve vokakusi kudari: ‘Mucavajiva.
Visanyi vana vangu vorume kuvha ndhambo no vana vangu vokaji kuvha kumagumo o nyika.
7 Mundhu wese anodaninjwa ngo zina ranguWandakasikira kukujwa kwangu,Wandakaumba no wandakaita.’
8 Budisanyi vandhu vari mapofu pikija vano majiso,Na vaya vano mandondo pikija vano njeve.
9 Majinja ese ngaungane pa ndau imwe basi,Vandhu ngavaunganijwe.
Ndiyani pakati pavo angakwanisa kuzvizivisa izvi?
Ndiyani angakwanisa kutizivisa zviro zvokutanga?
Ngavavise zvapupu zvavo zvinokhombija kuti ivona vakarurama,Kana ngavazwe perapo ivona vonanga kudari: ‘Ngo zvokadi!’”
10 “Imwimwi muri zvapupu zvangu,” izvi ndizvona zvinonanga Jehovha,“Hina, mushandiri wangu wondakasana,Kuti imwimwi mundizive no kunditendaMuzwisise kuti inini ndiri umwe basi.
Sure kwangu akuzivi kuva na Mwari umweni,Kumbeji kwangu akuzivi kutevera umweni.
11 Inini ndini Jehovha, kunja kwangu akuna muponesi.”
12 “Inini ndakazivisa, ndakaponesa, ndakaita kuti zviro izvi zvizivikePa mukuwo uu pakati penyu painga pacina Mwari umweni.
Ngo kudaro, imwimwi muri zvapupu zvangu,” izvi ndizvona zvinonanga Jehovha, “Inini ndiri Mwari.
13 Kusiyapo izvo inini ndiri umwewo basi;Apana anokwanisa kunditorera ciri cese mu nyara yangu.
Pandinoita ciro, ndiyani anondiphingaija?”
14 Izvi ndizvona zvinonanga Jehovha Muponesi wako, Mucena wo Iziraeri:
“Ngo ndava yako, ndinozotumira mundhu kwenda ku Bhabhironi, ndozowisa mugogo yese yo musuvo,Vakaradhiya vanozokhuwa ngo kuhwajihwa vari mupiketi javo.
15 Inini ndini Jehovha Mucena wenyu, Musiki wo Iziraeri, Mambo wenyu.”
16 Izvi ndizvona zvinonanga Jehovha,Wiya anofunungura gwanja mu jombeGwanja pakati po kumwa inopopoma,
17 Wiya anobudisa ngoro yo hondo no haci,Cikwata co masoca no vahwi vanosimba:
“Ivona vanozowa, avazomuki.
Vanozojimwa, inga kujimwa kunoitwa turusida inobwaka.”
18 “Kanganwanyi zviro zvokare,Mucagara mecirangarira zviro zvakapera.
19 Vonanyi! Ndiri kuita ciro cipsa;Pikija wari ciro condhoco cotoitika.
Imwimwi amuripi kucivona here?
Ndiri kufunungura gwanja mu baniNo murambo mu cipare.
20 Zvinyama zvomusora, zvinozondikuja,Hina, imbhwa jo musora no ice,*Ngokuti ndinozoita kuti mubani muve no kumwa,Mucipare muve no murambo,Kuti vandhu vangu, vasanwi vangu vamwe,
21 Vandhu vandakajisikiraKuti vazivise kusimbwa kwangu.
22 Asi auzivi kundidaninja, iwewe Jakobe,Ngokuti waremba ndini, iwewe Iziraeri.
23 Iwewe auzivi kundiviisira mavhuta kuitira mupiro yokupiswaNee auzivi kundikuja ngo mupiro jako.
Andizivi kukuvangirija kuti undiviisire zvipo,Nee kukunesa ngo kukuvhunja kuti undiviisire rubani unonuhira.
24 Iwewe auzivi kunditengera karamo* ngo mare yako,Nee auzivi kundigutisa ngo mafuta o zvipo zvako.
Mukusiyana, iwewe wakandizaja ngo zvishaishi zvakoWondirembesa ngo kuposa kwako.
25 Inini ndiri wiya anopfujura zviito zvako zvokupanduka ngo ndava yangu kamare.Andizoceujizve zvishaishi zvako.
26 Ndiceujei, ngatiendese ndava yedu ku banje ro kutonga.Nangai ndava yako ukhombije kuti uno razau.
27 Cekuru wako vokutanga vakashaisha,Ndhumwa* jako kamare jakandipandukira.
28 Ngo kudaro, ndinozosvipisa vatungamiriri vo mu ndau yakacena,Ndozoita kuti Jakobe aparajweNdozoitazve kuti Iziraeri atukwe.
Masoko o Pasi
^ Kana: “gundhya.” Iyi ndi mushovo wo shiri yakakura icikakoni kumburuka.
^ Njanga inotapira.
^ Kangaije zvinonangira vajijisi vo mutemo.
