Jeremiya 21:1-14
21 Jehovha wakabhuya na Jeremiya pa mukuvo wokuti Zedhekiya wakatuma Pashuri mwana wa Marikija na Sofoniya mwana wa Maaseya, mupiri eciti:
2 “Ndapota, kumbiranyi Jehovha kuti atibesere, ngokuti Nebhukadhinezari mambo wo Bhabhironi, ari kuhwisana na itusu. Kangaije Jehovha anozoita amwe o mabasa ake anoshamaisa ngo ndava yedu, mambo Nebhukadhinezari voima kutihwisa.”
3 Jeremiya wakavadavira kudari: “Izvi ndizvona zvamunodikana kuvhunja Zedhekiya:
4 ‘Izvi ndizvona zvinonanga Jehovha, Mwari wo Vaiziraeri: “Ndiri kuita kuti zvijito zvenyu zvo hondo zviri mu nyara jenyu zvimuhwise, izvo zvamuri kushandisa kuti muhwise mambo o Bhabhironi no Vakaradhiya vakamutendeneja kunja ko muru*. Inini ndinozomaunganija pakati po dhorobha iri.
5 Inini kamare ndinozohwisana nemwi, ngo simba rangu rese no mukono wangu unosimba, ndakacamwa, ndino ushungu no hasha.
6 Ndinozouraya vagari vo dhorobha iri. Vandhu kubatanijavo no zvinyama zvinozofa ngo ndava yo ndhendha.”’
7 “‘“Pasure pa izvi”, izvi ndizvona zvinonanga Jehovha, “inini ndinozodira Zedhekiya mambo wo Judha, vashandiri vake no vandhu vo dhorobha iri, vaya vanozopona pa ndhendha, banga no njara, mu nyara ja Nebhukadhinezari mambo o Bhabhironi, munyara jo vavengi vavo no munyara ja vaya vari kuvapsaka kuti vavauraye. Iyena anozovauraya ngo banga. Aazohwajihwi ngo ndava yavo, aazovaitiri pena nee usizi.”’
8 “Iwewe unodikana kuvhunja vandhu ava kudari: ‘Izvi ndizvona zvinonanga Jehovha: “Ndiri kudira gwanja ro upenyu no gwanja ro rufu pambeji penyu.
9 Vaya vanozoenderera mberi vari mu dhorobha rino vanozofa ngo banga, njara no ndhendha. Asi wiya anobuda wojipekeja* ku Vakaradhiya, anozoenderera mberi ecipona.”’
10 “‘“Ngokuti inini ndaramba dhorobha iri, ngo kudaro, ndinozoriviisira dambujiko kuciripi zviro zvakanaka,” izvi ndizvona zvinonanga Jehovha. “Irona rinozodihwa mu nyara ja mambo o Bhabhironi, iyena anozoripisa ngo muriro.”
11 “‘Imwimwi vandhu vo nyumba ya mambo wo Judha: Izwanyi soko ra Jehovha.
12 Imwimwi vandhu vo nyumba ya Dhavhidhi, izvi ndizvona zvinonanga Jehovha:
“Tonganyi mu njira yakarurama mangwanani ese,Ponesanyi vaya vari kubihwa ngo vandhu vanobzinyirira,Kuti ushungu wangu utame kubwaka inga muriroNo kupisa ujikajimwi ngo mundhu ari weseNgo ndava yo zviito zvenyu zvakashata.”’
13 ‘Ndiri kukuhwisa iwewe mugari wo mubani,Na iwewe buwe ro mubani,’ izvi ndizvona zvinonanga Jehovha.
‘Imwimwi munoti: “Ndiyani anozoviya kotihwisa?
Ndiyani anozonghwina mu nyumba jedu?”
14 Asi inini ndinozomutongaMukuzwirana no zviito zvenyu,’ izvi ndizvona zvinonanga Jehovha.
‘Ndinozobasira muriro mu gwasha renyu,Iwona unozopisa zviro zvese zviri mumbhiripiri mo gwasha.’”
