Jeremiya 16:1-21
16 Jehovha wakabhuyazve na inini eciti:
2 “Iwewe audikani kurovora mukaji nee kubara vana vorume no vokaji mu nyika iyi.
3 Ngokuti izvi ndizvona zvinonanga Jehovha ngo pamusoro po vana vorume no vokaji vanobahwa mu nyika iyi, ngo pamusoro po majimai anobara no majibaba anoita kuti vana ava vabahwe mu nyika iyi.
4 ‘Ivona vanozofa ngo ndhendha jinouraya, asi avazocumbwi nee apana anozovaviga; ivona vanozoita inga ndimo pa nyika. Ivona vanozouraiwa ngo banga no njara. Mutembo* javo jinozova zvokuha ku shiri no zvinyama zvomusora.’
5 Izvi ndizvona zvinonanga Jehovha:
‘Mucanghwina mu nyumba iri kuithwa mabuso’ o ciriro;Mucaenda ku nyumba yondhoyo kocema nee kocumba.’
‘Ngokuti ndavhisa runyararo hwangu ku vandhu ava’, izvi ndizvona zvinonanga Jehovha,‘Kubatanijavo no rudo hwangu hucikacinji no usizi hwangu.
6 Vakuru kubatanija no vadoko vanozofa mu nyika iyi,Avazovigwi,Nee apana anozovacema,Apana anozojiceka-ceka kana kujigunda mupara ngo ndava yavo.*
7 Apana anozopa zvokuha ku vaya vanonga vari pa ciriro,Kuti avanyaraje ngo ndava yo kufihwa kwavo;Nee apana anozovapa kopo yo vhinyu kuti avatondhoje,Kuti vamwe ngo ndava yo kufa ka baba vavo kana mai wavo.
8 Cimwenizve, mucanghwina mumba muri kuizwa mabuso,Kuti mugare pamwepo no vandhu kuti muhe no kumwa.’
9 “Ngokuti izvi ndizvona zvinonanga Jehovha wo hondo, Mwari wo Vaiziraeri: ‘Pa ndau iyi, inini ndinozopeja vaya vanokhuwa ngo kutamba na vaya vanokhuwa ngo kudakara, ndinozopeja izwi ro murovori no izwi ro murovohwi.’
10 “ Kudari iwewe ukavhunja vandhu ava masoko ese aya, ivona vanozokuvhunjisa kudari: ‘Ngenyi Jehovha wananga kuti tinozowihwa ngo dambujiko iri rakakura? Cicinyi catakaposa no kushaisha pamberi pa Jehovha Mwari wedu?’
11 Iwewe unodikana kuvadavira kudari: ‘“Ngokuti majicekuru enyu akandisiya”, izvi ndizvona zvinonanga Jehovha, “votevera zvimwari zvimweni, vozvishandira no kuzvigwadamira. Asi ivona vakandisiya, avazivi kuzwira mutemo wangu.
12 Imwimwi muri kuita zviro zvakashata kupinda zvakaithwa ngo majicekuru enyu. Kunja ko kundizwira, umwe na umwe wenyu ari kuita zviro mukuzwirana no mwoyo wake wakashata.
13 Ngo ndava ya izvi, inini ndinozomugogomera mu nyika iyi, ndomuendesa mu nyika yokuti nee imwimwi nee majicekuru enyu avacaizivepi. Kondhoyo, imwimwi munozoshandira zvimwari zvimweni usiku no masikati, ngokuti inini andizomukhombijiri unyasha.’”
14 “‘Ngo kudaro, jiri kuguma njiku’, izvi ndizvona zvinonanga Jehovha, ‘njiku jokuti amuzonangizve kudari: “Tiri kupika ngo zina ra Jehovha Mwari anopona, wiya wakavhisa jinja ro Vaiziraeri ku nyika yo Ejipita!”
15 Asi ivona vanozonanga kudari: “Tiri kupika ngo zina ra Jehovha Mwari anopona, wiya wakavhisa jinja ro Vaiziraeri ku nyika yo kanjikazi no mu nyika jese jaainga akarindhandhanisa!” Inini ndinozovahwirijazve mu nyika yavo, yandakapa majicekuru avo.’
16 ‘Ndiri kudaninja vaveji vakawanda’, izvi ndizvona zvinonanga Jehovha,‘Ivona vanozovaveja.
Perepo, ndinozodaninja vanyangi vakawanda,Ivona vanozovanyanga mu matundhu ese, mu zvimatundhu zveseNo mu mapako o mapuwe.
17 Majiso angu ari kuvona zviro zvese zvavanoita.
Ivona avazivi kuvigika kwandiri,Kuposa kwavo akuzivi kuvigika pamberi pangu.
18 Cokutanga, ndinozovahwirijira mukuperera mukuzwirana no kuposa kwavo no kushaisha kwavo,Ngokuti ivona vakasvipisa nyika yangu ngo zvithombe zvavo zvinonyangajisa zvicina upenyu.
Vakazaja ndhaka yangu ngo zviro zvavo zvinonyangajisa.’”
19 Jehovha Mwari wangu, imwimwi muri simba rangu no ndau yangu yakavanga,Muri citiziro cangu pa njiku yo dambujiko,Majinja anozoviya kwamuri ecivha kumagumo o nyika,Iwona anozonanga kudari: “Majicekuru edu akagara utaka wo manyepo acinganangiki,Zviro zvabiresi no zvicikasisiri, zvicina no zvazvinobesa.”
20 Kureva kuti mundhu anokwanisa kujiitira zvimwari zvake?
Zviro zvaanoita asipi zvimwari zvo cokwadi.
21 “Ngo kudaro, ndinozoita kuti ivona vazive,Hina, pa mukuvo uwu, ndinozoita kuti ivona vazive kuti inini ndino simba rakakura kamare,Ivona vanozoziva kuti zina rangu ndi Jehovha.”
Masoko o Pasi
^ Muviri wo mundhu wakafa.
^ Ici icirovejeso co cihedheni caiizwa pa ciriro ngo Vaiziraeri vakapanduka.
