Jeremiya 24:1-10
-
Mafigu akanaka no mafigu akavora (1-10)
24 Ngo kudaro, Jehovha wakandikhombija zvitengu zviviri zvo mafigu, zvainga zvakadihwa pamberi po themberi ya Jehovha, Nebhukadhinezari* mambo wo Bhabhironi paakapera kuendesa kuuranda Jekoniya* mwana wa Jehoyakimi mambo wo Judha, kubatanijavo no vatungamiriri vo Judha, vavezi no vanyungurusi vo simbi. Iyena wakavatora kuvha ku Jerusarema ovaendesa ku Bhabhironi.
2 Citengu cimwe cainga no mafigu akanaka maningi, inga mafigu anotanga kuivha, asi citengu cimweni cainga no mafigu akavora maningi, akavoresesa zvokuti aacaihikepi.
3 Ngo kudaro, Jehovha wakandivhunjisa kudari: “Jeremiya, uri kuvonenyi?” Inini ndakamudavira kuti: “Ndiri kuvona mafigu; mafigu akanaka, akanaka maningi kamare, asi mafigu akavora, akavoresesa zvokuti aahiki.”
4 Ngo kudaro, Jehovha wakabhuya neni eciti:
5 “Izvi ndizvona zvinonanga Jehovha, Mwari wo Vaiziraeri: ‘Kudari inga mafigu aya akanaka, vandhu vo Judha vandakaendesa kuuranda, vandakavhisa mu nyika ino, ndovaendesa mu nyika yo Vakaradhiya, ndinozovavona inga vakanaka.
6 Inini ndinozoenderera mberi ndakavasotesesa kuti zviro zvivafambire ushoni, ndozovahwirija mu nyika ino. Ndinozovavangisa, andizovaparaji. Ndinozovaimisa, andizovavhiti.
7 Ndinozovapa mwoyo unozovabesera kuti vandizive, vanozoziva kuti inini ndini Jehovha. Ivona vanozova vandhu vangu, inini ndinozova Mwari wavo, ngokuti ivona vanozohwirira kwandiri ngo mwoyo wavo wese.
8 “‘Asi ngo pamusoro po mafigu akavora, akavoresesa zvokuti aahiki, izvi ndizvona zvinonanga Jehovha: “Zedhekiya mambo wo Vajudha, vatungamiriri vake no vashoma vakasara vari mu nyika ino mu Jerusarema na vaya vakaenda ku nyika yo Ejipita, ndinozovavona inga vakashata.
9 Ndinozoita kuti ave ciro cinothyisa no cinopseruja ku majimambo ese o panyika. Ivona vanozotukwa, kuithwa marethe, kushohwa no kuva muezaniso wo kutukwa mu ndau jese jandinovandhandhanisa.
10 Ndinozovatumira banga, njara no ndhendha mbhera vapere kufa mu nyika yandakapa ivona no majicekuru avo.”’”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
^ Anodaninjwavo Jehoyakini kana Koniya.
