Jeremiya 13:1-27
13 Jehovha wakandivhunja kudari: “Endai kootenga bhande rakaithwa ngo nguvo, urisunge mucihunu* mako, asi ucaribija ngo kumwa.”
2 Ngo kudaro, inini ndakatenga bhande mukuzwirana no zvakananga Jehovha, perapo ndorisungira mucihunu.
3 Jehovha wakandivhunjazve hwocipiri kudari:
4 “Torai bhande rowakatenga rawakasimiraro, uende ku murambo Eufrate, urivige kondhoyo mubako ro buwe.”
5 Ngo kudaro, inini ndakaenda ndoriviga phedo no Eufrate, inga zvandainga ndakavhunjwa ndi Jehovha.
6 Pasure po njiku jakawanda, Jehovha wakandivhunjazve kudari: “Endai ku murambo Eufrate, torai bhande randakakuvhunja kuti urivigireyo, uviye naro.”
7 Ngo kudaro, ndakaenda ku Eufrate, ndovhisa bhande pandainga ndakariviga, ndakavona kuti bhande rainga ravora, irona rainga ricikashandizve.
8 Ngo kudaro, Jehovha wakandivhunja kudari:
9 “Izvi ndizvona zvinonanga Jehovha: ‘Ngo njira yakafanana, ndinozopeja kujikuja ko Judha no kujikuja kukuru ko Jerusarema.
10 Vandhu ava vakashata vanoramba kuzwira masoko angu, vanoomesa musoro yavo vecitevera mwoyo yavo no kunamata zvimwari zvimweni. Ivona vanozvishandira no kugwadama pamberi pazvo. Vandhu ava vanozoezana no bhande iri ricikashandizve ciro.’
11 ‘Ngokuti kudari inga bhande rinobatana no cihunu co mundhu, mukufananavo, ndakaita kuti vandhu vese vo nyumba yo Iziraeri no vandhu vese vo nyumba ya Judha vabatane na inini,’ izvi ndizvona zvinonanga Jehovha ‘kuti vave vandhu vangu, kusimbhwa kwangu, rukujo hwangu no ciro cangu cakaseja. Asi ivona avazivi kuzwira.’
12 “Iwewe unodikanazve kuvavhunja kudari: ‘Izvi ndizvona zvinonanga Jehovha, Mwari wo Iziraeri: “Majuvi ese akakura anodikana kuzajwa ngo vhinyu.”’ Ivona vanozokudavira kudari: ‘Kureva kuti itusu atizvizivi kuti majuvi ese akakura anodikana kuzajwa ngo vhinyu?’
13 Ngo kudaro, vavhunjei kudari: ‘Izvi ndizvona zvinonanga Jehovha: “Ndinozoita kuti vagari vese vo nyika iyi, majimambo anogara pacigaro co umambo ca Dhavhidhi, vapiri, vaporofeti no vagari vese vo Jerusarema vadhakwe.
14 Ndinozovagura-gura no kuvatakanisa umwe no umweni, vabari pamwepo no vana,” izvi ndizvona zvinonanga Jehovha. “Andizovaitiri pena, andizohwajihwi nee andizovakhombijiri usizi, apana cinozondiita kuti nditame kuvaparaja.”’
15 Nasanyi kuteya njeve muzwe.
Mucajikuja, ngokuti Jehovha wakazvinanga.
16 Kujanyi Jehovha, Mwari wenyu,Iyena acito aviisa cidima,Murenje jenyu jicito jakhugunyika mu matundhu zuva parinonga recivira.
Imwimwi munozovetera ruvheneko,Asi iyena anozomuviisira cidima cakakura;Iyena anozocinja ruvheneko woita cidima cakakura maningi.
17 Kudari imwimwi mukaramba kuzwira,Inini ndinozocema mucifise-fise ngo ndava yo kujikuja kwenyu.
Ndinozobudisa musoji jakawanda, mu majiso angu munozoerera musoji,Ngokuti mushambi wa Jehovha waendeswa kuuranda.
18 Vhunjai mambo na mai wake kudari: ‘Garanyi pasi pandau yakaderera,Ngokuti korowa yenyu yakaseja inozowa kuvha mu musoro menyu.’
19 Madhorobha ese o kakusi apera kufungwa,* akuna mundhu ari wese anokwanisa kumafunungura.
Vandhu vese vo Judha vapera kutohwa kuendeswa kuuranda, akuna na umwe hake wakasara.
20 Musai majiso ako, uvone vari kuviya vecivha kanjikazi.
Uri kwapi mushambi wo mavhuta akaseja o wakapuwa?
21 Unozonangenyi paunozokhawiswaNgo shamwari jako jawakava najo kuvhira pakutanga?
Iwewe auzohwajihwi maningi inga kuhwajihwa kunoita mwanakaji ari kuda kubara?
22 Iwewe ukazonanga kudari mu mwoyo mako: ‘Ngenyi zviro izvi zvakandiitikira?’
Zivai kuti saya* yako yakavhuhwa ngo ndava yo kuposa kwako kukuru,Wohwajihwa maningi pa zvisisinindho zvako.
23 Kureva kuti Muetiyopiya* angacinja kori yo ganda rake?
Kureva kuti khamba ringacinja mavara aro?
Kudari zvinokwanisika, imwimwi muri kujijiswari kuita zviro zvakashata,Maizokwanisavo kuita zviro zvakanaka.
24 Ngo kudaro, inini ndinozovandhandhanisa inga maushwa ari kumburuswa mucipare.
25 Izvi ndizvona zvinozokuitikira, iri ndirona divi rako randinozokupa,” izvi ndizvona zvinonanga Jehovha,“Ngokuti iwewe wakandikanganwa, wothemba manyepo.
26 Ngo kudaro, ndinozomusa saya* yako mbhera yofukija kumeso kwako,Kupseruka kwako kunozovoneka.
27 Zviito zvako zvo upombo, kuemura kwakoNo uhure wako unonyoweja, zvinozovoneka.
Inini ndakavona mufambiro wako wakashata,Panyezuru po zvimatundhu no mu maminda.
Nyathwa kwauri iwewe Jerusarema!
Mbhera rini unoenderera mberi ucizivi kucena?”
Masoko o Pasi
^ Vonanyi Kudurujihwa ko Magama.
^ Kana: “kutendenejwa.”
^ Kana: “ciketi cako cakavhuhwa .”
^ Kana: “Kushi.”
^ Kana: “ciketi cako mbhera cofukija kumeso kwako.”
