Isaya 66:1-24
66 Jehovha anonanga kudari:
“Matenga ndiwona cigaro cangu co umambo, nyika ndiyona ciciko co soka jangu.
Waro munozondivakira nyumba yo mushovonyi?Ndau yangu yokuzororera iri kwapi?”
2 “Nyara yangu ndiyona yakaita zviro zvese izvi,Ngo kudaro, aya ndiwona maitihwe akaithwa zviro,” izvi ndizvona zvinonanga Jehovha.
“Asi mundhu wandinozosota nga uu,Mundhu anojidodokesa, ano mwoyo unohwaja, anotetemera pamberi po soko rangu.
3 Mundhu ari kuuraya n’gombe yorume, wakaezana no mundhu anouraya mundhu doni.
Mundhu anopira vhuta wakaezana no mundhu anophwanya goci ro imbhwa.
Mundhu anoviisa cipo, wakaezana no mundhu anopira sangi yo nguruve!
Mundhu anoviisa cipo co mafuta anonuhira inga ciceukijo, wakaezana no mundhu anokomborera ecishandisa masaramuso.
Ivona vanosana makwanja avo kamare,Vodakarira kuita zviro zvinosembhusa.
4 Ngo kudaro, ndinozosana manera o kuvapanica,Ndinozovaitira zviro zvavanothya.
Ngokuti pandakadaninja, apana wakadavira;Pandakavereketa, apana wakapurukira.
Ivona vanoenderera mberi veciita zviro zvakashata pamberi pangu,Vecisana kuita zviro zvicikandidakajisi.”
5 Izwanyi soko ra Jehovha, imwimwi vandhu vanothya soko rake:
“Hama jenyu jinomuzonda no kumunyenya ngo ndava yo zina rangu, vakananga kudari: ‘Jehovha ngaakujwe!’
Mwari anozoviya, ozomupekeja mudakaro,Asi ivona vanozopserujwa.”
6 Kuno izwi ro mbhere riri kuvha ku dhorobha, izwi riri kuvha ku themberi!
Izwi iri ngo ra Jehovha ecihwirijira vavengi vake zvavanofanera.
7 Mwanakaji wakabara acito ahwajihwa ngo kubara.
Iyena wakabara mwana worume, kuhwajihwa ko kubara kucito kwaguma.
8 Ndiyani wakambozwa ngo pamusoro po zviro izvi?
Ndiyani wakambovona zviro zvakadari?
Nyika ingabahwa ngo njiku imwe here?
Kana kuti jinja ringabahwa ngo njiku imwe basi?
Ngokudaro, Ziyoni rakatanga ngo kuhwajihwa ngo kuda kubara, perapo rozobara vana vorume.
9 “Kureva kuti inini ndingaita kuti njiku yo kubahwa igume asi mundhu otama kubahwa?” izvi ndizvona zvinonanga Jehovha.
“Kureva kuti inini ndingaita kuti mundhu asurungumwe, perapo ndofunga ndani yake?” izvi ndizvona zvinonanga Mwari wako.
10 Dakaranyi ngo Jerusarema, tambanyi naro imwimwi mwese munorida.
Tambanyi maningi naro, mwese munocema* ngo pamusoro paro,
11 Ngokuti imwimwi munozomwa mazamu aro mozonasa kuguta no kunyarajwa,Munozomwa ngo kuda kwenyu, mozodakajihwa ngo kukujwa kwaro kukuru.
12 Jehovha anonanga kudari:
“Ndinozoripa runyararo inga muramboNo rukujo wo majinja inga kumwa inomwashaika.
Imwimwi munozomwa mozotakuhwa munyara,Imwimwi munozotambiswa pamakumbo.
13 Inga zvinoitwa ndi mai vanopendejera mwana wavo,Inini ndinozoenderera mberi ndecimupendejera;Ngo ndava yo Jerusarema, imwimwi munozopendejehwa.
14 Imwimwi munozozvivona izvi, mwoyo yenyu yozodakara,Imwimwi munozova no upenyu wakanaka inga maushwa mavishi.
Nyara ya Jehovha inozovoneswa ku vashandiri vake,Asi iyena anozonyangajwira vavengi vake.”
15 Ngokuti Jehovha anozoviya inga muriro,Ngoro* jake jo hondo jakaita inga zibepo,Kuti ahwirijire ano ushungu hwakakura maningi,No kupangira ngo murazvu wo muriro.
16 Jehovha anozotonga inga muriro,Hina, ano banga rake kuti ahwise vandhu vese;Vanozouraiwa ndi Jehovha vanozowanda maningi.
17 “Kuna vaya vanojicenesa no kujisuka kuti vanghwine mu maminda, vecitevera wiya ari pakati, anoha nyama yo nguruve, anoha zviro zvicivi kucena no mbeva, vese vanozoguma kumagumo pamwepo,” izvi ndizvona zvinonanga Jehovha.
18 “Zvecivoneka kuti ndinoziva mabasa avo no murangariro yavo, ndinoviya kuzounganija vandhu vo majinja ese no ndumi jese. Ivona vanozoguma vozovona kukujwa kwangu.”
19 “Ndinozodira pakati pavo citatijo, vandhu vaya vanozosara ndinozovatumira ku majinja o Tarishishi, Puri no Rudhi nyika jo vandhu vanofura ngo uta, kubatanijavo Tubhari, Javhani pamwepo no zvirundu zviri ndhambo zvo vandhu vaya vacizivi kumbozwa kubhuya ngo pamusoro pangu nee kuvona rukujo hwangu. Ivona vanozozivisa kukujwa kwangu pakati po majinja.
20 Ivona vanozoviisa hama jenyu jese kuvha kumajinja ese inga cipo kuna Jehovha, vakapakira pa haci, pa ngoro,* pangoro jakashama, pa mura,* pa makamera anogogoma maningi ku dundhu rangu rakacena Jerusarema,” izvi ndizvona zvinonanga Jehovha, “zvinozoita inga kuti vandhu vangu Vaiziraeri vari kuviisa cipo cavo ciri mumujiyo wakacena ku nyumba ya Jehovha.
21 “Ndinozosanavo vamweni kuti vave vapiri no Varevhi,” izvi ndizvona zvinonanga Jehovha.
22 “Ngokuti inga zvinoitika no matenga mapsa no nyika imbza zvandiri kuita zvinogara kwenda no kwenda pamberi pangu,” izvi ndizvona zvinonanga Jehovha, “mubarihwana wenyu no zina renyu, zvinozogaravo kwenda no kwenda.”
23 “Kuvhira pakugara ko mweji mupsa mbhera pa kugara ko mweji mupsa umweni, kuvhira pa Sabudu mbhera pa Sabudu rimweni,Vandhu vese vanozoviya vozogwadama pamberi pangu,” izvi ndizvona zvinonanga Jehovha.
24 “Ivona vanozobuda, vozovona mutembo* yo vandhu vaya vakandipandukira;Ngokuti honye javo, ajizofi,Muriro unozovapisa, auzojimi,Ivona vanozova ciro cinozizimusa ku vandhu vese.”
Masoko o Pasi
^ Kana: “munorira.”
^ Kana: “kareta.”
^ Kana: “kareta.”
^ Mubarihwana wo bongoyo kana haci.
^ Muviri wo mundhu wakafa.
