Jeremiya 11:1-23
11 Jehovha wakabhuya na Jeremiya, eciti:
2 “Imwimwi vandhu izwanyi masoko o citenderano ici!
“Vhunjai masoko aya ku vandhu vo Judha no vagari vo Jerusarema
3 weciti: ‘Izvi ndizvona zvinonanga Jehovha Mwari wo Vaiziraeri: “Mundhu acikazwiri masoko o citenderano ici, ngaatukwe,
4 masoko aya ndakamavhunja majicekuru enyu, pa njiku yondakavavhisa mu nyika yo Ejipita, pa coto cinonyungurusa simbi, ndeciti: ‘Zwiranyi izwi rangu moita zviro zvese zvandinomuvhunja, imwimwi munozova vandhu vangu, inini ndinozova Mwari wenyu,
5 ngo kuita kudaro, inini ndaizokwanisa kuita zvondakapikira majicekuru avo, ndozovapa nyika inopopoma mukaka* no uci, inga zviri kuitika nyamasi.’”’”
Inini ndakadavira kudari: “Ameni* Jehovha.”
6 Jehovha wakandivhunja kudari: “Zivisai masoko ese aya ku madhorobha o Judha no mumakwanja o Jerusarema, weciti: ‘Izwanyi masoko o citenderano ici, muite zvaanonanga.
7 Ngokuti inini ndakanasa kuvhunja majicekuru enyu kuvhira pa njiku yo ndakavavhisa mu nyika yo Ejipita mbhera nyamasi, ndecivavhunja kuphinda no kuphinda, ndeciti: “Zwiranyi izwi rangu.”
8 Asi ivona avazivi kuzwira, nee kuzwisisa, kusiyapo izvo, umwe nga umwe wavo wakavomesa musoro wake, wotevera zvaida mwoyo wake wakashata. Ndizvona zvakandiitisa kuti inini ndivaviisire masoko ese o citenderano aya andakavavhunja kuti vazwire. Asi ivona vakaramba kuita zvaainanga.’”
9 Ngo kudaro, Jehovha wakandivhunja kuti: “Vandhu vo Judha no vagari vo Jerusarema vari kuenderera mberi veciita zvakashata.
10 Ivona vahwirira kooita zviro zvakashata zvakaizwa ngo majicekuru avo kuvhira pakutanga, vakaramba kuzwira masoko angu. Ivona vakanamata zvimwari zvimweni vecizvishandira. Vandhu vo nyumba yo Iziraeri no vandhu vo nyumba ya Judha avazivi kuzwira citenderano candakaita no majicekuru avo.
11 Ngo kudaro, Jehovha anonanga kudari: ‘Ndiri kuvaviisira dambujiko ravacikakwanisi kutiza. Pavanozondidaninja vecikumbira besero, inini andizovazwi.
12 Madhorobha o Judha no vagari vo Jerusarema vanozoenda ku zvimwari zvavari kuitira mupiro, vozozvikumbira besero, asi izvona azvizokwanisi kuvaponesa panozoguma dambujiko ravo.
13 Iwewe Judha zvimwari zvako zvinozowanda maningi kuezana no madhorobha ako, artari jamakaita kuitira zvimwari zvinopseruja jakawanda maningi kupinda makwanja o Jerusarema. Pa artari iji, maiitirepo mupiro kuna Bhaari.’
14 “Asi iwewe, ucaitira mukumbiro vandhu ava. Ucavadeketerera nee kuvaitira mukumbiro, ngokuti inini andizovazwi pavanozondideketerera ngo ndava yo dambujiko rinozovawira.
15 Ngenyi vandhu vangu vanodiwa vari mu nyumba yangu,Kuveni vazinji vavo vari kuenderera mberi veciita zviro zvavo zvakashata?
Kureva kuti ivona vangakwanisa kuphinga dambujiko riri kuda kukuwira ngo ndava yo nyama yakaceneswa* here?
Kureva kuti iwewe unozodakara pa nguva yondhoyo?
16 Jehovha waikudaninja kuti muti wo maorivhe wakapfara,Wakaseja uno mucero jakaseja.
Ngo kutindhira kukuru, iyena wakautumira muriro.
Ivona vakagura matavi avo.
17 “Jehovha wo hondo, wiya Wakakusima, wazivisa kuti dambujiko rinozokugumira ngo ndava yo zvishaishi zvakaithwa ngo vandhu vo nyumba yo Iziraeri no vandhu vo nyumba ya Judha, vecindituka ngo kuitira mupiro Bhaari.”
18 Jehovha wakandivhunja kuti ndigare ndecizviziva;Pa mukuvo wondhowo, imwimwi Mwari wangu makandikhombija zviro zvavaiita.
19 Inini ndainga ndakaita inga vhuta rorume rakagajana riri kwenda koourawa.
Ndainga ndicikazivi mazano ovaindirongera, veciti:
“Ngatende koparaja muti no mucero jawo,Ngatiuuraye, kuti zina rawo ritamezve kuzoceukijwazve.”
20 Asi Jehovha wo hondo anotonga ngo ururami;Iyena anopopora murangariro yo mukati-kati no mwoyo.
Mwari wangu, vahwirijirenyi ndecizvivona,Ngokuti ndava yangu ndakaisiya mu nyara jenyu.
21 Ngo kudaro, izvi ndizvona zvinonanga Jehovha ku vandhu vo Anatoti vanopsanga kundiuraya, vecinanga kudari: “Ucaporofeta ngo zina ra Jehovha, kudari ukazviita, tinozokuuraya”;
22 Jehovha wo hondo anonanga kudari: “Ndinozotonga vandhu ava, majaha anozourawa ngo banga, vana vavo vorume no vana vavo vokaji vanozofa ngo njara.
23 Apazowaniki nee mundhu umwe anozopona pakati pavo. Ngokuti ndinozoviisira dambujiko vandhu vo Anatoti pa gore randinozovatonga.”