Isaya 53:1-12
53 Ndiyani wakatenda zvatakananga?
Ndiyani wakatatijwa mukono wa Jehovha?
2 Iyena anozobuda inga davi ibza pamberi pake, inga muji munyika yakaoma.
Iyena aana ciimo cinoshamaisa, nee kukujwa;Patinomuvona, ciimo cake acitidakajisi.
3 Iyena wakashohwa, worambiwa ngo vandhu,Wainga mundhu waizwisisa kuhwajihwa, no kuziva kuhwaja.
Waiita inga mundhu wokuti kumeso kwake kwainga kwakavigika kwatiri.
Iyena wakashohwa tomuvona inga acikasisiri.
4 Kunasa kunanga iyena wakathwara ndhendha jedu,Wothwarazve kuhwajihwa kwedu.
Asi itusu takamuvona inga mundhu waitambujwa, waitakwa no kuhwajiswa ndi Mwari.
5 Asi iyena wakabaiwa ngo ndava yo kushaisha kwedu;Iyena wakacangajwa ngo ndava yo kuposa kwedu.
Iyena wakatambujika kuti tiwane runyararo,Ngo ndava yo zvivonje zvake itusu takaraphwa.
6 Itusu tese taifamba inga mavhuta akapsejeka,Umwe na umwe wedu waitevera gwanja rake,Jehovha wakaita kuti kuposa kwedu kuwire panyezuru pake.
7 Iyena wakabzinyirihwa wotendera kutambujwa,Asi aazivi kufunungura muromo.
Wakatohwa inga vhuta riri kwenda koourawa,Inga vhuta rinoenderera mberi rakanyarara pamberi pa vaya vari kuda kurigunda,Iyena aazivi kufunungura muromo.
8 Iyena wakavhiswa* ngo ndava yo kubzinyirihwa no kutongwa kucizivi kururama;Ndiyani anozobhuya ngo pamusoro po mubarihwana* wake?
Ngokuti iyena wakavhiswa mu nyika yo vari penye;Ngo ndava yo kuposa ko vandhu vangu, iyena wakatakwa.*
9 Iyena wakavigwa pakati po vakashata,Guva rake riri pakati po vakhupuki,*Pikija acizivi kuita ciro cakashataPamuromo pake apazivi kumbobuda manyepo.
10 Asi Jehovha waida kuti iyena acangajwe wotendera kuti ahwaje.
Kudari mukapa upenyu hwake inga mupiro wokuti zvishaishi zviregerehwe,Iyena anozovona mubarihwana wake, woengejera mazuva ake,Ngo ndava yake zvinozoithwa zvinodakajisa Jehovha.
11 Ngo ndava yo kuhwajihwa kwake, anozodakara ngo zvaanozovona.
Ecishandisa uzivi hwake, mushandiri wangu wakarurama,Anozoita kuti vandhu vakawanda vave vakarurama,Wozotora kuposa kwavo.
12 Ngo ndava ya izvi ndinozokupoceresa pakati po vazinji,Iyena anozokovanisana zviro zvakatohwa no vanosimba,Ngokuti wakapa* upenyu hwake mbhera kufaWoverengwa pamwepo no vashaishi;Iyena wakathwara zvishaishi zvovazinji,Wokumbirira vashaishi.
Masoko o Pasi
^ Kana: “wakauraiwa.”
^ Kana: “maponero ake.”
^ Kana: “wakatakwa mbhera kufa.”
^ Kana: “vakaganya.”
^ Gama ngo Gama: “wakadurura.”
