Jeremiya 14:1-22
14 Jehovha wakavhunja Jeremiya masoko aya ngo pamusoro po kutama kuna ko nvura:*
2 Vandhu vo Judha vari kucema, musuvo jo Judha japera kuwa.
Ijona jakasuruvara, japera kuwa pasi.
Ku Jerusarema kuri kuzika kucema.
3 Majipatarau anotuma vashandi kuti vaende kocera kumwa.
Asi ivona vanoenda ku mwimbo,* voukhanda ucina kumwa.
Vanohwirira vano mujiyo jicina kumwa.
Ivona vanofukija musoro,Ngo ndava yo nyowa no kuhwajihwa.
4 Zvecivoneka kuti pasi pakamweka,Ngo ndava yo kutama kuna nvura mu nyika ino,Varimi avacazivi cokuita, ivona vanofukija musoro.
5 Pikija shoma* inoramwa vana vayo vatete musoraNgokuti amucina sora vishi.
6 Mbongoyo jo musora jinogara jakaima mu zvimatundhu zvicina sora.
Ijona jinoneseka pajinofema inga imbhwa jo musora;Majiso ajo aacavoni ushoni ngo ndava yo kutama zvokuha.
7 Pikija zvishaishi zvedu kamare,Zvinoita ucapupu wokuti itusu tino ndava,Jehovha Mwari wedu, itanyi ciri cese ngo ndava yo zina renyu.
Ngokuti zviito zvedu zvo kutama kugondeka zvakawanda maningi,Itusu takashaishira imwimwi.
8 Imwimwi Mwari vetero yo Vaiziraeri, Muponesi wavo pa mukuvo wo dambujiko,Ngenyi munoita inga mundhu wo nyikanja mu nyika ino,Inga mufambi waima kuti awane pokuvata co usiku?
9 Ngenyi munoita inga mundhu wavhiringijika,Inga musoca ano simba acikakwanisi kuponesa ari wese?
Ngokuti imwimwi Jehovha, muri pakati pedu,Itusu tinozivika ngo zina renyu.
Mucatisiya.
10 Izvi ndizvona zvinonanga Jehovha ngo pamusoro po vandhu ava: “Ivona vanoda kuherereka, avangwariri soka javo. Ngo kudaro, Jehovha aavadakariri. Wari iyena anozoceukija kuposa kwavo ozovatonga ngo ndava yo zvishaishi zvavo.”
11 Tevere Jehovha wakandivhunja kudari: “Ucaita mukumbiro kuti vandhu ava vaitihwe zvakanaka.
12 Pavanozira, inini andizwi kudeketera kwavo; pavanoita mupiro yo mucece no mupiro yo kupiswa azvindidakajisi, inini ndinozovapeja ngo banga, njara no ndhendha.”
13 Asi inini ndakati: “Maiwee Mambo Mukuru-kuru Jehovha! Vaporofeti vari kuvhunja vandhu kudari: ‘Imwimwi amuzovoni banga nee amuzozwi njara, ngokuti Mwari anozomupa runyararo wo cokwadi mu ndau ino.’”
14 Jehovha wakandivhunja kudari: “Vaporofeti vari kuporofeta zvokunyepa ngo zina rangu. Inini andizivi kuvatuma, nee kuvereketa navo nee kuvavhunja ciri cese. Ivona vari kuporofeta civoniso cokunyepa, kufembera zviro zvicikabeseri no manyepo anovha mu mwoyo mwavo kamare.
15 Ngo kudaro, izvi ndizvona zvinonanga Jehovha ngo pamusoro po vaporofeti vanoporofeta ngo zina rangu ndicizivi kuvatuma, vecinanga kuti akuzovi no banga nee njara mu nyika ino: ‘Vaporofeti ava, vanozouraiwa ngo banga no njara.
16 Mutembo jo vandhu vavari kuvhunja zviporofita izvi, jinozokhandihwa mu makwanja o Jerusarema ngo ndava yo njara no banga. Akuzovi no mundhu ari wese anozovafushira, nee ivona, nee kufushira vakaji vavo, vana vavo vorume no vana vavo vokaji. Ngokuti ndinozovadururira matambujiko avanofanera.’
17 “Unodikana kuvavhunja masoko aya:
‘Majiso angu ngaaenderere mberi ecierera musoji usiku no masikati,Ngokuti mwana wokaji wo* vandhu vangu wanyiswa mukuperera, okhuvazwa,Civonje cake cakakura maningi.
18 Kudari ndikabuda ndoenda mu maminda.
Ndiri kuvona vandhu vakauraiwa ngo banga!
Kudari ndikanghwina mu dhorobha,Ndiri kuvona ndhendha jakaviiswa ngo njara!
Ngokuti muporofeti no mupiri, vese vari kuherereka mu nyika yavacikazivi.’”
19 Kureva kuti marambadi kamare mukuperera Judha, monyenya Ziyoni?
Ngenyi matikhuvaza mu njira yakadari, totamazve kurapika?
Taiimira runyararo, asi akuna ciro cakanaka cakaviya.
Taiimira mukuvo wo kuraphwa, asi kuno ciro cinothyisa basi.
20 Jehovha Mwari wedu, itusu tinoziva zviro zvatakashaisha,Tinoziva kuposa kwakaita majicekuru edu,Ngokuti takashaishira imwimwi.
21 Ngo ndava yo zina renyu, mucatiramba;Mucashora cigaro cenyu co umambo cinoreremejwa.
Ceujanyi citenderano camakaita na itusu, mucacigura.
22 Kureva kuti zvithombe zviri zvese zvo majinja zvicina zvazvinobesera zvingatinisira nvura here?
Kureva kuti matenga , iwona basi, angakwanisa kutitumira nvura yakawanda here?
Jehovha Mwari wedu, asipi imwimwi basi munokwanisa kuita zviro izvi?
Itusu tinoimira imwimwi,Ngokuti ndimwi makaita zviro zvese izvi.
