Jeremiya 33:1-26
33 Jeremiya paainga aciri pa Ruvanje wo Varindiri akafungihwa, Jehovha wakamuvhunjazve hwocipiri kudari:
2 “Izvi ndizvona zvinonanga Jehovha Muiti wo nyika, Jehovha wiya wakaiumba woivangisa kamare; zina rake ndi Jehovha,
3 ‘Ndidaninjei, inini ndinozokudavira no kukuvhunja ngo kukasika zviro zvikuru zvaucikakwanisi kuzwisisa no zvaucikazivi.’”
4 “Ngokuti izvi ndizvona zvinonanga Jehovha ngo pamusoro po nyumba jo dhorobha iri no nyumba jo majimambo o Judha jiri kuphwanywa kuitira kuphingaija muru* no banga ro muvengi,
5 ngo pamusoro po vandhu ava vari kuviya kohwisa Vakaradhiya, vecizaja nyumba iji ngo mutembo jo vandhu vandakauraya pandainga ndakacamwa no kunyangajwa, ngo ndava yo cishaishi cakandiita kuti ndivigire dhorobha iri kumeso kwangu:
6 ‘Ndinozoriviisazve ndozoripa uhomi. Ndinozorirapa no kuripa runyararo hwakakura no rugarisiko.
7 Ndinozoviisazve vandhu vangu kuvha kuuranda, vandhu vo Judha no vo Iziraeri. Ndinozovavangisa inga zvandakaita pakutanga.
8 Ndinozovacenesa ku ndava jese javanajo ngo ndava yo zvishaishi zvavakaita pamberi pangu. Ndinozoregerera ndava javo jese ngo ndava yo kuposa kwavo no zvishaishi zvavo zvavakaita pamberi pangu.
9 Dhorobha iri rinozova nduma yangu, mudakaro wangu, kusimbhwa kwangu no rukujo hwangu pamberi po majinja ese o panyika anozozwa masoko ngo pamusoro po zviro zvakanaka zvandinozovapa. Majinja anozothya no kutetemera ngo ndava yo zviro zvese zvakanaka no runyararo wandinozopa dhorobha iri.’”
10 “Jehovha anonanga kudari: ‘Pa ndau iyi yamuri kunangari kuti yakaezana no cipare, icina vandhu nee zvinyama, zvinoreva, mumadhorobha o Judha no mumakwanja o Jerusarema, aamathere acina vandhu, acina vagari nee zvinyama, mondhomo munozozikazve
11 izwi ro vandhu vari kutamba no izwi ro vandhu vari kudakara, izwi ro murovori no izwi ro murovohwi, izwi ro vandhu vanonanga kudari: “Bonganyi Jehovha wo hondo, ngokuti Jehovha wakanaka; rudo hwake hucikacinji ahuna magumo!”’
“‘Ivona vanozoviisa mupiro yo kubonga ku nyumba ya Jehovha, ngokuti ndinozoviisa vandhu vo nyika ino vakatohwa kwenda kuuranda, ivona vanozovazve inga zvavainga pakutanga,’ izvi ndizvona zvinonanga Jehovha.”
12 “Jehovha wo hondo anonanga kudari: ‘Mu ndau iyi yakaitari cipare icina vandhu nee zvinyama no mumadhorobha aya ese, munozovazve no mahavo. Vahavisi vanozotorazve mushambi yavo vozoenda koizororesa mondhomo.’
13 “‘Mumadhorobha o ndharaundha yo matundhu, mumadhorobha o ndau jo kumuterero, mumadhorobha o kakusi, mu nyika ya Bhenjamini, mumbhiripiri mo Jerusarema no mumadhorobha o Judha, vahavisi vanozoverengazve mavhuta ese anozopinda ngo pasi po nyara javo,’ izvi ndizvona zvinonanga Jehovha.”
14 “‘Vonanyi! Jiri kuguma njiku,’ izvi ndizvona zvinonanga Jehovha, ‘njiku jokuti ndinozokwanirisa zviro zvakanaka zvandakagondesa ndecivhunja vandhu vo nyumba yo Vaiziraeri no vandhu vo nyumba yo Judha.
15 Pa njiku jondhojo no mukuvo wondhowo, ndinozoita kuti mubarihwana wa Dhavhidhi wakarurama ubude,* iyena anozojivirira ururami no urungami mu nyika.
16 Pa njiku jondhojo, Judha anozoponeswa. Jerusarema rinozogara mu runyararo. Zina raro rinozodaninjwa kudari: Jehovha Ndiyena Ururami Hwedu.’”
17 “Ngokuti Jehovha anonanga kudari: ‘Mukuvo wese kunozova no mubarihwana wa Dhavhidhi kuti ugare pa cigaro co umambo co nyumba yo Iziraeri.
18 Mukuvo wese pamberi pangu panozova no mupiri wo jinja ro Varevhi anozopira cipo co kupiswa, kupisa zvipo zvo mucece no kuita mupiro.’”
19 Jehovha wakavhunjazve Jeremiya kudari:
20 “Jehovha anoti: ‘Kudari mukakwanisa kuphwanya citenderano cangu co usiku no masikati, kuti usiku no masikati zvitame kuguma pa mukuvo kwawo,
21 citenderano cangu candakaita no mushandiri wangu Dhavhidhi caizoguka, iyena otama kuva no mwana waizotonga pa cigaro cake co umambo. Citenderano cangu co vapiri vo jinja ro Varevhi caizogukavo.
22 Ndinozoita kuti mubarihwana wo mushandiri wangu Dhavhidhi no mubarihwana wo Varevhi vari kundishandira uwande inga zviro zvese zviri* kudenga zvicikaverengeki no musanga wo mujombe ucikapimiki.’”
23 Jehovha wakabhuyazve na Jeremiya eciti:
24 “Kureva kuti iwewe auzivi kuzwa zviri kunangwa ngo vandhu ava? Ivona vanoti: ‘Jehovha anozoramba mbhuri mbiri jaakasana.’ Ivona vari kushaisha kutaja vandhu vangu kamare, avacavavonizve inga jinja.
25 “Jehovha anoti: ‘Inga zvandakavangisa citenderano cangu ngo pamusoro po usiku no masikati, mutemo jo kudenga no pa nyika,
26 andizorambizve mubarihwana wa Jakobe no wa Dhavhidhi mushandiri wangu. Ndinozosana vatongi pakati po mubarihwana wake kuti vazotonge mubarihwana wa Abhirahama, Izaki na Jakobe. Ngokuti ndinozoviisazve vandhu vake vari kuuranda ndovaitira pena.’”
Masoko o Pasi
^ Kana: “mupfimbiji.”
^ Gama ngo Gama: “ndinozoita kuti mundhu wakarurama anozogara utaka wa Dhavhidhi azobude.”
^ Gama ngo Gama: “masoca ese ari.”
