Jeremiya 20:1-18
20 Pashuri mwana wa Imeri wainga mupiri, iyena waingazve mutungamiriri wo pa nyumba ya Jehovha. Wakazwa Jeremiya paakaporofeta zviro izvi.
2 Ngo kudaro, Pashuri wakataka muporofeti Jeremiya no kufungira murenje jake, mukono no musipa pa tabwa yainga no mabovo pa Musuvo wo Panyezuru wa Bhenjamini pa nyumba ya Jehovha.
3 Asi pa njiku yakatevera, Pashuri paakaenda kovhisa Jeremiya pa tabwa, Jeremiya wakamuvhunja kudari:
“Pashuri, Jehovha wacinja zina rako, wari iwewe unodaninjwa kuti Ciro Cinothyisa mu Mativi Ese.
4 Ngo kudaro, izvi ndizvona zvinonanga Jehovha: ‘Ndinozoita kuti iwewe uve ciro cinothysa pacako kamare no ku shamwari jako jese. Ivona vanozourawa ngo banga ngo vavengi vavo. Majiso ako kamare anozozvivona izvi. Inini ndinozoita kuti vandhu vese vo Judha vatohwe ndi mambo wo Bhabhironi, iyena anozovatora woenda navo kuuranda ku Bhabhironi wozovauraya ngo banga.
5 Ndinozoita kuti upfumi hwese hwo dhorobha iri, zviro zvavo zvese, zviro zvavo zvese zvinosisira pamwepo no upfumi hwese hwo majimambo o vajudha, zvitohwe ngo vavengi vavo. Vavengi vanozotora zviro zvese izvi vozviita zvavo voenda nazvo ku Bhabhironi.
6 Iwewe Pashuri no vese vanogara pa muzi pako, munozoenda kuuranda. Iwewe unozoenda ku Bhabhironi, unozofira kondhoyo wovigwa pamwepo no shamwari jako jese, ngokuti wakaporofeta manyepo kwavari.’”
7 Jehovha Mwari wangu, imwimwi makandicengeja, inini ndakacengejwa.
Imwimwi makavonesa kuti muno simba rakakura maningi kupinda inini perepo mowina.
Ndiri kusekwa njiku jese;Vandhu vese vari kundishora.
8 Ngokuti mukuwo wese wandinovereketa, ndinodikana kukhuwa no kuzivisa kudari:
“Uphanga no kuparaja!”
Inini ndiri kutukwa no kushohwa njiku jese ngo ndava yo soko ra Jehovha.
9 Ngo kudaro inini ndakati: “Andicazobhuizve ngo pamusoro pake,Nee andicazobhuizve ngo pamusoro po zina rake.”
Asi soko rake rakaita inga muriro unobwaka mu mwoyo mwangu, rosungihwa mu maphondo* angu,Pandairangarira kunyarara, ndakaremba;Ndainga ndicikakwanisizve kucungirira.
10 Inini ndakazwa zviro zvakashata zvainangwa ngo vandhu vakawanda;Ndakabatwa ngo kuthya.
“Mupumbhenyi; ngatimupumbhe!”
Mundhu wese waida kuti inini ndive no runyararo, waigara ecindisotesesa kuti zviro zvindishatire eciti:
“Kangaije iyena angaita ciro coupenji,Itusu tomunyisa no kumuhwirijira zviro zvakashata zvaakatiitira.”
11 Asi Jehovha wainga na inini inga musoca wakavanga anothyisa.
Ngo kudaro, vaya vanonditeverera vanozokhugunyika, ivona avazowini.
Ivona vanozonyowejeka maningi ngokuti avazobudiriri.
Kunyowejeka kwavo akuzoperi, ikona akuzokanganiki.
12 Asi imwimwi Jehovha Mwari wo hondo, munopopora mururami.
Munozovona murangariro jo mukati-kati pamwepo no mwoyo.
Vacamwirenyi inini ndecizvivona.
Ngokuti ndava yangu ndakaidira mu nyara jenyu.
13 Imbiranyi Jehovha! Simbanyi Jehovha!
Ngokuti iyena wakaponesa murombo mu nyara jo vandhu vakashata.
14 Ngaitukwe njiku yandakabahwa!
Njiku yandakabahwa ndi mai wangu, aivhiri kukomborehwa!
15 Ngaatukwe mundhu wakavisira babangu masoko akanaka eciti:
“Mwana wako wabahwa, iyena mwana worume!”
Ecivaiita kuti vadakare maningi.
16 Mundhu wondhowo ngaaezane no madhorobha akaparajwa ndi Jehovha acikamaitiri pena.
Iyena ngaazwe kucema ko vandhu no mangwanani no kurira ko mbayapaya yo hondo comasikati.
17 Ngenyi iyena aazivi kundiuraya mu ndani ma mai wangu,Kuti ndani ya mai wangu ive guva ranguKuti ivona vagare no mimba kwenda no kwenda?
18 Ngenyi ndakabahwa?
Kuti ndivone matambujiko no zviro zvinonyangajisa,Kuti ndipejise njiku jo upenyu hwangu ndecipseruka?
Masoko o Pasi
^ Vonanyi Kudurujihwa ko Magama.
