Jeremiya 2:1-37
2 Jehovha wakandivhunja kudari:
2 “Endai, zivisai vandhu vo Jerusarema kudari: ‘Izvi ndizvona zvinonanga Jehovha:
“Inini ndinonasa kuceukija kujipira* kwawaikhombija pawainga mwana mudoko,Rudo hwawaikhombija pawakagondeswa kuti urovohwe,Kuzwira kwawaindiita muzvipare,Mu nyika icizivi kusimwa mbeu.
3 Iziraeri yainga yakacena kuna Jehovha, pakukotora kwayo mucero yayo yokutanga.”
‘Vese vaieja kuiparaja vaiva no ndava.
Dambujiko raivawira,’ izvi ndizvona zvinonanga Jehovha.”
4 Nyumba ya Jakobe no mbhuri jese jo vandhu vo Iziraeri,Izwanyi izwi ra Jehovha.
5 Jehovha anonanga kudari:
“Majicekuru enyu akavonenyi cakashata kwandiri,Cakavaita kuti vagare ndhambo maningi neni?
Vecinamata zvithombe zvicina zvazvinobesera, ivona veciezana na izvona.
6 Ivona avazivi kunanga kudari: ‘Ngatipsake Jehovha,Wiya wakativhisa mu nyika yo Ejipita,Wiya wakatitungamirira mu bani,Mu nyika ino zvipare no marindi,Mu nyika icina kumwa no ino cidima,Mu nyika icikafambhwi ngo vandhuMu nyika icikagahwi ngo vandhu.’
7 Ngo kudaro, inini ndakamuviisa mu nyika ino munda yo mucero,Kuti muhe mucero yayo no zviro zvayo zvakanaka.
Asi imwimwi makaguma pakusvipisa nyika yangu;Makaita kuti ndhaka yangu ive ciro cinosembhusa.
8 Vapiri avazivi kunanga kudari: ‘Ngatipsake Jehovha.’
Vaya vanojijisa vandhu mutemo avazivi kundizwira,Vahavisi vakandipandukira,Vaporofeti vakaporofeta ngo zina ra Bhaari,Ivona vakanamata zvimwari zvicikakwanisi kuvabesa.
9 ‘Ngo kudaro, ndinozoenderera mberi ndecimupa ndava,’ izvi ndizvona zvinonanga Jehovha,‘Ndinozopa ndava mubarihwana yenyu.’
10 ‘Ambukanyi jombe mbhera ku zvirundu zvo Kitimi kuti muvone.
Tumanyi mundhu aende ku Khedhari, munase kusotesesa;Vonanyi dangani zviro izvi zvakamboitikazve.
11 Kureva kuti kuno jinja riri rese rakambocinja zvimwari zvaro ngo zvimweni zviciripi zvimwari here?
Asi vandhu vangu kamare vakacinja rukujo hwangu ngo zviro zvicikabeseri.
12 Imwimwi matenga, sotesesanyi zviro izvi mushamaisike;Tetemeranyi ngo ndava yo kuthya maningi,’ izvi ndizvona zvinonanga Jehovha.
13 ‘Ngokuti vandhu vangu vakaita zviro zviviri zvakashata:
Ivona vakandisiya, inini mundhu anopa kumwa yo upenyu,Ivona vakaca marindi,Marindi* acikagari kumwa.’
14 ‘Kureva kuti Iziraeri mushandi here kana kuti muranda wakabarihwa pa muzi?
Waro ngenyi iyena wakaendeswa ku uranda?
15 Zvimbhondoro zvakamubhongera;Izvona zvakamumusira izwi.
Zvakaita kuti nyika yake ive ciro cinothyisa.
Madhorobha ake akapiswa, ogara acina vandhu.
16 Vandhu vo Nofi no vandhu vo Tapanesi vanopara pandhovhunyo po musoro wako.
17 Zviro izvi azvizivi kukuitikira ngoNdava yo kusiya Jehovha Mwari wako,Wiya waikutungamirira mu gwanja here?
18 Ngenyi wari iwewe uri kuda gwanja rinoenda ku EjipitaKuti umwe kumwa yo Shihori?*
Ngenyi uri kuda gwanja rinoenda ku AsiriyaKuti umwe kumwa yo murambo Eufrate?
19 Zviro zvakashata zvawakaita zvaidikana kukutova,Kutama kwako kugondeka kwaidikana kukupangira.
Zivai uvone kushata no kuhwaja kwazvinoitaKusiya Jehovha Mwari wako;Iwewe aundithyi,’ izvi ndizvona zvinonanga Mambo Mukuru-kuru Jehovha wo hondo.
20 ‘Ngokuti inini ndakagura-gura kanga yakoNo kudajura magaragajero ako kare.
Asi iwewe wakati: “Inini andizomushandiri,”Ngokuti iwewe waivata weciita upomboMu zvimatundhu zvese zvakakhwirira no pasi po muti yese yakapfikitira.
