Jeremiya 10:1-25
10 Imwimwi vo nyumba yo Vaiziraeri, izwanyi masoko akabhuya Jehovha ngo pamusoro penyu.
2 Izvi ndizvona zvinonanga Jehovha:
“Mucatevejera zvirovejeso zvo majinja,Mucatetemera ngo ndava yo zvitatijo zvo kumatenga,Basi ngokuti vandhu vo majinja amweni vari kutetemera ngo ndava yazvo.
3 Ngokuti zvirovejeso zvo majinja azvibesi ciro.
Zvithombe zvavo zvakaizwa ngo muti wakatemwa mugwasha,Zvakavezwa ngo muvezi ecishandisa thurusi rake.
4 Ivona vanozvisejesa ngo sirivha no goridhiVozvikohomera ngo peregu no martera* kuti zvitame kuwa.
5 Izvona zvakaezana no cithombe* cokuthyisijira shiri cakadihwa mu munda wo makaka, izvona azvivereketi;Zvinodikana kuthwahwa ngokuti azvikwanisi kufamba.
Mucazvithya ngokuti izvona azvikwanisi kuita ciro cakashata,Nee azvikwanisi kuita ciro cakanaka.”
6 Jehovha Mwari wangu, apana mundhu wakaezana na imwimwi.
Imwimwi muri mukuru, zina renyu rakakura, irona rino simba.
7 Ndiyani angatama kumuthya, imwimwi Mambo wo majinja? Izvi ndizvona zvinodikana kuithwa,Ngokuti pakati po vazivi vese vo majinja no pakati po umambo wavo wese,Apana mundhu wakaezana na imwimwi.
8 Ivona vese mapenji, avana hwiru.
Kujijiswa ngo muti akubeseri ciri cese.
9 Sirivha yakapfuhwa inovha Tarishishi, goridhi rinovha ku Ufazi,Zviro izvi zvinoshandiswa ngo muvezi no mupfuri kuti vasejese zimuti.
Vandhu vanosimija zvithombe nguvo jo bhurumu no nguvo jokupsukirikira.
Zvithombe zvese zvakaizwa ngo vandhu vanokwanisa kuita ushoni.
10 Asi Jehovha ndi Mwari wo cokwadi.
Iyena ndi Mwari anopona, Mambo wo kwenda no kwenda.
Ngo ndava yo kucamwa kwake, nyika inozotetemera,Akuna jinja rinozocijikira ushungu hwake.
11 * Munodikana kuvavhunja izvi:
“Zvimwari zvicizivi kuita matenga no nyikaZvinozongara-ngara pa nyika no pasi po matenga.”
12 Ndiyena wakasika nyika ngo simba rake,Wiya wakavangisa nyika ngo uzivi hwakeNo kuwaja matenga ngo uzivi* hwake.
13 Paanoita kuti izwi rake rizike,Kumwa yo kumatenga inotindhira,Iyena anoita kuti makore akhwire kudenga ecivha kumagumo o nyika.
Iyena anoita kuti nvura inona ine no mbheni,Iyena anobudisa mbhepo mu ndau jaanoiviga.
14 Vandhu vese vanoita zviro vacikarangariri, ivona avana zivo.
Vapfuri vese vanozonyowejeka ngo ndava yo zvithombe zvavo zvakavezwa;Ngokuti zvithombe zvavo zvo utare* ngo zvokunyepa,Izvona azvifemi.
15 Izvona azvina zvazvinobesera, imabasa anofanera kushohwa.
Ikazoguma njiku yo kutongwa kwavo, izvona zvinozopejwa.
16 Wiya wakapa Jakobe utaka, aazivi kuezana no zviro izvi,Ngokuti iyena Ndiyena wakaita zviro zvese;Iziraeri i ndonga yo utaka hwake.
Jehovha wo hondo ndirona zina rake.
17 Iwewe mwanakaji wakatendenejwa ngo muvengi,Unganijai zviro zvako.
18 Ngokuti Jehovha anonanga kudari:
“Wari ndinozokhandira* ndhambo vagari vo nyika iyi,Ndozovaita kuti vatambujike.”
19 Ndino nyathwa ngo ndava yo dambujiko rangu!
Civonje cangu acirapiki.
Inini ndakati: “Zvokadi, iyi ndiyona ndhendha yangu, ndinodikana kuicijikira.
20 Tende yangu yakaparajwa, mapote ayo ese akapera kudajuhwa.
Vana vangu vakandisiya, ivona avacikozve.
Akuna mundhu wakasara kuti atambanuje tende yangu no kusungira nguvo jo tende yangu.
21 Vahavisi vakaita zviro zvicina hwiruIvona avazivi kuvhunjisa Jehovha.
Ngo kudaro, vakaita zviro vacizivi kuzwisisa,Mushambi yavo yese yakapera kundhandhaniswa.”
22 Izwanyi! Kuno masoko ari kuguma!
Kutindhira kukuru kuri kuviya kwecivha ku nyika yo kanjikazi.
Kuti kuite kuti madhorobha o Judha aite mathere, ndau jo kufindarira imbhwa jo musora.
23 Jehovha Mwari wangu, inini ndinonasa kuziva kuti mundhu asipi mune wo gwanja rake.
Iyena aakwanisi kutungamirira mudanyu jake.
24 Jehovha Mwari wangu, ndipangirenyi ngo ururami,Mucandipangira makanyangajwa, kuti mutame kundiparaja.
25 Dururanyi ushungu hwenyu ku majinja acikamuzwiriNo ku mavhumbo acikadaninji zina renyu.
Ngokuti iwona akauraya Jakobe.
Hina, akauraya Jakobe mbhera kumupeja.
Iwona akaparaja nyika yake.
Masoko o Pasi
^ Kana: “hamera.”
^ Mufananijo wo cithombe co mundhu cinodihwa mu maminda kuti cithyisijire zvinyama no shiri.
^ Vhesi ya 11 yakatahwa ngo ndumi yo Ciaramaiko.
^ Kana: “kuzwisisa kwake.”
^ Kana: “zvakanyunguruswa.”
^ Kana: “ndinozokhandira inga vhunga murara.”
