Jeremiya 3:1-25
3 Vandhu vanoti: “Kudari mwanarume akapindisa mukaji wake, mukajiwo womusiya, woenda korovohwa ngo mwanarume umweni, kureva kuti mwanarume wiya angahwirirazve kwaari?”
Kureva kuti nyika iyi, aizivi kusvipiswa mukuperera here?
Jehovha anoti: “Iwewe wakaita upombo no vanarume vazinji,Waro, ungadazve kuhwirira kwandiri?”
2 “Musai majiso uvone zvimatundhu zvicina sora.
Indau yapi yaucizivi kuvatwa ngo vanarume?
Iwewe waigara mumbhiripiri mo citaka wecivaimira,Inga mundhu acina pokugara* mubani.
No kuenderera mberi wecisvipisa nyika iyi,Ngo uhure hwako no zviito zvako zvakashata.
3 Ngo ndava yazvo, nvura airipi kuna,Nee airipi kuna pa mukuvo wo kutondhora.*
Magariro ako, akaita inga o mwanakaji anoita upombo;Iwewe autonyowejeki.
4 Wari iwewe uri kundidaninja weciti,‘Babangu, imwimwi muri shamwari yangu kuvhira pandainga ndiri mudoko!
5 Munodikana kugara makacamwa kwenda no kwenda?
Kana kugara makaviga bundu mukuvo wese?’
Izvi ndizvona zvaunonanga,Asi iwewe unoenderera mberi weciita zviro zvese zvakashata zvaunokwanisa kuita.”
6 Mu njiku jo kutonga ka mambo Josiya, Jehovha wakandivhunja kudari: “‘Iwewe wavona zvaitwa ngo Iziraeri icizivi kugondeka. Iyena wakakhwira pa dundhu rimwe nga rimwe rakareba, woenda pasi po muti umwe nga umwe wakapfikitira kuti aite upombo.
7 Pikija paakapera kuita zvese izvi, inini ndakaenderera mberi ndecimuvhunja kuti ahwirire kwandiri, asi iyena wakaramba. Judha waivona hambzaji yake yeciita zviro zvinocengeja.
8 Pandakavona izvi, ndakapindisa Iziraeri icizivi kugondeka, ndoipa tsamba yo kurambana ngo ndava yo upombo hwake. Asi iwewe Iziraeri, hambzaji yako Judha inocengeja, aizivi kuthya. Iyona yakatanga kuitavo upombo.
9 Iyena* wakavona kuti upombo hwake auzivi kushata. Wakasvipisa nyika yondhoyo no kuita upombo no mapuwe no mamuti.
10 Pikija no zvese izvi, hambzaji yako inocengeja Judha, aizivi kuhwirira kwandiri ngo mwoyo wese, asi yakaviya kwandiri ngo kundifaeresa,*’ izvi ndizvona zvinonanga Jehovha.”
11 Ngo kudaro, Jehovha wakandivhunja kudari: “Iziraeri icizivi kugondeka yakajivonesa kuti yakarurama maningi kupinda Judha anocengeja.
12 Endai, uzivise masoko aya kanjikazi:
“‘“Hwirirai kwandiri, iwewe Iziraeri mupanduki,” izvi ndizvona zvinonanga Jehovha.’ ‘“Inini andizomusoti ndakanyangajwa, ngokuti inini ndakagondeka,” izvi ndizvona zvinonanga Jehovha.’ ‘“Andizoendereri mberi ndakacamwa mbhera narini.
13 Asi iwewe tenderai kuti uno ndava, ngokuti wakapandukira Jehovha Mwari wako. Iwewe wakaenderera mberi wecivatana no vanarume vo nyikanja pasi po mamuti ese akakura anopfikitira. Iwewe wakaenderera mberi wecivatana no vanarume vo nyikanja. Asi imwimwi amuzivi kuzwira izwi rangu,” izvi ndizvona zvinonanga Jehovha.’”
14 “Hwiriranyi, imwimwi vana vakapanduka,” izvi ndizvona zvinonanga Jehovha. “Ngokuti inini ndava mune wenyu* wocokwadi kamare. Ndinozotora umwe kuvha ku dhorobha rimwe no vaviri kuvha ku mbhuri imwe, ndozomuviisa ku Ziyoni.
15 Ndinozomupa vahavisi vanoita zvandinoda, ivona vanozomuhavisa ngo zivo no kuzwisisa.
16 Mu njikujo, imwimwi munozova no vana vakawanda mu nyikemo,” izvi ndizvona zvinonanga Jehovha. “Vandhu avazonangizve kudari: ‘Bhokiso ro citenderano ra Jehovha!’ Avazorirangariri, avazoriceukiji nee avazovi no dandha naro. Irona arizoitwizve.
17 Mu mukuvo uu, vanozodaninja Jerusarema kuti ndi cigaro co umambo ca Jehovha. Majinja ese anozounganijwa mu Jerusarema kuti asimbe zina ra Jehovha. Avazoendererizve mberi veciita zviro zvakashata.”
18 Mu njikujo, vandhu vo Judha no vandhu vo Iziraeri vanozofamba pamwepo, vese vanozovha ku nyika yo kanjikazi voenda ku nyika yandakapa majicekuru enyu inga ndhaka.
19 Inini ndakarangarira kudari: ‘Ndadakara ngo kukudira pakati po vana vangu no kukupa nyika yakanaka. Ndhaka yakanaka maningi pakati po majinja!’ Inini ndakarangarirazve kuti imwimwi maizondidaninja kuti ‘Babangu,’ mozotamazve kundisiya.
20 ‘Asi zvokadi ngo zvokuti, kudari inga mwanakaji anocengeja mwamunake womusiya, imwimwi vo nyumba yo Iziraeri, makandicengeja,’ izvi ndizvona zvinonanga Jehovha.”
21 Mu zvimatundhu mucina sora, muri kuzika izwi,Muri kuzika kucema no kudeketera ko vandhu vo Iziraeri,Ngokuti ivona vakapeyamisa gwanja ravo.
Ivona vakakanganwa Jehovha Mwari wavo.
22 “Hwiriranyi kwandiri, imwimwi vana vanopanduka.
Inini ndinozomurapa kuti mutamezve kupanduka.”
“Tiri pano! Taviya kwamuri,Ngokuti imwimwi Jehovha, ndimwi Mwari wedu.
23 Kunasa kunanga, itusu takazvicengeja patakakhuwa mu zvimatundhu no mu matundhu.
Kunasa kunanga, ruponeso wo Iziraeri, unovha kuna Jehovha Mwari wedu.
24 Asi kuvhira patainga tiri vana vadoko, ciro cinopseruja,* ciri kupeja zviro zvese zvokuti majicekuru edu akazvishanda ngo simba,Mavhuta avo no n’gombe javo,Vana vavo vorume no vana vavo vokaji.
25 Ngativate pasi ngo ndava yo kupseruka kwedu,Tojifukija ngo ndava yo kupseruka kwedu,Ngokuti takashaishira Jehovha Mwari wedu,Itusu pamwepo no majibaba edu, kuvhira patainga vadoko mbhera nyamasi,Atizivi kuzwira izwi ra Jehovha Mwari wedu.”
Masoko o Pasi
^ Gama ngo Gama: “Inga Muarabhiya.”
^ Kana: “cipepo.”
^ Kangaije: “pari kunangira Iziraeri.”
^ Kana: “kundiungwisa.”
^ Kangaije: “mwamunako.”
^ Kana: “cimwari cinopseruja.”
