Jeremiya 1:1-19
1 Aya ndiwona masoko a Jeremiya* mwana wa Hirikiya. Hirikiya wainga umwe wo vapiri waigara mu Anatoti mu nyika ya Bhenjamini.
2 Jehovha wakabhuya na Jeremiya mu njiku ja Josiya mambo wo Judha, mu gore rocigumi natatu ro kutonga kwake. Josiya wainga mwana wa Amoni.
3 Mwari wakaenderera mberi ecibhuya na Jeremiya mu njiku ja Jehoyakimi mwana wa Josiya, mambo wo Judha, mbhera kumbhiri ko gore rocigumi na rimwe ro kutonga ka Zedhekiya mwana wa Josiya, mambo wo Judha, mu mweji wo cishanu, apo vandhu vo Jerusarema pavakaendeswa kuuranda.
4 Jehovha wakandivhunja kudari:
5 “Ndicito ndikakuumba mundani ya mai wako, inini ndainga ndookuziva,*Iwewe ucito wabahwa,* inini ndakakucenesa.*
Ndakakuita muporofeti wo majinja.”
6 Inini ndakati: “Maiwee, Mambo Mukuru-kuru Jehovha!
Inini andikwanisi kuvereketa ngokuti ndiciri mujaha.”*
7 Tevere, Jehovha wakandivhunja kudari:
“Ucananga kuti: ‘Ndiciri mujaha.’
Ngo kudaro, unodikana kwenda ku vandhu vese vari mu ndau yese yandiri kukutumira,Wozovavhunja zviro zvese zvandinozokuvhunja.
8 Ucavathya,*Ngokuti ‘inini ndinewe kuti ndikuponese,’ izvi ndizvona zvinonanga Jehovha.”
9 Ngo kudaro, Jehovha wakatambanuja nyara yake wopsasa muromo wangu. Jehovha wakandivhunja kudari: “Ndiri kudira masoko angu pa muromo pako.
10 Izwai! Nyamasi ndiri kukupa simba panyezuru po majinja ese no majimambo, kuti uvhite no kuwisa, kuti uphwanye no kuparaja, kuti uvake no kusima.”
11 Jehovha wakandivhunjisazve kudari: “Jeremiya uri kuvonenyi?” Inini ndakadavira kudari: “Ndiri kuvona davi ro muti wo muamendwa.”
12 Jehovha wakandivhunja kudari: “Iwewe wanasa kuvona, ngokuti inini ndiri kuenderera mberi ndakarinda kuti ndikwanirise masoko angu.”
13 Jehovha wakabhuyazve na inini hwocipiri eciti: “Uri kuvonenyi?” Inini ndakananga kudari: “Ndiri kuvona mbende iri kuvira kanjikazi, muromo wayo wakapeamira kakusi.”
14 Ngo kudaro, Jehovha wakandivhunja kuti:
“Dambujiko rinozovha kanjikaziKuti rihwise vagari vese vo munyika.
15 Ngokuti ‘ndiri kuunganija mavhumbo ese o umambo o kanjikazi,’ izvi ndizvona zvinonanga Jehovha.
‘Iwona anozoviya; vhumbo rimwe nga rimwe rinozodira cigaro caro co umamboPamanghwiniro o musuvo o Jerusarema,Kuti ahwise muru* jaro ku mativi eseNo madhorobha ese o Judha.
16 Ndinozozivisa masoko angu o rutongeso kovari, ngo ndava yo zviito zvavo zvese zvakashata,Zvecivoneka kuti ivona vakandisiya,Wari vari kuiitira zvimwari zvimweni mupiro*Vecigwadamira mabasa o nyara javo.’
17 Asi iwewe unodikana kujinasirira,Mukai uvavhunje zviro zvese zvandinozokuvhunja.
Ucavathya,Kuti inini nditame kukuthyisa pamberi pavo.
18 Ngokuti nyamasi ndakuita kuti uve dhorobha rakavangiswa,Uve njiki yo simbi no muru* jo utare kuti ukwanise kucijikira vandhu vo nyika yese,Majimambo o Judha no vatungamiriri vavo,Vapiri vavo no vandhu vavo vo nyika.
19 Zvokadi ivona vanozohwisana na iwewe,Asi avazokunyisi,Ngokuti ‘inini ndinewe kuti ndikuponese,’ izvi ndizvona zvinonanga Jehovha.”
Masoko o Pasi
^ Kangaije: “Jehovha Anokuja.”
^ Kana: “ndainga ndakusana.”
^ Gama ngo Gama: “ucito ukabuda mu ndani.”
^ Kana: “ndakakucenesera pa divi rangu.”
^ Kana: “ndiciri mudoko.”
^ Kana: “Ucathya kumeso kwavo.”
^ Kana: “mupfimbiji.”
^ Kana: “mupiro wo usi.”
^ Kana: “mupfimbiji.”
