Jeremiya 23:1-40
23 “Nyatwa ku vahavisi vanondhandhanisa no kupeja mavhuta o mahavo angu!” izvi ndizvona zvinonanga Jehovha.
2 Ngokuti izvi ndizvona zvinonanga Jehovha, Mwari wo Iziraeri ngo pamusoro po vahavisi vanohavisa vandhu vangu: “Imwimwi makandhandhanisa mavhuta angu. Imwimwi makamagogomera, motamazve kurangarira ngo pamusoro pawo.”
“Ngo kudaro, inini andizomuitiri pena ngo ndava yo zviito zvenyu zvakashata,” izvi ndizvona zvinonanga Jehovha.
3 “Ndinozounganija mavhuta angu akasara pakati po nyika yese kwandainga ndakamandhandhanisa, ndozomavisazve ku mahavo awo, iwona anozobarana, ozowanda maningi.
4 Ndinozoapa vahavisi vanozonasa kumahavisa kamare. Iwona aazotetemeri nee kuthya, apana na rimwe rawo rinozosvejeka,” izvi ndizvona zvinonanga Jehovha.
5 Jehovha anonanga kudari: “Vonanyi! Jiri kuguma njiku jokuti ndinozoita kuti Dhavhidhi ave no davi imbza rakarurama.* Mambo anozotonga, iyena anozokhombija uzivi no kujivirira urungami no ururami mu nyika.
6 Mu njiku jake, Judha anozoponeswa, Iziraeri anozogara akangwaririka. Iyena anozodaninjwa ngo zina iri: Jehovha Ndiyena Ururami Hwedu.”
7 “Ngo kudaro, jiri kuguma njiku,” izvi ndizvona zvinonanga Jehovha, “njiku jokuti amuzonangizve kudari: ‘Tiri kupika ngo zina ra Jehovha, Mwari anopona, wiya wakavhisa jinja ro Vaiziraeri mu nyika yo Ejipita!’
8 Asi ivona vanozonanga kudari: ‘Tiri kupika ngo zina ra Jehovha, Mwari anopona, wiya wakavhisa no kuhwirija mubarihwana wo Iziraeri mu nyika yo kanjikazi no mu nyika jese jondainga ndakaundhandhanisa, ivona vanozogara mu nyika yavo kamare.”
9 Iyena wakati ku vaporofeti:
Mwoyo wangu wakakhuvazika mukati mwangu.
Maphondo* angu ese ari kutetemera.
Ndakadari inga cidhakwaInga mundhu warejera ngo vhinyu,Ngo ndava ya Jehovha no masoko ake akacena.
10 Nyika iyi yakazara ngo vandhu vanoita upombo;Ngo ndava yo zviro zvakashata, nyika iyi iri kucemaMahavo o mubani aoma.
Zviito zvavo zvakashata. Ivona vanoshandisa simba ravo mu njira yakashata.
11 “Vaporofeti kubatanijavo no vapiri, avazivi kucena.
Pikija pamuzi pangu, inini ndakakhanda zvishaishi zvavo,” izvi ndizvona zvinonanga Jehovha.
12 “Gwanja ravo rinozosejemuka, rozoita cidima;Ivona vanozondundhwa, vozowa.
Ngokuti ndinozovaviisira dambujikoPa gore randinozovatonga,” izvi ndizvona zvinonanga Jehovha.
13 “Ndakavona ciro cinosembhusa pakati po vaporofeti vo Samariya.
Zviro zvovanoporofeta zvinovha kuna Bhaari,Ivona vanopausa Iziraeri jinja rangu.
14 Inini ndakavona zviro zvinothyisa pakati po vaporofeti vo Jerusarema.
Ivona vanoita upombo no kubhuya manyepo mukuvo wese;Vanobesera vaya vanoita zviro zvakashata,Ivona voenderera mberi veciita zviro zvakashata.
Kwandiri ivona vese vakaezana no Sodhoma,Vagari varo, vakadari inga Gomora.”
15 Ngo kudaro, izvi ndizvona zvinonanga Jehovha wo hondo ngo ndava yo vaporofeti:
“Ndinozovaita kuti vahe muti unovavaNdinozovapa kumwa ino nvenene kuti vamwe.
Ngokuti vaporofeti vo Jerusarema vakandhandhanisa manyepo mu nyika yese.”
16 Jehovha wo hondo anonanga kudari:
“Mucazwa masoko o vaporofeti ovari kumuporofetera.
Ivona vari kumucengeja.*
Vanobhuya ngo pamusoro po zvivoniso zvinovha mu mwoyo mavo kamare,Haiwa zvinovha pamuromo wa Jehovha.
17 Ivona vanophinda no kuphinda, vecivhunja vandhu vacikandireremeji kudari:
‘Jehovha wakananga kudari: “Imwimwi munozova no runyararo.”’
Ku vandhu vese vanotevera zvinoda mwoyo wavo ucikazwiri, ivona vanonangazve kudari:
‘Imwimwi amuzogumihwi ngo dambujiko riri rese.’
18 Asi ndiyani anoita divi ro cikwata co vandhu cino ushamwari wo phedo na JehovhaKuti avone no kuzwira soko rake?
Ndiyani anonasa kuzwisisa soko rake kuti arizwire?
19 Vonanyi! Zibepo ra Jehovha rinozovhunguza ngo ushungu;Inga dutu, irona rinozowira mu musoro mo vandhu vakashata.
20 Ushungu wa Jehovha auzohwiririMbhera iyena akwanirise no kuita zviro zvese zvinoda mwoyo wake.
Mu njiku jo kupejisira, imwimwi munozonasa kuzwisisa zviro izvi.
