Jakobo 5:1-20
5 Izwanyi imwimwi vakhupuki! Cemanyi no kucumba ngo ndava yo dambujiko rinozomuviira.
2 Upfumi hwenyu hwavora, nguvo jenyu japera kucengwa-cengwa.
3 Goridhi renyu no sirivha zvahika ngo furujhu, furujhu yazvo inozovonesa kuposa kwenyu, yoha nyama yenyu. Zvamakaunganija zvinozoita inga muriro mu njiku jo kupejisira.
4 Vonanyi! Vandhu vakakotora mu minda jenyu motama kuvapoceresa, vari kucema,* kukumbira kwavo kubeswa, kwaguma kuna Jehovha* wo hondo.
5 Imwimwi mainga vakhupuki pa nyika, meciita zvinodakajisa muviri basi. Makaha mopunda kuitira njiku yamunozourawa.
6 Makapa ndava mururami no kumuuraya. Munorangarira kuti iyena aamuzondi kani?
7 Hama, ivanyi vanosengerera mbhera kuvepo ka Mambo. Vonanyi! Murimi anogara ecivetera mucero unosisira wo pasi, ecisengerera mbhera nvura yokutanga no yokupejisira igume.
8 Na imwimwivo ivanyi vanosengerera; vangisanyi mwoyo yenyu, ngokuti kuvepo kwa Mambo kwaaphedo.
9 Hama, mucan’gun’gutirana, kuti mutame kuzotongwa. Vonanyi! Mutongi wakaima pa musuvo.
10 Hama, ngo pamusoro po kutambujika no kusengerera, tevejeranyi muezaniso wo vaporofeti vaibhuya ngo zina ra Jehovha.*
11 Vonanyi! Kuna vayani vakacungirira tinonanga kuti: “Ivona vanodakara.”* Makazwa ngo kucungirira ka Jobe no muviyo waakapuwa ndi Jehovha,* ngokuti Jehovha wakazara ngo pena no usizi.
12 Hama jangu, kunja kwa zvese, mucadopika ngo zina ro kudenga kana pasi kana kupika ngo ciri cese. Asi “Hina” wenyu ngaave hina, “Haiwa” wenyu ngaave haiwa, kuti mutame kuzotongwa.
13 Aripo ari kutambujika pakati penyu? Ngaaenderere mberi eciita mukumbiro. Aripo wakadakara? Ngaaimbe nduyo.
14 Aripo anohwaja pakati penyu? Ngaadanije vakuru vo ungano, vamuitire mukumbiro, vecimuzoja ngo mafuta mu zina ra Jehovha.*
15 Mukumbiro unoitwa ngo rutendo unovangisa anohwaja,* na Jehovha* anozomumusa. Kudari iyena ano zvishaishi, anozoregerehwa.
16 Dekecerananyi pambhene zvishaishi zvenyu no kuitirana mukumbiro kuti muvange. Mukumbiro* wo mururami uno simba guru.
17 Eriya waingavo ari mundhu ano mazwiro akaezana no edu, asi paakakumbira ngo mwoyo wese kuti kutame kuna, akuzivi kuna nvura pa nyika ko makore matatu no mweji mutandhatu.
18 Paakaitazve mukumbiro, nvura yakana, pasi pobara mucero.
19 Hama jangu, kudari umwe wenyu akapauka mu cokwadi, umweni womuviisa,
20 zivanyi kuti wiya anoviisa mushaishi kuvha mu gwanja rake rakashata, anozomuponesa pa rufu no kufukija zvishaishi zvakawanda.
Masoko o Pasi
^ Kana: “kurira.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “vakakomborehwa.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kangaije: “wakarembejeka.”
^ Vonanyi Kudurujihwa ko Magama.
^ Mukumbiro wo kudeketera.