21 Inini ndakakusima inga muti wo muuvha jo kupsuka, uno mbeu yakanaka maningi;Waro ngenyi iwewe wazocinja kudari pamberi pangu wova matavi o muti o muuvha wo musora?’
22 ‘Pikija ukasamba ngo soda no sabau yakawanda,Ndava yako yaizoita inga vara pamberi pangu,’ izvi ndizvona zvinonanga Mambo Mukuru-kuru Jehovha.
23 Ngenyi iwewe ungananga kudari: ‘Andizivi kusvipa.
Andizivi kunamata zvithombi zva Bhaari.’
Vonai zviro zvawakaita mu bani.
Rangarijisisai zviro zvawakaita.
Iwewe wakaita inga kamera doko yokaji inogogoma maningi,Inogogoma kwenda ini na ini icikazivi kwainoenda.
24 Mbongoyo yokaji yo musora yaroveja kugara muzvipare.
Yecifema mbhepo yecida mbongoyo yorume.
Ndiyani angaikamisa painonga yecida mbongoyo yorume?
Vandhu vanopsaka mbongoyo avadikani kuremba.
Ivona vanozoiwana pa mweji wayo wo kuda mbongoyo yorume.
25 Ucaita kuti soka jako jifambe jicina sandariya*Nee ucatendera kuti dokoriro* rako rizwe nyota.
Asi iwewe wakati: ‘Haiwa! Azvina zvazvinobesera!
Inini ndakada zvimwari zvo nyikanja,Inini ndinozozvinamata.’
26 Inga kupseruka kunoita mbavha painowanika,Ndikona kupseruka kwakaita Vaiziraeri,Ivona, majimambo avo, vatungamiriri vavo,Vapiri vavo no vaporofeti vavo.
27 Ivona vanovhunja zimuti kudari: ‘Iwewe uri baba wangu,’Vovhunja buwe kudari: ‘Iwewe wakandibara.’
Asi ivona vanondipa goci, avandisoti.
Pa nguva yo dambujiko ravo ivona vanozonanga kudari,‘Tibesenyi, tiponesenyi!’
28 Waro, zviri kwapi zvimwari zvako zvawakajiitira?
Kudari zvecikwanisa, ngazvimuke zvikuponese dambujiko rako parinokugumira,Ngokuti zvimwari zvako zvakawanda maningi inga madhorobha ako, iwewe Judha.
29 ‘Ngenyi muri kuenderera mberi meciphikizana na inini?
Ngenyi makandipandukira imwimwi mwese?’ Izvi ndizvona zvinonanga Jehovha.
30 Ndakatambuja vana venyu, asi azvina zvazvakabesera.
Ivona avazivi kutendera kupangihwa;Banga renyu rakaparaja vaporofeti venyu,Inga mbhondoro inoparaja.
31 Imwimwi vo mubarihwana uwu, nasanyi kuteya njeve ku soko ra Jehovha.
Kureva kuti inini ndakaita inga cipare ku Vaiziraeri here?
Kana kuti ndakaita inga nyika ino cidima cinothyisa?
Ngokuti vandhu vangu ava, vakati: ‘Tiri kufamba tecienda kwatinoda.
Atizohwiririzve kwauri.’
32 Kureva kuti musikane angakanganwa zvinemeso zvake* here?
Kureva kuti murovohwi angakanganwa kurupeti yake?
Ngo kudaro, vandhu vangu vakandiramba ko njiku jakawanda jicikaverengeki.
33 Iwewe mwanakaji, wakanasa kunasirira gwanja rako wecipsaka mundhu kuti akude!
Iwewe wakajijijisa mu makwanja akashata.
34 Nguvo* jako jino sangi yo varombo no yo vandhu vacina ndava,Pikija hazvo andizivi kuvawana veciuraya mundhu,Sangi yavo iri pa nguvo jako jese.
35 Ngo kudaro, iwewe unoti: ‘Andina ndava.
Kunasa kunanga, iyena aazivi kundinyangajirihwazve.’
Wari, inini ndiri kukuviisira rutongesoNgokuti iwewe unoti: ‘Andizivi kushaisha.’
36 Ngenyi unorangarira kuti kucinja-cinja ko mugariro wako akuzivi kushata?
Iwewe unozopserukavo ngo ndava yo Ejipita,Inga manera owakapseruka ngo ndava yo Asiriya.
37 Ngo ndava ya izvi, iwewevo unozobuda wakabata musoro,Ngokuti Jehovha wakaramba vandhu vaya vaunothemba;Ivona avazoiti kuti iwewe ubudirire.”
Masoko o Pasi
^ Kana: “rudo hucikacinji hwawaikhombija.”
^ Kana: “Marindi akamweka. ”
^ Zvinoreva murambo unobuda mu murambo wa Niro.
^ Kana: “magwada.”
^ Kana: “rukuro wako uzwe nyota.”
^ Kana: “mbhandwe ingakanganwa zvinemeso zvayo.”
^ Kana: “Saya.”