Jeremiya 25:1-38
25 Mu gore ro cirongomuna rokutonga ra Jehoyakimi mwana wa Josiya mambo wo Judha, izvi zvinoreva gore rokutanga ro kutonga ka Nebhukadhinezari mambo wo Bhabhironi, Jeremiya wakaashira masoko ngo pamusoro po vandhu vese vo Judha.
2 Zvakanangwa ngo muporofeti Jeremiya ngo pamusoro po vandhu vese vo Judha no vandhu vese vo Jerusarema nga izvi:
3 “Kuvhira mu gore ro gumi na matatu ro kutonga ka Josiya mwana wa Amoni mambo wo Judha, mbhera nyamasi, inini ndiri kuashira masoko a Jehovha mukati mo makumaviri o makore no makore matatu. Ndinobhuya na imwimwi kuphinda no kuphinda, asi imwimwi amuzwi.
4 Jehovha waitumira kwamuri vashandiri vake vaporofeti kuphinda no kuphinda, asi imwimwi amucaizwepi nee amucaiteya njeve.
5 Ivona vainanga kudari: ‘Ndapota, umwe na umwe ngaasiye gwanja rake rakashata no zviito zvake zvakashata; mukadaro, imwimwi munozoenderera mberi mecipona ku mukuvo wakareba mu nyika yaakamupa Jehovha kare, imwimwi no majicekuru enyu.
6 Mucanamata zvimwari zvimweni, nee amudikani kuzvishandira, nee kugwadama pamberi pazvo mecindicamwisa ngo zviro zvamakaita ngo nyara jenyu; ngokuti mukaita izvi inini ndinozomuviisira matambujiko.’
7 “‘Asi imwimwi amucaindizwira,’ izvi ndizvona zvinonanga Jehovha. ‘Kusiyapo izvo, imwimwi maindicamwisa ngo zviro zvamakaita ngo nyara jenyu, mojiviisira mwega matambujiko.’
8 “Ngo kudaro, izvi ndizvona zvinonanga Jehovha: ‘“Zvecivoneka kuti imwimwi amuzivi kuzwira masoko angu,
9 ndiri kuviisa vandhu vese vo kanjikazi,” izvi ndizvona zvinonanga Jehovha, “ndiri kuviisa mushandiri wangu Nebhukadhinezari mambo wo Bhabhironi, ndiri kuvaviisa kuti vapeje nyika ino, vapeje vagari vayo no majinja ese akaitendeneja. Inini ndinozovapeja ndozovaita ciro cinothyisa, ciro cinothyisa cokuti vandhu vakacivona vanozorija mundozva. Ndau iyi inozoita mathere kwenda no kwenda.
10 Ndinozopeja kukhuwa ko vaya vanotamba no kukhuwa ka vaya vanodakara pakati pavo, ndinozopeja izwi ro murovori no ro murovohwi, ndozopejavo musindo unoizwa ngo gwiyo no ruvheneko hwo cibani.
11 Nyika iyi yese inozoita mathere, yozoita ciro cinothyisa, majinja ayo anozoshandira mambo wo Bhabhironi ko makumanomwe o makore.”’
12 “‘Asi pakupera ko makumanomwe o makore, ndinozotonga mambo wo Bhabhironi no jinja rondhoro ngo ndava yo kuposa kwaro,’ izvi ndizvona zvinonanga Jehovha, ‘ndozoita kuti nyika yo Vakaradhiya ive mathere kwenda no kwenda.
13 Ndinozotonga nyika iyi mukuzwirana no masoko ese andakabhuya ngo pamusoro payo, mukuzwirana no zviro zvese zvakaporofetwa ndi Jeremiya kuitira majinja ese zvakatahwa mu bhuku iri.
14 Ngokuti majinja mazinji no majimambo ano simba anozomuita varanda. Inini ndinozomuhwirijira mukuzwirana no zviito zvenyu no mabasa o nyara jenyu.’”
15 Jehovha Mwari wo Vaiziraeri wakandivhunja kudari: “Torai kopo iri mu nyara mangu yo vhinyu yo ushungu hwangu, woita kuti majinja ese andinozokutumira amwe vhinyu iyi.
