Jeremiya 27:1-22
27 Pa mukuvo wakatanga kutonga Jehoyakimi, mwana wa Josiya mambo wo Judha, Jeremiya wakaashira soko ra Jehovha reciti:
2 “Jehovha wakandivhunja kudari: ‘Nasirirai mapote no kanga, uzvidire mu musipa mako.
3 Tevere zvitumirei kuna mambo wo Edhomi, kuna mambo wo Mowabhi, kuna mambo wo Vaamoni, kuna mambo wo Tiro, na mambo wo Sidhoni wecishandisa ndhumwa jakaviya ku Jerusarema kuti jizosongane na Zedhekiya mambo wo Judha.
4 Vavhunjei kuti ivona vavhunjevo majipatarau avo kudari:
“‘“Izvi ndizvona zvinonanga Jehovha wo hondo Mwari wo Vaiziraeri, imwimwi munodikana kuvhunja majipatarau enyu masoko aya:
5 ‘Ndini ndakaita nyika, vandhu no zvinyama zviri pa nyika, ndecishandisa simba rangu guru no mukono wangu wakavanga. Inini ndinozvipa wandinoda.
6 Zvino wari, ndapa nyika jese mushandiri wangu Nebhukadhinezari, mambo wo Bhabhironi. Ndamupavo zvinyama zvo musora kuti zvimushandire.
7 Majinja ese anozoshandira iyena, mwana wake no muzukuru wake mbhera ugume mukuvo wo kupera ko jinja rake, pa mukuvo wokuti majinja akawanda ano majimambo ano simba anozomuita muranda.’
8 “‘“‘Kudari jinja riri rese kana umambo uri wese ukaramba kushandira Mambo Nebhukadhinezari mambo wo Bhabhironi, oramba kudira musipa wawo pasi po kanga ya mambo wo Bhabhironi, inini ndinozopanica jinja rondhoro ngo banga, njara no ndhendha, izvi ndizvona zvinonanga Jehovha, ‘mbhera ndivapeje ndecishandisa nyara yake.’
9 “‘“‘Ngo kudaro, mucazwira vaporofeti venyu, vafemberi venyu, vandhu venyu vanorota vecinanga revo yo hope, vandhu vanoita zvomasaramuso no varoi vecimuvhunja kudari: “Imwimwi amuzoshandiri mambo wo Bhabhironi.”
10 Ngokuti ivona vari kuporofeta manyepo kwamuri. Ngo ndava yazvo, imwimwi munozotohwa moendeswa ndhambo no nyika ino. Inini ndinozomundhandhanisa, imwimwi munozopejwa.
11 “‘“‘Asi jinja rinodira musipa waro pasi po kanga ya mambo wo Bhabhironi romushandira, inini ndinozorisiya* mu nyika maro,’ izvi ndizvona zvinonanga Jehovha, ‘kuti ririme no kugaremo.’”’”
12 Inini ndakavhunjavo Zedhekiya mambo wo Judha masoko ondhowo, ndeciti: “Diranyi musipa wenyu pasi po kanga ya mambo wo Bhabhironi, mushandire iyena no vandhu vake, imwimwi munozoenderera mberi mecipona.
13 Ngenyi imwimwi no vandhu venyu maidikana kufa ngo banga, njara no ndhendha, inga zvakanangwa ndi Jehovha ngo pamusoro po jinja raizoramba kushandira mambo wo Bhabhironi?
14 Mucateya njeve ku masoko anonangwa ngo vaporofeti, veciti: ‘Imwimwi amuzoshandiri mambo o Bhabhironi,’ ngokuti ivona vari kuporofeta masoko okunyepa kwamuri.
15 “‘Ngokuti inini andizivi kuvatuma,’ izvi ndizvona zvinonanga Jehovha, ‘asi ivona vari kuporofeta zviro zvokunyepa vecishandisa zina rangu. Inga muviyo, inini ndinozomundhandhanisa, imwimwi munozopejwa, imwimwi no vaporofeti vari kumuvhunjari zviro izvi.’”
16 Ku vapiri no ku vandhu vese ava inini ndakati: “Izvi ndizvona zvinonanga Jehovha: ‘Mucateya njeve ku masoko o vaporofeti venyu, ivona vari kuporofeta kwamuri vecinanga kudari: “Vonanyi! Mujiyo jo nyumba ya Jehovha jinozoviiswa ngo kukasika kuvha ku Bhabhironi!” Ngokuti ivona vari kuporofeta zviro zvokunyepa kwamuri.
17 Mucazwa zvavanonanga. Shandiranyi Mambo wo Bhabhironi kuti muenderere mberi mecipona. Ngenyi dhorobha iri raizova mathere?
18 Asi kudari ivona ivaporofeti kana soko ra Jehovha rina ivona, ndapota, ngavadeketerere Jehovha wo hondo kuti mujiyo jakasara pa nyumba ya Jehovha, pa nyumba ya mambo wo Judha no mu Jerusarema jitame kutohwa joendeswa ku Bhabhironi.’
19 “Ngokuti izvi ndizvona zvinonanga Jehovha wo hondo ngo pamusoro po njiki jo mapuwe, basiya guru ro utare, zvikarinya no mujiyo jimweni jakasara mu dhorobha rino,
20 zviro zvicizivi kutohwa ndi Nebhukadhinezari mambo o Bhabhironi, pa mukuvo waakatora Jekoniya mwana wa Jehoyakimi mambo o Judha, kuvha ku Jerusarema kwenda kuuranda ku Bhabhironi, pamwepo no vandhu vese vanoreremejwa vo Judha no vo Jerusarema;
21 hina, izvi ndizvona zvinonanga Jehovha wo hondo, Mwari wo Vaiziraeri, ngo pamusoro po zviro zvakasara pa nyumba ya Jehovha , pa nyumba ya mambo wo Judha no mu Jerusarema:
22 ‘“Ivona vanozotohwa kwenda ku Bhabhironi, vozogara kondhoyo mbhera njiku yandinozorangarira ngo pamusoro pavo” izvi ndizvona zvinonanga Jehovha. “Ngo kudaro, inini ndinozovaviisa ndozovadira pa ndau iyi.”’”
Masoko o Pasi
^ Gama ngo Gama: “ndinozorizoroja.”
