Jeremiya 32:1-44
32 Mu gore ro cigumi ro kutonga kwa Zedhekiya Mambo wo Judha, zvinoreva mu gore ro cigumi na sere ro kutonga ka Nebhukadhinezari,* Jeremiya wakaashira soko ra Jehovha.
2 Pa mukuvo wondhowo, masoca a mambo o Bhabhironi aitendeneja Jerusarema. Muporofeti Jeremiya wainga akafungihwa pa Ruvanje wo Varindiri, pa nyumba ya mambo wo Judha.
3 Ngokuti Zedhekiya mambo wo Judha, wainga akamufungira eciti: “Ngenyi iwewe uri kuporofeta zviro izvi? Iwewe unoti: ‘Izvi ndizvona zvinonanga Jehovha: “Ndinozodira dhorobha iri mu nyara ja mambo o Bhabhironi, iyena anozoritora;
4 na Zedhekiya mambo wo Judha aazoponi mu nyara jo Vakaradhiya, ngokuti iyena nee kudini anozodihwa mu nyara ja mambo o Bhabhironi, ozobhuya naye meso ngo meso vakasotana.”’
5 ‘Iyena anozotora Zedhekiya woenda naye ku Bhabhironi. Iyena anozoenderera mberi ari kondhoyo mbhera inini ndirangarirezve ngo pamusoro pake,’ izvi ndizvona zvinonanga Jehovha. ‘Pikija imwimwi mukaenderera mberi mecihwisana no Vakaradhiya, amuzobudiriri.’”
6 Jeremiya wakati: “Jehovha wakandivhunja kudari:
7 ‘Anameri mwana wa Sharumi hama ya babako anozoviya kwauri wokuvhunja kudari: “Tengai munda wangu uri ku Anatoti, ngokuti iwewe ndiwe uri pakutanga pa vandhu vano citendehwa co kutenga munda uwu.”’”
8 Kudari inga zvaainga akananga Jehovha, Anameri mwana wo hama ya babangu wakaviya kwandiri pa Ruvanje wo Varindiri ondivhunja kudari: “Ndabata murenje, tengai munda wangu uri ku Anatoti, mu nyika ya Bhenjamini. Ngokuti iwewe uno citendehwa cokuutenga kuti uite wako. Utengei uite wako.” Ngo kudaro, inini ndakazwisisa kuti masoko aya aivha kuna Jehovha.
9 Ngo kudaro, inini ndakatenga munda wainga ku Anatoti wa Anameri mwana wo hama ya babangu. Ndakamupimira mutengo wo mare iyi: Mashekeri* manomwe no gumi ro mangwenjere o sirivha.
10 Tevere, ndakatarira mutengo wo mare iyi pa tsamba, ndoinama ngo cidhindho, ndodaninja zvapupu no kupima mare pa bharansa.
11 Ndakatora tsamba yo citenderano co kutenga munda, yainga yakanamwa mukuzwirana no mutemo no zvinokumbihwa ngo utongi, ndakatoravo tsamba yainga icizivi kunamwa.
12 Tevere ndakapa Bharuki mwana wa Neriya mwana wa Maseya tsamba inokhombija kuti ndakatenga munda, pamberi pa Anameri, mwana wo hama ya babangu, pamberi po zvapupu zvainga zvakasaina tsamba inokhombija kuti ndakatenga munda no pamberi po Vajudha vese vainga vakagara pa Ruvanje wo Varindiri.
13 Ndakavhunja Bharuki pamberi pavo ndeciti:
14 “Jehovha wo hondo, Mwari wo Vaiziraeri anonanga kudari: ‘Torai tsamba iji. Tsamba imwe yakanamwa inokhombija kuti ndakatenga munda no tsamba imweni icizivi kunamwa, jidirei mu mujiyo wo dongo kuti jingwaririke ko makore akawanda.’