16 Ivona vanozomwa voita mapenji, vothethereka ngo ndava yo banga randiri kuvatumira.”
17 Ngo kudaro, ndakatora kopo mu nyara ya Jehovha, ndoimwisa majinja ese ondakatumihwa ndi Jehovha:
18 Kutanga ngo Jerusarema no madhorobha o Judha, majimambo aro no vatungamiriri varo kuti zvive mathere, ciro cinothyisa, ciro cinorijisa mundozva no muezaniso wo ciro catukwa, inga zviri kuvoneka nyamasi;
19 kozoteveravo Faro mambo wo Ejipita no vashandiri vake, vatungamiriri vake no vandhu vake vese,
20 no vandhu vese vo majinja akasiyana-siyana vari pakati pavo; majimambo ese o nyika yo Uzi, majimambo ese o nyika yo Vafiristi, Ashikeroni, Gaza, Ekironi no vandhu vese vakasara ku Ashidhodhi;
21 Edhomi, Mowabhi no Vaamoni;
22 majimambo ese o Tiro, majimambo ese o Sidhoni no majimambo ese o cirundu ciri mu jombe;
23 Dhedhani, Tema, Bhuzi no vandhu vese vakagundhwa mashasha avo;*
24 majimambo ese o Vaarabhiya no majimambo ese o majinja akasiyana-siyana anogara mu cipare;
25 majimambo ese o Zimiri, majimambo ese o Erami no majimambo ese o Medhiya;
26 majimambo ese o kanjikazi ari phedo no ari ndhambo, umwe pasure po umweni no umambo humweni hwese hwo nyika huri pasi pano; mambo wo Sheshaki* anozomwavo ivona vakapeja kumwa.
27 “Iwewe unodikana kuvavhunja kudari: ‘Izvi ndizvona zvinonanga Jehovha wo hondo, Mwari wo Vaiziraeri: “Imwanyi, dhakwanyi, rucanyi no kuwa mokonehwa no kumuka ngo ndava yo banga randiri kumutumira.”’
28 Kudari ivona vakaramba kubata kopo iri mu nyara mako kuti vamwe, vavhunjei kudari: ‘Jehovha wo hondo anonanga kuti: “Imwimwi munodikana kumwa!
29 Ngokuti kudari dambujiko randiri kuviisa riri kutanga ngo dhorobha rinodaninjwa ngo zina rangu, kureva kuti imwimwi maizotama kupanicwavo here?”’
“‘Imwimwi amuzotami kupanicwa, ngokuti ndiri kudaninja banga kuti rizohwise vagari vese vo panyika,’ izvi ndizvona zvinonanga Jehovha wo hondo.
30 “Iwewe unodikana kuporofeta masoko ese aya kovari, wecivavhunja kudari:
‘Jehovha anozobhonga ari ku ndau yake yakakhwira,Ari ku ndau yake yakacena, anozoita kuti izwi rake rizike.
Iyena anozobhongera ndau yake yaanogara ngo simba.
Iyena anozokhuwa inga vandhu vanosvina uvha mu ndau inosvinihwa uvha.
Iyena anozoimba ndumbo yo kunyisa vagari vese vo panyika.’
31 ‘Joweyowe guru rinozoguma mbhera kumagumo o nyika,Ngokuti Jehovha ari kuda kutonga majinja.
Iyena pacake anozotonga vandhu vese.
Wozoita kuti vandhu vakashata vaurawe ngo banga,’ izvi ndizvona zvinonanga Jehovha.
32 Jehovha wo hondo anonanga kudari:
‘Vonanyi! Dambujiko riri kugumira jinja rimwe nga rimwe,Zibepo guru riri kuviya recivha ku mativi ari ndhambo o nyika.
33 “‘Vaya vanourawa ndi Jehovha pa njiku yondhoyo, vanozoti ndha-ndha-ndha pasi pese. Ivona avazocemwi, avazounganijwi nee kuzocihwa. Ivona vanozoita ndimo yo panyika.’*
34 Cumbanyi no kucema imwimwi vahavisi!
Burukutanyi pasi, imwimwi vatungamiriri vo mushambi,Ngokuti yazoguma njiku yenyu kuti mundhandhaniswe no kuurawa,Imwimwi munozova inga mujiyo unosisira!
35 Vahavisi avana ndau yokutizira,Nee vatungamiriri vo mushambi avana ndau yokutizira.
36 Izwanyi! Vahavisi vari kukhuwa,Vatungamiriri vo mushambi vari kucumba,Ngokuti Jehovha wapeja mahavo avo.
37 Ndau jokugara jino runyararo, jasiiwa jicina ciro cino upenyu,Ngo ndava yo ushungu unobwaka wa Jehovha.
38 Iyena wakavha pa ndau yake yaanogara inga cimbhondoro cino simba,Nyika yavo yakava ciro cinothyisaNgokuti iyena wauraya vandhu vazinji ngo bangaNgo ndava yo ushungu wake unobwaka.”
Masoko o Pasi
^ Mashasha ivhuji rinomera kuvha mu musoro robatana no ndevhu.
^ Iri rinoita inga zina rinomatarihwe aishandisihwa Bhabheri (Bhabhironi).
^ Gama ngo Gama: “mavhu.”
