Isaya 49:1-26
49 Ndizwenyi, imwimwi zvirundu,Nasanyi kuteya njeve imwimwi majinja ari ndhambo.
Jehovha wakandidaninja ndicito ndabahwa.
Kuvhira pandainga mundani ya mai wangu iyena wakandidaninja ngo zina.
2 Iyena wakaita kuti muromo wangu uite inga banga rakarojehwa;Wondifindarisa pa munvuriri wo nyara yake.
Wakandiita mupasha wakarojehwa;Wondiviga mu mukhwama* wake.
3 Iyena wakati kwandiri: “Iziraeri, iwewe uri mushandiri wangu,Wandinozoshandisa kuti ndikhombije kunaka kwangu.”
4 Asi inini ndakati: “Ndakashanda ngo simba biresi.
Ndopeja simba rangu mahara.
Asi ndinozviziva kuti anonditonga ndi Jehovha,*Mupocero wangu unovha kuna Mwari wangu.”
5 Asi wari, Jehovha wiya wakandisika ndiri mundani kuti ndive mushandiri wake,Wandivhunja kuti ndimuhwirijire Jakobe,Kuti Vaiziraeri vabatane naye.
Inini ndinozokujwa pamberi pa Jehovha,Mwari wangu anozova simba rangu.
6 Iyena wakati: “Iwewe auripi mushandiri wangu basiKuti umusezve mavhumbo a JakobeNo kuviisazve vakapona vo Vaiziraeri.
Inini ndakuitazve kuti uve ruvheneko ku majinja,Kuti ruponeso hwangu ugume mbhera kumagumo o nyika.”
7 Jehovha Muponesi wo Vaiziraeri, Mucena wako, anoti ku vaya vanoshohwa, ku vaya vanonyenywa pakati po majinja no kuvashandiri vo vatongi:
“Majimambo anozozvivona ozomuka,Vatungamiriri vanozokotamaNgo ndava ya Jehovha, wiya wakagondeka,Mucena wo Vaiziraeri, wiya wakakusana.”
8 Jehovha anonanga kudari:
“Ndakakudavira pa nguva yo unyasha,Ndakakubesa pa njiku yo ruponeso;Ndakakungwarira kuti ndikupe inga citenderano ku vandhu,Kuti ndimusijire nyika iyi,Kuti ivona vatore zviro zvavo zvakasiiwa,
9 Kuti uvhunje vakasungwa kudari: ‘Budanyi!’
Na vaya vari pacidima kudari: ‘Viyanyi kuruvheneko!’
Ivona vanozowana zvokuha phedo no mumakwanja,Kunozova no mahavo kuitira ivona ku zvimatundhu zvese zvakavoma.
10 Avazozwi njara nee nyota,Avazopiswi ngo ciri cese nee ngo zuva.
Ngokuti Wiya ano pena navo anozovatungamirira.Ozovaendesa ku ndau jino kumwa.
11 Ndinozoita kuti matundhu angu ese ave makwanja,Zvitaka zvangu zvese zvakakura zvinozomuswa kuti zvikhwirire.
12 Vonanyi! Ivona vari kuvha ndhambo,Vamweni vari kuvha kanjikazi, vamweni kumavirira,Vamweni vari kuvha ku nyika yo Sinimi.”
13 Khuwanyi ngo kudakara imwimwi matenga, dakarai iwewe nyika.
Matundhu ngaadakajihwe ngo kukhuwa ko kudakara.
Ngokuti Jehovha wanyaraja vandhu vake,Iyena anoitira pena vandhu vake vari kutambujika.
14 Asi Ziyoni anoenderera mberi eciti:
“Jehovha wandisiya, Jehovha wandikanganwa.”
15 Zvingaita here kuti mwanakaji akanganwe mwana wake opamavero?Kana kuti angatama kuitira pena mwana wake waakabara here?
Pikija vanakaji ava vakakanganwa, inini narini andizokukanganwi.
16 Vonai! Ndakakutara mu canja co nyara jangu.
Mupfimbiji jako, nguva jese jiri pambeji pangu.
17 Vana vako vari kuhwirira ngo kukasika.
Vaya vakakuwisa no vakakuuraya, vanozopinda pakati pako.
18 Musai majiso usote mativi ese.
Ivona vese vari kuungana pamwepo.
Veciviya kwauri.
“Ngo upenyu hwangu,” izvi ndizvona zvinonanga Jehovha,“Iwewe unozovasimira vese inga zvinemeso,Ozozvisimira inga zvinoitwa ngo murovohwi.
19 Pikija ndau jako jainga jakaphwanywa, josara jicina zviro, nyika yako yoita mathere,Wari uno inozonyanya kuita doko ku vaya vanogaremo,Vaya vaikumija vanonga vari ndhambo.
20 Vana vako vowakabara pa mukuvo wokufihwa, vanozonanga kudari:‘Ndau iyi yakanyanya kuita doko kwatiri.
Tipsakirenyizve ndau imweni kuti tigare.’
21 Asi iwewe unozoti kudari ngo mu mwoyo mako:‘Ndiyani baba wo vana ava vandinavo wari?Ndiri mwanakaji wakafihwa ngo vana, inini ndainga ndicikabari,Ndakatohwa ndofungihwa.
Waro ndiyani wakarera vana ava?
Vonai! Ndakasiiwa ndiri ndega,Waro vana ava vavha kwapi?’”
22 Mambo Mukuru-kuru Jehovha anonanga kudari:
Izwai! Ndinozomusira majinja nyara yangu,Ndozomusira vandhu citatijo cangu.
Ivona vanozoviya vakabata vana vavo vorume mu nyaraVozodira pamapfuji* vana vavo vokaji.
23 Majimambo anozokurera,Vakaji vavo vanozova majimai ako okukurera.
Ivona vanozogwadama pamberi pako vakasota pasiIvona vanozonakata bukuta ro soka jako,Iwewe unozoziva kuti inini ndini Jehovha;Vaya vanondiimira avazopserujwi.”
24 Zvingaita kuti musoca ano simba atorehwe vasungwi vake here?Kana vasungwi vo mundhu anonesa vangasujunuhwa here?
25 Ngo kudaro, Jehovha anoti:
“Pikija vasungwi vo musoca ano simba vanozotohwa,Vasungwi vo mundhu anonesa vosujunuhwa.
Inini ndinozohwisa vaya vaikuhwisa,Ndozoponesa vana vako.
26 Ndinozoita kuti vaya vaikushupha vahe nyama yavo kamare,Vozodhakwa ngo sangi yavo, voita inga vadhakwa ngo vhinyu inotapira.
Vandhu vese vanozoziva kuti inini ndini Jehovha,Muponesi no Musujunuri wakoWiya ano Simba wa Jakobe.”
Masoko o Pasi
^ Mukhwama uwo, mupasta unodihwa mupasha.
^ Kana: “Jehovha anozondiitira ururami.”
^ Vonanyi Kudurujihwa ko Magama.
