Isaya 47:1-15
47 Iwewe mbhandwe mwana wokaji wo Bhabhironi,Derukai ugare pa bukuta.
Garai pasi pacina cigaro co umambo,Iwewe mwana wokaji wo Vakaradhiya,Vandhu avazokudaninji kuti iwewe wakaganya nee kunanga kuti uri mundhu anoenjwa.
2 Torai gwiyo rako ukwiye upfu.
Vhisai jira rowakafuka mu musoro mako.
Vhisai saya yako, kunyai makumbo ako.
Uambuke murambo.
3 Umitu hwako hunozovoneka.
Kupseruka kwako kunozobuda pambhene.
Inini ndinozohwirijira, akuna anozondirambisa.
4 “Muponesi weduZina rake ndi Jehovha wo hondo.Ndiyena Mucena wo Iziraeri.”
5 Iwewe mwana wokaji wo Vakaradhiya,Garai wakanyarara, nghwinai pacidima;Iwewe auzodaninjwizve Vahosi vo umambo.
6 Ndakanyangajwira vandhu vangu.
Ndosvipisa ndhaka yangu,Ndakavapa munyara jako.
Asi iwewe auzivi kuvaitira usizi.
Wakadira kanga inorema pikija kuno harahwa javo.
7 Iwewe wakati: “Ndinozoenderera mberi ndiri Vahosi mbhera narini.”
Iwewe wakakanganwa kudira zviro izvi mu mwoyo;Nee auzivi kurangarira manera azvaizopera zviro zvese.
8 Wari izwai zviro izvi, iwewe unodisaro zviro zvinodakajisa muviri,Wakagara ucikathyi ciri cese weciti ngo mu mwoyo mako:
‘Inini ndinosisira maningi, akuna wakaezana na inini.
Andizovi noni.
Andizofihwi ngo vana vangu.
9 Asi zviro zviviri izvi, zvinozokugumira ngo civhumbu pa njiku imwe basi:
Kufihwa ngo vana vako no kuva noni
Zvokadi, zviro izvi zvinozokugumira kamareNgo ndava yo kuwanda ko uroi hwako no zviito zvako zvese zvino simba zvo masaramuso.
10 Iwewe wakathemba ushaishi hwako.
Wonanga kudari: “Akuna ari kundivona.”
Uzivi hwako no zivo yako zvakakucengeja,Woti ngo mu mwoyo mako: “Inini ndinosisira maningi, akuna wakaezana na inini.”
11 Asi iwewe unozogumihwa ngo dambujiko,Uroi hwako auzocijikiri dambujiko iri.
Nyathwa inozokugumira; iwewe auzokwanisi kuitiza.
Dambujiko guru raucito wavona rinozokugumira ngo civhumbu.
12 Ngo kudaro, endererai mberi no masaramuso ako pamwepo no uroi hwako wakawanda,Zvawaiita kuvhira pa udoko hwako.
Kangaije zvinozokubesera;Kangaije unokwanisa kushamaisa vandhu.
13 Iwewe waremba ngo vapangiri vako vakawanda.
Zvino wari ngavamuke vakuponese,Vese vanonamata zviro zviri kumatenga,Vanoenderera mberi vecisota ndhondho,Vanokupa zivo ngo kugara ko mweji mupsaNgo ndava yo zviro zvinozokuviira.
14 Izwai! Ivona vakaezana no maushwa.
Muriro unozovapisa.
Ivona avakwanisi kujiponesa pa simba ro murazvu.
Murazvu iji asipi masimbe anogara ecibwaka,Asipizve muriro unogara wecikotwa.
15 Izvi ndizvona zvinozoitikira iwewe,Na vaya wavakashanda navo kuvhira pa udoko hwako.
Ivona vanozoherereka, umwe na umwe anozotevera* gwanja rake.
Apana anozokuponesa.
Masoko o Pasi
^ Gama ngo Gama: “anozoenda ku ndharaundha yake.”
