Isaya 55:1-13
55 Imwimwi mwese muno nyota, izanyi kuno kumwa!
Mwese mucina mare, izanyi, tenganyi zvokuha muhe!
Hina, izanyi, toranyi vhinyu no mukaka* mucina mare, pacina mutengo.
2 Ngenyi muri kuenderera mberi mecipeja mare ngo zviro zviciripi zvokuha?Ngenyi muri kupeja mupocero wenyu ngo zviro zvicikamugutisi?
Nasanyi kundizwa, muhe zviro zvakanaka,Imwimwi munozoha zvokuha zvinovaka muviri.
3 Ndizwenyi, muviye kondiri.
Ndipurutanenyi, munozoenderera mberi mecipona,Inini ndinozoita citenderano co kwenda no kwenda nemwiMukuzwirana no rudo ucikacinji unokhombijihwa Dhavhidhi wiya wakagondeka.
4 Vonanyi! Ndakamuita capupu co majinja,Ndomuita mutungamiriri no mutongi wo majinja.
5 Izwai! Iwewe unozodaninja jinja raucikazivi,Vandhu vo jinja ricikakuzivi, vanozogogoma veciviya kwauriNgo ndava ya Jehovha Mwari wako, Mucena wo Iziriaeri,Ngokuti iyena anozoita kuti iwewe ukujwe.
6 Psakanyi Jehovha paanonga acawanika.
Mudaninjenyi paanonga aciri phedo.
7 Mundhu wakashata ngaasiye gwanja rakeMundhu anoita zvakashata ngaasiye murangariro wake;Ngavahwirire kuna Jehovha, iyena anozovaitira usizi,Ngavahwirire kuna Mwari wedu ngokuti iyena anoregerera mukuperera.
8 Jehovha anoti: “Ngokuti murangariro jangu asipi murangariro jenyu,Makwanja enyu asipi makwanja angu.”
9 “Ngokuti kudari inga matenga ari ndhambo maningi no pasi,Makwanja angu akakhwira maningi kupinda makwanja enyuMurangariro jangu jakakhwira maningi kupinda murangariro jenyu.
10 Ngokuti kudari inga nvura no cando zvinowa pasi zvicivha kudengaAzvihwiriri kudenga zvicizivi kubija pasi, nokuita kuti mbeu imere no kubara mucero,Zvopa mbeu ku vaya vanosima no zvokuha ku vaya vanoha.
11 Ndizvona zvinoita soko rinovha pa muromo pangu.
Arizohwiriri kwandiri ricina muviyo.Asi rinozoita zvandinoda,Pacina kukana-kana rinozokwanirisa cinangwa condakaritumira.
12 Ngokuti imwimwi munozobuda makadakara,Mozohwirijwa ngo runyararo.
Matundhu no zvimatundhu, zvinozodakara pamberi penyu zvecikhuwa ngo mudakaro,Mamuti o pa nyika anozotaka nyara.
13 Pa ndau yo muti wo muzwa, panozomera muti wo mujunipa,Pa ndau po hwenya,* panozomera muti wo murta.
Izvi zvinozoita kuti Jehovha akujwe,Cozova citatijo co kwenda no kwenda, cicikazoperizve.”
