Jeremiya 15:1-21
15 Tevere, Jehovha wakandivhunja kudari: “Pikija Mosi na Samweri vakaviya pamberi pangu, andicaizoitirepi unyasha vandhu ava. Vagogomerenyi pamberi pangu. Ngavapinde.
2 Kudari ivona vakakuvhunjisa kuti: ‘Tinozoenda kwapi?’ Iwewe unodikana kuvadavira kudari: ‘Izvi ndizvona zvinonanga Jehovha:
“Mundhu wese anodikana kuurawa ngo mutungu unouraya, anozofa ngo mutungu unouraya!
Mundhu wese anodikana kuurawa ngo banga, anozourawa ngo banga!
Mundhu wese anodikana kuurawa ngo njara, anozofa ngo njara!
Mundhu wese anodikana kwenda kuuranda, anozoenda kuuranda!”’
3 “‘Inini ndinozovatumira matambujiko marongomuna,’ izvi ndizvona zvinonanga Jehovha, ‘banga kuti rivauraye, imbhwa kuti jikhwekhwereje mutembo javo, shiri jo kumatenga no zvinyama zvo panyika kuti zvivahe no kuvapeja.
4 Inini ndinozovaita kuti vave ciro cinothyisa ku umambo wese wo panyika ngo ndava yo zviro zvakaithwa ndi Manase mu Jerusarema. Manase wainga mwana wa Ezekiya mambo wo Judha.
5 Ndiyani anozokuitira pena iwewe Jerusarema,Ndiyani anozokuzwira pena iwewe,Ndiyani anozoima kuti akucungamije?’
6 ‘Iwewe wakandisiya,’ izvi ndizvona zvinonanga Jehovha.
‘Iwewe uri kuenderera mberi wecindifuratira.
Ngo kudaro, ndinozokutambanujira nyara yangu, ndozokupeja.
Ndaremba kukuitira pena.
7 Inini ndinozovandhandhanisa inga ushwa unondhandhaniswa ngo mbhepo mu musuvo jo nyika ino.
Ndinozovasiya vacina vana.
Ndinozopeja vandhu vangu,Ngokuti ivona vakaramba kusiya makwanja avo.
8 Noni javo jinozowanda maningi pamberi pangu kupinda musanga wo mujombe.
Ndinozovaviisira muparaji no masikati, kuti aparaje majimai avo no majaha avo.
Ndinozovaviisira ngo civhumbu jowe-yowe no kuthya.
9 Mwanakaji wakabara vana vanomwe, wapera simba;Iyena anozodikana kuvangisira kuti afeme.
Zuva rake ravira, kuciri masikati,Zvomuita kuti anyowejwe no kudodokeswa.’
‘Vandhu vashoma vakasara pakati pavoNdinozovauraisa ngo banga pamberi po vavengi vavo,’ izvi ndizvona zvinonanga Jehovha.”
10 Mwari wangu, inini ndino dambujiko ngo ndava yo kubara kwamakandiita,Ngokuti ndaita ciro cinobara jowe-yowe no kutama kuzwana mu nyika yese.
Andizivi kushonga nee kushongeja;Asi pikija zvakadaro, vandhu vese vanondituka.
11 Jehovha wakati: “Kunasa kunanga inini ndinozokubesera;Kunasa kunanga, inini ndinozokuimirira ku muvengiPa mukuvo wo dambujiko no mukuvo wo kusuruvara.
12 Kureva kuti kuno mundhu anokwanisa kugura-gura simbi,Simbi inovha kanjikazi no utare here?
13 Ndinozoita kuti upfumi wako no zviro zvako zvese zvinosisira zvitohwe,Izvona zvinozotohwa zvicikapagahwi, ngo ndava yo zvishaishi zvako zvese zvowakaita mu ndharaundha jako jese.
14 Zviro izvi ndinozozvipa vavengi vako,Kuti ivona vazvitore vozviendesa ku nyika yaucikazivi.
Ngokuti ushungu hwangu hwabwakija muriro,Iwona unobwakira imwimwi.”
15 Jehovha Mwari wangu, imwimwi munonasa kuziva matambujiko angu,Ndiceukijenyi, rangariranyi ngo pamusoro pangu.
Hwirijiranyi vandhu vanonditeverera.
Mucandisiya ndecifa ngo ndava yo kusengerera kwenyu.
Ceukijanyi kuti inini ndinocijikira kutukwa uku ngo ndava yenyu.
16 Pandakawana masoko enyu, inini ndakamaha;Soko renyu rakadakajisa mwoyo wangu ndotamba ngo kudakara,Ngokuti inini ndinodaninja zina renyu, imwimwi Jehovha Mwari wo hondo.
17 Inini andidakariri kugara no vandhu vaya vanoda basi kubungaija.
Inini ndinogara ndega ngokuti nyara yenyu ina inini,Ngokuti imwimwi makandizaja ngo masoko o rutongeso.
18 Ngenyi kuhwaja kwangu akuperi?
Ngenyi civonje cangu acirapiki?
Icona acidi kuvoma.
Kureva kuti mungaita inga mwimbo ucina* kumwa kwandiri,Mwimbo ucikathembeki here?
19 Ngo kudaro, Jehovha anoti:
“Kudari iwewe ukahwirira, inini ndinozokudira pa ndau yako,Iwewe unozoima pamberi pangu.
Kudari iwewe ukasiyanisa zviro zvinosisira no zviro zvicikabeseriIwewe unozoita inga muromo wangu.*
Ivona vanozodikana kuhwirira kwauri,Asi iwewe auzohwiriri kovari.”
20 “Inini ndiri kukuita inga muru* wakavanga wo utare ku vandhu ava.
Ivona vanozohwisana na iwewe,Asi avazokunyisi,Ngokuti inini ndina iwewe kuti ndikuponese no kukusujunura,” izvi ndizvona zvinonanga Jehovha.
21 “Ndinozokusujunura mu nyara jo vandhu vakashata,Ndinozokuponesa mu canja co nyara co vandhu vakashata.”
