Jakobo 3:1-18
3 Hama jangu, asipi vazinji venyu vaidikana kuva vajijisi, ngokuti kudari tikava vajijisi tinozova no mutoro mukuru pamberi pa Mwari.
2 Tese tinoshaisha kazinji. Wiya anovereketa acikashaishi, ndiyena mundhu wakakwana, anokwanisa kujibata muviri wake wese.
3 Kudari tikasunga monga* pa muromo wo haci kuti itizwire, tinokwanisa kuseseja haciyo yese.
4 Vonanyivo shati:* Pikija yakakura no kufambiswa ngo mbhepo yakavanga, asi inorungamiswa ngo khasinya* doko kuti iyende kunoda mune wayo.
5 Ndizvonavo zvondhozvo no rurumi: ihwona hwakadodoka pa muviri, asi hunokwanisa kujikukumuja ngo zviro zvikuru. Vonanyi kuti cimuriro cidoko, cinopisa gwasha rakakura!
6 Rurumi, murirovo. Rurumi hwakazara ngo ushati pakati po zvihwa zvo muviri wedu, ihwona hunosvipisa muviri wese, hunobwakija upenyu hwedu hwese; murazvu wawo unovha mu Gehena.*
7 Mukhaindi wese wo zvinyama zvo musora, shiri, zvinyama zvinogwezva no zvisikwa zvo mujombe zvinotungamirihwa, izvona zvaindotungamirihwa ngo vandhu.
8 Asi apana mundhu anokwanisa kutonga rurumi. Ihwona ahungwaririki, hunokhuvaza, hwakazara ngo nvenene.
9 Ngo rurumi, tinosimba Jehovha* Mwari, Baba wedu, toshorazve ndihwona vandhu vakaithwa “ngo muezaniso wa Mwari.”
10 Muromo wondhowo unokomborera no kutuka.
Hama jangu, azvizivi kunaka kuti zviro zviitike ngo njira iyi.
11 Zvingaita kuti pa mwimbo* wondhowo pobuda kumwa inotapira no inovava here?
12 Hama jangu, zvingaita kuti mukuyu ubare maorivhe, kana kuti muorivhe ungabara makuyu here? Nee mwimbo* uno kumwa inojamunya aubudisi kumwa inotapira.
13 Pakati penyu, pano mundhu wakangwara no anozwisisa? Kudari aripo, iyena anodikana kuva no mufambiro wakanaka unovonesa ungwaru hwake ngo kuita zviro zvese no kujidodokesa.
14 Asi kudari muno ushanje hunovava no kuphikizana* mu mwoyo menyu, mucadojikuja ngo pamusoro po ungwaru hwenyu. Mukaita kudaro munonga mecinyepa.
15 Uhu asipi ungwaru hunovha mugore; ngo hwo pasi pano, ngo hwo zvinyama no hwo udhimoni.
16 Ngokuti, pano ushanje no kuphikizana,* panozovavo no kutama kurongeka no zviro zvese zvakashata.
17 Asi ungwaru hunovha mugore, pakutanga hwakacena, perapo hunoita runyararo, hunoda kuzwira, hwakazara ngo usizi no mucero yakanaka, ahukheti, nee ahucengejeri.
18 Mucero wo ururami unosimwa mu runyararo, kuna* vaya vanoita runyararo.
Masoko o Pasi
^ Monga ibote rinodihwa mu miro mo n’gombe.
^ Ngarava yakakura.
^ Khasinya rakaita inga hasvi; rinoshandiswa pa kuvhutha shati.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “sime, dima.”
^ Kana: “sime, dima.”
^ Kangaije: “kudisisa cigaro.”
^ Kangaije: “kudisisa cigaro.”
^ Kangaije: “nga.”