15 Jehovha wo hondo Mwari wo Vaiziraeri anonanga kudari: ‘Nyumba, munda no munda yo muuvha zvinozotengwazve mu nyika ino.’”
16 Pasure po kupa tsamba Bharuki mwana wa Neriya inokhombija kuti ndatenga munda, ndakaita mukumbiro kuna Jehovha ndeciti:
17 “Maiwee, Mambo Mukuru-kuru Jehovha! Imwimwi makaita matenga no nyika ngo simba renyu guru no mukono wenyu wakatambanujwa. Akuna ciro camucikakwanisi kuita,
18 Wiya anokhombjija rudo hucikacinji ku zviuru no zviuru zvo vandhu, asi anopanica vana ngo ndava yo kuposa ko majibaba, Mwari wo cokwadi, Mwari mukuru Ano simba, ano zina rokuti Jehovha wo hondo.
19 Imwimwi muno zvinangwa zvikuru, zviito zvenyu zvino simba. Imwimwi muno majiso anosota makwanja o vandhu vese, kuti mupe umwe na umwe zvaanofanera mukuzwirana no makwanja ake no zviito zvake.
20 Imwimwi makaita zvitatijo no mushamaiso mu nyika yo Ejipita, inga zviri kuzivika mbhera nyamasi. Imwimwi makazviitira zina mu Iziraeri no pakati po vandhu vese, inga zvinovoneka nyamasi.
21 Makavhisa vandhu venyu Vaiziraeri mu nyika yo Ejipita, ngo zvitatijo, mushamaiso, nyara yenyu ino simba , mukono wenyu wakatambanujwa no zviito zvinothyisa.
22 “Pa kufamba ko nguva makavapa nyika iyi yamainga makapikira kupa majicekuru avo, nyika inopopoma mukaka no uci.
23 Ivona vakanghwina voitora, asi avazivi kuzwira izwi renyu nee kufamba mukuzwirana no mutemo wenyu. Avazivi kuita zviro zvamakavavhunja, zvoita kuti imwimwi muvaviisire matambujiko ese aya.
24 Vonai! Vandhu vari kuviya ku dhorobha kuti vavake muru* jokurihwisa. Dhorobha iri kamare rinozodihwa mu nyara jo Vakaradhiya, avo vari kurihwisa. Vagari vo dhorobha iri vanozopera vese ngo ndava yo banga, njara no ndhendha. Zvese zvamakananga zvakaitika inga zvamuri kuvonari nyamasi.
25 Asi imwimwi Mambo Mukuru-kuru Jehovha makandivhunja kudari: ‘Tengai munda ngo mare. Dainjai zvapupu,’ pikija dhorobha iri kamare rinozodihwa mu nyara jo Vakaradhiya.”
26 Ngo kudaro, Jehovha wakavhunja Jeremiya kudari:
27 “Ndini Jehovha Mwari wo vandhu vese. Pano ciro candicikakwanisi kuita here?
28 Ngo kudaro, Jehovha anoti: ‘Ndiri kudira dhorobha iri mu nyara jo Vakaradhiya no mu nyara ja Nebhukadhinezari mambo o Bhabhironi. Iyena anozoritora.
29 Vakaradhiya vari kuhwisari dhorobha iri, vanozonghwina vozoripisa. Ivona vanozopisa dhorobha iri pamwepo no nyumba jokuti vandhu vaiitira mupiro panyezuru pajo kuna Bhaari no kudururira ku zvimwari zvimweni zvipo zvo vhinyu kuti vandituke.’
30 “‘Ngokuti vandhu vo ku Iziraeri no vo Judha vari kuita zviro zvakashata basi pamberi pangu kuvhira pa udoko hwavo; vandhu vo Iziraeri vari kuenderera mberi vecindituka ngo mabasa o nyara javo,’ izvi ndizvona zvinonanga Jehovha.