21 Inini andizivi kutuma vaporofeti, pikija zvakadaro, ivona vakaenda vecigogoma.
Inini andizivi kubhuya na ivona, pikija zvakadaro, ivona vakaporofeta.
22 Asi kudari ivona novaiita divi ro cikwata cino ushamwari wo phedo neniIvona vaizoita kuti vandhu vangu vazwe masoko anguVovabesera kuti vasiye gwanja ravo rakashata no zviito zvavo zvakashata.”
23 “Kureva kuti inini ndiri Mwari ari phedo basi here?”, izvi ndizvona zvinonanga Jehovha Mwari, “andiripivo Mwari wo ndhambo here?”
24 “Kureva kuti kuno mundhu anokwanisa kufindara ku ndau yandicikakwanisi kumuvona here?” izvi ndizvona zvinonanga Jehovha.
“Kureva kuti inini andizaji matenga no nyika here?” izvi ndizvona zvinonanga Jehovha.
25 “Inini ndakazwa vaporofeti vanoporofeta zviro zvokunyepa ngo zina rangu. Ivona vainanga kudari: ‘Inini ndarota! Inini ndarota!’
26 Mbhera rini kuporofeta zviro zvokunyepa kunozoenderera mberi kuri mu mwoyo jo vaporofeti? Ivona vanoporofeta zviro zvokunyepa zviri mu mwoyo mwavo.
27 Ivona vari kuda kuti vandhu vangu vakanganwe zina rangu ngo ndava yo hope javanovhunjana ngo cavo. Kudari inga zvakaithwa ngo majibaba avo akakanganwa zina rangu ngo ndava ya Bhaari.
28 Muporofeti anorota hope, ngaaverenge hope jaarotaro, asi wiya ano soko rangu ngaaverekete ngo pamusoro po soko rangu akagondeka.”
“Ushwa no mucece zvakaezana papi?” izvi ndizvona zvinonanga Jehovha.
29 “Soko rangu arizivi kuezana no muriro here?” izvi ndizvona zvinonanga Jehovha, “inga martera unophwanya-phwanya zibuwe?”
30 “Ngo kudaro, inini ndinohwisana no vaporofeti” izvi ndizvona zvinonanga Jehovha, “vaya vari kubirana masoko angu”.
31 “Inini ndinohwisana no vaporofeti” izvi ndizvona zvinonanga Jehovha, “vaya vanoshandisa rurumi hwavo kuti vanange kudari: “Iyena ari kuzivisa.”
32 “Inini ndiri kuhwisana no vaporofeti vanorota hope jokunyepa” izvi ndizvona zvinonanga Jehovha, “vaya vanojinanga no kucengeja vandhu vangu ngo manyepo avo no kujikuja kwavo”.
“Asi inini andizivi kuvatuma nee kuvavhunja ciri cese. Ngo kudaro, ivona avazobeseri vandhu ava ngo ciri cese,” izvi ndizvona zvinonanga Jehovha.
33 “Kudari mundhu ari wese o vandhu ava, muporofeti kana mupiri vakakuvhunjisa kudari: ‘Ngowapi muthwaro wa Jehovha?’* vadavirei kudari: ‘“Imwimwi muri muthwaro! Inini ndinozomurasa,” izvi ndizvona zvinonanga Jehovha.
34 Kudari muporofeti, mupiri kana mundhu ari wese o vandhu ava akananga kudari: ‘Uwu ndiwona muthwaro wa Jehovha!’* Inini ndinozohwisa mundhu wondhowo no vandhu vo pamuzi pake.
35 Umwe na umwe wenyu anovhunjisa shamwari yake no hama yake kudari: “Jehovha wadavira kudini? Jehovha wanangenyi?’
36 Asi mucazobhuyazve ngo pamusoro po muthwaro wa Jehovha,* ngokuti muthwaro imasoko a umwe nga umwe. Imwimwi makacinja masoko a Mwari anopona, Jehovha wo hondo, Mwari wedu.
37 “Unodikana kuvhunjisa vaporofeti kudari: ‘Jehovha wamudavirenyi? Jehovha wamuvhunja kudini?
38 Kudari imwimwi mukaenderera mberi mecinanga kudari: “Muthwaro wa Jehovha!”* Izvi ndizvona zvinonanga Jehovha: “Zvecivoneka kuti imwimwi munonanga kudari: ‘Soko iri ndirona muthwaro wa Jehovha.’* Pasure pokumuvhunja kuti: ‘Amudikani kunanga kudari: “Muthwaro wa Jehovha!”’*
39 Ngo kudaro, inini ndinozomumusa ndozomukhandira ndhambo na inini, imwimwi kubatanija no dhorobha randakapa imwimwi no majicekuru enyu.
40 Inini ndinozomupseruja no kumudodokesa kwenda no kwenda, kucikazokanganiki.”’”
Masoko o Pasi
^ Kana: “mundhu anozogara utaka.”
^ Vonanyi Kudurujihwa ko Magama.
^ Kana: “Ivona vari kuzaja murangariro yenyu ngo vetero yokunyepa.”
^ Kana: “Masoko a Jehovha anorema.” Soko iri ro Cihebheru rino revo mbiri: “matongero a Jehovha ano simba” kana kuti “ciro cinorema.”
^ Kana: “Aya ndiwona masoko anorema a Jehovha.”
^ Kana: “masoko anorema a Jehovha.”
^ Kana: “Masoko anorema a Jehovha.”
^ Kana: “Aya ndiwona masoko anorema a Jehovha.”
^ Kana: “Masoko anorema a Jehovha.”
