Jeremiya 12:1-17
12 Jehovha Mwari wangu, imwimwi makarurama. Pandinomun’gun’gutira,No kubhuya nemwi ngo pamusoro po kutonga kwenyu,Imwimwi munoita zviro zvakarurama.
Asi ngenyi vandhu vakashata vanobudirira pazvavanoita?
Ngenyi vacengeji vanogara vakagajana?
2 Imwimwi makavasima, ivona vocira muji.
Vakakura vobara mucero.
Mukuwo wese ivona vanobhuya ngo pamusoro penyu,Asi murangariro yavo yo mukati-kati iri ndhambo na imwimwi.
3 Jehovha Mwari wangu, imwimwi munonasa kundiziva, munondivona;Makapopora mwoyo wangu, movona kuti iwona unoita zvamunoda.
Vaparajanisenyi inga mavhuta ari kwenda koourawa,Vadirenyi pamutivi vecivetera njiku yo kuurawa.
4 Nyika iyi inoenderera mberi yecifota mbhera rini?
Mbhera rini sora ro munda yese rinoenderera mberi recioma?
Ngo ndava yo zvishaishi zvo vagari vo nyika ino,Zvinyama no shiri zvapera.
Ngokuti ivona vakati: “Iyena aakwanisi kuvona zvinozoitika na itusu kumbejiyo.”
5 Kudari iwewe unoremba ngo kugogoma no vandhu,Unozokwanisisa kudini kuphikizana no haci?
Pikija wecijizwa kuti wakagajana mu nyika yo runyararo,Asi unozoitenyi paunonga uri mu mapani o Jordhani?
6 Ngokuti pikija hama jako jo pa nyumba ya baba wako,Jakakucengeja.
Ijona jakakubhuira zvakashata.
UcajithembaPikija jikakuvhunja zviro zvakanaka.
7 “Inini ndasiya nyumba yangu no utaka hwangu.
Ndakapa vandhu vangu mu nyara jo vavengi vavo.
8 Ndhaka yangu, yaita inga mbhondoro iri mu gwasha kwandiri.
Iyona yandibhongera.
Ndizvona zvakandiitisa kuti inini ndiinyenye.
9 Ndhaka yangu yakaita inga njerere* ino mavara kwandiri;Njerere jimweni jinoviya koihwisa mu mativi ese.
Zvinyama zvese zvo musora ngazviviye zviungane,Izvona ngazviviye kuzoha.
10 Vahavisi vazinji vakapeja munda wangu wo muuvha;Vocika-cika nyika yangu.
Vakaita kuti nyika yangu yandinoda ive cipare cicina ciro.
11 Nyika yangu yaacipare.
Iyona yaoma,Yaita inga mathere pamberi pangu.
Nyika yese yaamathere,Apana mundhu ari wese anoitaja.
12 Vaparaji vakaviya ngo mu makwanja ese o mucipare,Ngokuti banga ra Jehovha riri kupeja vandhu vese vo nyika iyi.
Akuna runyararo ku mundhu ari wese.
13 Vakasima tirigu asi vakakotora muzwa.
Vakashanda ngo simba asi apana cavakawana.
Ivona vanozopseruka ngo zviro zvavanozokotoraNgo ndava yo ushungu unobwaka wa Jehovha.”
14 Izvi ndizvona zvinonanga Jehovha ku vocigarisano vangu vese vakashata vanopsasa ndhaka yandakapa vandhu vangu Vaiziraeri kuti iite nyika yavo: “Inini ndiri kuvavhita mu nyika yavo. Ndinozovhitavo nyumba ya Judha pakati pavo.
15 Asi pasure po kuvavhita, ndinozovaitirazve usizi ndozoviisa umwe nga umwe wavo ku ndhaka yake no ku nyika yake.”
16 “Kudari ivona vakanasa kujija makwanja o vandhu vangu vopika ngo zina rangu veciti: ‘Tiri kupika ngo zina ra Jehovha Mwari anopona!’ Ngo maitiro ondhowo ovakajijisa vandhu vangu kuti vapike ngo zina ra Bhaari. Ivona vanozogara pakati po vandhu vangu.
17 Asi kudari ivona vakaramba kundizwira, inini ndinozovhita jinja rondhoro, ndinozorivhita no kuripeja,” izvi ndizvona zvinonanga Jehovha.
Masoko o Pasi
^ Kana: “nyamweve.”