Jeremiya 22:1-30
22 Jehovha wakandivhunja kudari: “Endai ku nyumba ya mambo wo Judha, umuvhunje masoko aya.
2 Unodikana kumuvhunja kudari: ‘Izwanyi soko ra Jehovha, imwimwi mambo wo Judha munogara pa cigaro co umambo ca Dhavhidhi, hina imwimwi, vashandiri venyu no vandhu venyu vanonghwina ngo musuvo iji.
3 Izvi ndizvona zvinonanga Jehovha: “Tonganyi mu njira yakarungama. Itanyi zvakarungama. Ponesanyi vaya varikubihwa mu nyara jo vabzinyiriri. Mucashaisha kutaja munyikanja nee amuvhiri kutambuja ndherera* no noni. Mucauraya mundhu acina ndava mu ndau iyi.
4 Ngo kudaro, kudari imwimwi mukanasa kuzwira masoko aya, majimambo anogara pa cigaro co umambo ca Dhavhidhi anozonghwina ngo pamusuvo po nyumba iyi akapakira pa ngoro* jo hondo no haci. Vanozonghwina no vashandiri vavo no vandhu vavo.”’
5 “‘Asi kudari imwimwi mukaramba kuzwira masoko aya, ndinopika ngo zina rangu,’ izvi ndizvona zvinonanga Jehovha, ‘kuti nyumba iyi inozoita mathere.’
6 “Ngokuti izvi ndizvona zvinonanga Jehovha ngo pamusoro po nyumba ya mambo wo Judha:
‘Iwewe wakaita inga Giriyadhi kwandiri,Inga panyezuru po Rebhanoni.
Asi ndinozokuita cipare;Madhorobha ako ese aazogari no vandhu.
7 Ndinozogaja vandhu kuti vakuparaje,Umwe na umwe anozova no cijito cake co hondo.
Ivona vanozotema mamuti ako akanaka o sedhroVomakhandira pa muriro.
8 “‘Majinja mazinji anozopinda ngo mudhorobha iri, vandhu vozovhunjisana kudari: “Ngenyi Jehovha waitira dhorobha iri rakakura zviro izvi?”
9 Ivona vanozodavira kudari: “Ngokuti vakasiya citenderano cavakaita na Jehovha Mwari wavo, vogwadamira zvimwari zvimweni vozvishandira.”’
10 Mucacema ngo ndava ya wiya wakafa,Nee amudikani kumuitira pena.
Kusiyapo izvi, cemanyi maningi ngo ndava ya wiya ari kupinda,Ngokuti iyena narini aazohwiririzve kuti avone nyika yaakabarihwa.
11 “Ngokuti izvi ndizvona zvinonanga Jehovha ngo pamusoro pa Sharumi mwana wa Josiya mambo wo Judha, ari kutonga pa ndau ya Josiya baba wake uwo wakavha mu ndau iyi: ‘Iyena narini aazohwiririzve.
12 Iyena anozofira ku nyika yaakaendeswa ku uranda, narini aazovonizve nyika iyi.’
13 Nyathwa kuna wiya anovaka nyumba yake mu njira icizivi kururamaNo kuvaka kwartu jake jo mudenga ngo njira icizivi kururama,Wiya anoita kuti mudoni wake amushandire biresi,Oramba kumupoceresa;
14 Wiya anoti: ‘Ndinozovaka nyumba yangu yakakuraIno makwartu o mudenga akakura.
Ndinozoidira majhanera.
Ndinozoidirazve matabwa o sedhro no kuipintari ngo tinta yo kori yokupsuka.’
15 Kureva kuti iwewe unozoenderera mberi wecitonga ngokuti uri kushandisa maningi muti jo sedhro kupinda vamweni?
Babako vaihavo no kumwa,Asi vaitonga mu njira yakanaka no kuita zviro zvakarurama,Zviro zvese zvaivafambira ushoni.
16 Ivona vaitonga ushoni ndava yo mundhu waitambujika no yo murombo,Zvoita kuti zviro zvese zvifambe ushoni.
‘Kureva kuti asipi izvi zvinovonesa kuti mundhu anondiziva?’ izvi ndizvona zvinonanga Jehovha.
17 ‘Asi majiso ako no mwoyo wako zvinoda basi kuwana zviro ngo njira icizivi kururama,Kuuraya vandhu vacina ndava,No kubira vandhu pamwepo no kuvatorera zviro zvavo.’
18 “Ngokuti izvi ndizvona zvinonanga Jehovha ngo pamusoro pa Jehoyakimi mwana wa Josiya mambo wo Judha:
‘Apana anozokucema eciti:
“Maiwee, hama yangu! Maiwee, hambzaji yangu!”
Apana anozokucema eciti:
“Maiwee, Mambo wangu! Maiwee, rukujo hwake hwapera!”
19 Iyena anozovigwa inga mavigihwe anoithwa mbongoyo,Iyena anozokhwekhwerejwa, okhandihwa ndhambo,Kunja ko musuvo yo Jerusarema.’
20 Endai kocema ku Rebhanoni,Khuwai ku Bhashani,Khuwai ku Abharimi,Ngokuti vese vanokuda vapera kucangajwa.
21 Inini ndakabhuya newe pawaijizwa wakajiviririka.
Asi iwewe wakati: ‘Andizozwiri.’
Iwewe uri kuita izvi kuvhira pa udoko hwako,Ngokuti auzivi kumbozwira izwi rangu.
22 Mbhepo inozohavisa vahavisi vako vese,Vaya vanokuda vanozoenda kuuranda.
Ngo kudaro, iwewe unozonyowejwa no kudodokeswa ngo ndava yo dambujiko rako rese.
23 Iwewe unogara mu Rebhanoni,Unoita saki yako pakati po mamuti o sedhro,Unozogomera maningi ukagumihwa ngo kuhwajihwa,Kuhwajihwa kwakaezana no ko mwanakaji ari kubara!”
24 “‘Ndinopika ngo zina rangu’, izvi ndizvona zvinonanga Jehovha, ‘pikija iwewe Koniya mwana wa Jehoyakimi mambo wo Judha nowainga mbhete ino cidhindho mu mukono wangu wo muho, inini ndaizokuvhisa!
25 Ndinozokudira munyara ja vaya vari kukupsaka kuti vakuuraye, mu nyara jo vandhu vaunothya, munyara ja Nebhukadhinezari mambo wo Bhabhironi no munyara jo Vakaradhiya.
26 Iwewe pamwepo na mai wako vakakubara, ndinozomuendesa ku nyika imweni, ku nyika yamucikazivi kubarihwa. Imwimwi munozofira kondhoyo.
27 Narini imwimwi amuzohwiririzve ku nyika yamunoda.
28 Kureva kuti mwanarume uu Koniya aazivi kuita inga cikari cakashohwa cophwanyiwa?
Mwanarume uu aazivi kuita inga mujiyo ucikadiwi ngo mundhu ari wese?
Ngenyi iyena no mubarihwana wake vakawiswa pasiVoendeswa ku nyika yavacikazivi?’
29 Iwewe nyika, nyika, nyika, izwai soko ra Jehovha.
30 Izvi ndizvona zvinonanga Jehovha:
Taranyi mwanarume uu inga mundhu acina vana,Inga mundhu acikazobudiriri mu upenyu,Ngokuti apana na umwe wo mubarihwana wake anozobudirira,Pakugara pacigaro co umambo ca Dhavhidhi otongazve mu Judha.’”