31 ‘Ngokuti kuvhira pa njiku yo rakavakwa mbhera nyamasi, dhorobha iri riri kundicamwisa no kundinyangajisa basi, ngo kudaro inini ndinozorivhisa pamberi pangu,
32 ngo ndava yo zvishaishi zvese zvakaizwa ngo vandhu vo Iziraeri no vo Judha kuti vandituke. Ivona vanoita izvi pamwepo no majimambo avo, vatungamiriri vavo, vapiri vavo, vaporofeti vavo no vanarume vo Judha pamwepo no vagari vo Jerusarema.
33 Ivona vakaenderera mberi vecindifuratira, vacikandisoti; pikija inini ndakaeja kuvajijisa kuphinda no kuphinda,* apana na umwe wavo wakazwa kuti atendere kupangihwa.
34 Ivona vakadira zvithombi zvavo zvinosembhusa mu nyumba inodaninjwa ngo zina rangu, kuti vaisvipise.
35 Kusiyapo izvo, vakavaka ndau jakakhwirira kuitira Bhaari mu Bani ro mwana wa Hinomi,* kuti vapise vana vavo vorume no vokaji inga mupiro kuna Moreki, zviro zvandicikazivi kumbovavhunja nee andizivi kumborangarira mu mwoyo mwangu kuvakumbira kuti vaite zviro zvakashatisisa kudari, veciita kuti Judha ishaishe.’
36 “Ngo kudaro, ngo pamusoro po dhorobha iri ramakananga kuti raizodihwa mu nyara ja mambo wo Bhabhironi ngo ndava yo banga, njara no ndhendha, Jehovha Mwari wo Vaiziraeri anonanga kudari:
37 ‘Ndinozovaunganija kuvha ku nyika yandakavandhandhanisira ndakacamwa, ndakanyangajwa ndino cishatihwa cikuru. Ndinozovahwirija pa ndau iyi, ndozovaita kuti vagare vakangwaririka.
38 Ivona vanozova vandhu vangu, inini ndinozova Mwari wavo.
39 Inini ndinozovapa mwoyo umwe no gwanja rimwe kuti ivona vandithye mukuvo wese, kuti zviro zvizofambe ushoni kwavari no ku vana vavo vanozovatevera.
40 Inini ndinozoita na ivona citenderano cinogara kwenda no kwenda, andizoregeri kuvaitira zvakanaka; ndinozoita kuti vandithye ngo mu mwoyo mwavo kuti vatame kundisiya.
41 Ndinozodakara ngo kuvaitira zvakanaka. Ngo mwoyo wangu wese no simba rangu rese, ndinozovaita kuti vagare mu nyika ino kwenda no kwenda.’”
42 “Ngokuti Jehovha anonanga kudari: ‘Inga zvandakaviisira vandhu ava matambujiko akawanda, ndinozovaviisiravo zviro zvese zvakanaka zvandiri kuvagondesa.
43 Ivona vanozotengazve munda mu nyika ino, pikija imwimwi mecinanga kudari: “Nyika iyi yaamathere, aicina vandhu nee zvinyama. Iyona yakadihwa mu nyara jo Vakaradhiya.”’
44 “‘Munda jinozotengwa ngo mare. Tsamba jinokhombija kuti munda jakatengwa jinozotahwa no kunamwa. Zvapupu zvinozodaninjwa mu nyika ya Bhenjamini, mumbhiripiri mo Jerusarema, mu madhorobha o Judha, mu madhorobha o ndharaundha jo matundhu, mu madhorobha o kumuterero no mu madhorobha o kakusi, ngokuti ndinozoviisazve vandhu vako vari kuuranda,’ izvi ndizvona zvinonanga Jehovha.”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
^ Shekeri imwe yairema 11,4g. Vonanyi Masoko Okuengejera B14.
^ Kana: “mupfimbiji.”
^ Gama ngo Gama: “pikija inini ndaimuka mangwanani ese ndecivajijisa.”
^ Vonanyi Kudurujihwa ko Magama pa gama rokuti “Gehena.”
