Jeremiya 19:1-15
19 Jehovha wakandivhunja kudari: “Endai ku muumbi wotenga juvi ro dongo. Torai vakuru vamweni vo vandhu no vakuru vamweni vo vapiri,
2 endai mbhera ku Bani ro Mwana wa Hinomi, pamaghwiniro o Musuvo jo Vaiti vo Mbende. Zivisai kondhoyo masoko andinozokuvhunja.
3 Iwewe unozozivisa kudari: ‘Izwanyi soko ra Jehovha imwimwi majimambo o Judha no vagari vo Jerusarema. Izvi ndizvona zvinonanga Jehovha wo hondo Mwari wo Vaiziraeri:
“‘“Ndiri kuda kuviisa dambujiko mu ndau ino. Vandhu vese vanozozwa ngo pamusoro paro, vanozothya.*
4 Ndinozoita izvi ngokuti ivona vakandisiya, voita kuti ndau iyi itame kuzivika. Voitira mupiro ku zvimwari zvimweni mu ndau iyi, zvimwari zvokuti nee ivona, nee majicekuru avo, nee majimambo o Judha aacaizviziva, vouraya vandhu vakawanda maningi vacina ndava mu ndau iyi.
5 Ivona vakavaka ndau jakakhwirira ja Bhaari kuti vapise vana vavo inga mupiro kuna Bhaari, zviro zvandicikazivi kuvavhunja, kunanga nee kurangarira mu mwoyo mwangu.”’
6 “‘“Ngo kudaro, jiri kuguma njiku,” izvi ndizvona zvinonanga Jehovha, “njiku jokuti ndau iyi, aizodaninjwizve kuti Tofeti kana Bani ro mwana wa Himoni, asi inozodaninjwa Bani Rinouraihwa Vandhu.
7 Ndinozovhiringija mazano o vandhu vo Judha no vagari vo Jerusarema mu ndau iyi, ndinozoita kuti vauraiwe ngo banga ro vavengi vavo na vaya vanovapsaka kuti vavauraye. Ndinozoita kuti muviri javo jihiwe ngo shiri jo kumatenga no zvinyama zvo panyika.
8 Ndinozoita kuti dhorobha iri rive ciro cinothyisa no ciro cinoita kuti vandhu varije mundozva. Vandhu vanozopinda ndimona, vanozorisota vecithya, no kurija mundozva ngo ndava yo matambujiko aro ese.
9 Ndinozoita kuti ivona vahe vana vavo vorume no vokaji. Umwe na umwe wavo anozoha mudoni wake ngo ndava yo kutendenejwa no kuperehwa ngo mazano, pavanonga vatendenejwa ngo vavengi vavo no vandhu vaya vari kupsaka kuvauraya.”’
10 “Ngo kudaro, phwanyai juvi pamberi po vanarume wowakaenda navo
11 ovavhunja kudari: ‘Izvi ndizvona zvinonanga Jehovha wo hondo: “Inini ndinozopeja vandhu ava no dhorobha iri inga mundhu anophwanya juvi ro dongo, zvokuti narini arizokwanisiki kuzoumbwazve. Ivona vanozoviga vandhu vakafa mu Tofeti mbhera motama kuwanika ndau yo kuviga vandhu vakafa.”’
12 “‘Izvi ndizvona zvandinozoitira ndau iyi’ izvi ndizvona zvinonanga Jehovha, ‘pamwepo no vagari vo nyika iyi, kuti dhorobha iri riezane no Tofeti.
13 Nyumba jo Jerusarema no nyumba jese jo majimambo o Judha, jinozova jicizivi kucena inga ndau iyi yo Tofeti, hina, nyumba jese jainga no berere ro mudenga raishandiswa kuitira mupiro ku zviro zvese zvo kumatenga* vecidururira mupiro yo doro kuitira zvimwari zvimweni.”’
14 Jeremiya paakahwirira kuvha ku Tofeti, kwaainga akatumwa ndi Jehovha kuti aende kooporofetereyo, iyena wakaima pa ruvanje wo nyumba ya Jehovha, ovhunja vandhu vese kudari:
15 “Izvi ndizvona zvinonanga Jehovha wo hondo, Mwari wo Vaiziraeri: ‘Ndiri kuviisira dhorobha iri no madhorobha amweni ese akaritendeneja matambujiko ese andakazivisa ngo pamusoro paro, ngokuti vandhu varo vakavomesa musoro yavo, voramba kuzwira masoko angu.’”
Masoko o Pasi
^ Gama ngo Gama: “Rinozokwangura njeve jo vandhu vanozorizwa.”
^ Gama ngo Gama: “masoca ese o kumatenga.”
