Jeremiya 36:1-32
36 Mu gore ro cirongomuna ro kutonga ka Jehoyakimi mwana wa Josiya mambo wo Judha, Jehovha wakabhuya na Jeremiya eciti:
2 “Torai muphukutu* utare masoko ese andakakuvhunja ngo pamusoro po Iziraeri, Judha no majinja ese kuvhira mu njiku yandakabhuya na iwewe, mu njiku ja Josiya mbhera na nyamasi.
3 Kangaije vandhu vo nyumba yo Judha vakazwa ngo pamusoro po dambujiko randiri kuda kuvaviisira, vangasiya gwanja ravo rakashata kuti inini ndiregerere kuposa kwavo no cishaishi cavo.”
4 Ngo kudaro, Jeremiya wakadaninja Bharuki mwana wa Neriya. Jeremiya wakananga masoko ese ainga akanangwa ndi Jehovha. Bharuki womatara mu muphukutu.*
5 Jeremiya wakavhunja Bharuki kudari: “Inini ndafungihwa, anditendehwi kunghwina mu nyumba ya Jehovha.
6 Ngo kudaro, iwewe ndiwe unodikana kunghwina mu nyumba ya Jehovha no kuverenga masoko andakakuvhunja womatara pa muphukutu. Verengai masoko aya pamberi po vandhu mu nyumba ya Jehovha pa njiku yo kuzira. Ukaita kudaro, iwewe unozoverengera vandhu vese vo Judha vari kuviya vecivha mu madhorobha avo.
7 Kangaije Jehovha anozwa cikumbiro cavo co kuda kuitihwa unyasha, umwe na umwe wavo wosiya gwanja rake rakashata. Ngokuti Jehovha wakabhuya masoko aya no vandhu ava paainga akacamwa maningi no ushungu.”
8 Ngo kudaro, Bharuki mwana wa Neriya wakaita zvese zvaakavhunjwa ndi muporofeti Jeremiya. Iyena wakaverenga masoko a Jehovha ainga ari mu muphukutu* ngo izwi guru mu nyumba ya Jehovha.
9 Mu gore ro cishanu ro kutonga ka Jehoyakimi mwana wa Josiya mambo wo Judha mu mweji wo cipfumbamwe, vandhu vese vainga mu Jerusarema no vandhu vese vainga vakaviya ku Jerusarema vecivha mu madhorobha o Judha vakazivisa kuti vandhu vazire pamberi pa Jehovha.
10 Ngo kudaro, Bharuki wakaverenga ngo izwi guru masoko a Jeremiya ainga ari mu muphukutu.* Iyena wakauverenga mu nyumba ya Jehovha mu sara ya Gemariya mwana wo mutari Shafani, pa ruvanje wainga wakakura pa manghwiniro po musuvo mupsa wo nyumba ya Jehovha pamberi po vandhu vese.
11 Mikaya mwana wa Gemariya muzukuru wa Shafani paakazwa masoko ese a Jehovha aingari mu muphukutu,*
12 iyena wakabzuka woenda ku nyumba ya mambo wonghwina mu sara yo mutari. Vatungamiriri vese vainga vakagara mondhomo nga ava: Erishama mutari, Dheraya mwana wa Shemaya, Erinatani mwana wa Akibhori, Gemariya mwana wa Shafani, Zedhekiya mwana wa Hananiya no vatungamiriri vamweni vese.
13 Mikaya wakananga masoko ese aakazwa Bharuki paainga eciverenga muphukutu pamberi po vandhu vese.
14 Ngo kudaro, vatungamiriri vese vakatuma Jehudhi kuti avhunje Bharuki masoko aya: “Viyai kuno no muphukutu wawaverenga pamberi po vandhu.” Jehudhi wainga mwana wa Netaniya, Netaniya wainga mwana wa Sheremiya, Sheremiya wainga mwana wa Kusi. Bharuki mwana wa Neriya, wakatora muphukutu woenda nawo.
15 Ngo kudaro, ivona vakamuvhunja kudari: “Tapota garai pasi, tiverengerei masoko ari mu muphukutu ngo izwi guru.” Ngo kudaro, Bharuki wakavaverengera.
16 Pavakapera kuzwa masoko aya, ivona vakasotana vecithya vovhunja Bharuki kudari: “Kunasa kunanga, itusu tinozovhunja mambo masoko ese aya.”
17 Ivona vakavhunjisa Bharuki kudari: “Tivhunjei tapota, wakatarisa kudini masoko ese aya? Ndiyena Jeremiya wakakuvhunja?”
18 Bharuki wakavadavira kudari: “Iyena wakandivhunja masoko ese, inini ndomatara ngo tinta mu muphukutu* uu.”
19 Vatungamiriri vakavhunja Bharuki kudari: “Iwewe na Jeremiya endanyi mofindara, mucatendera kuti ari wese azive pamakafindararo.”
20 Ngo kudaro, ivona vakaenda ku ruvanje kwaengaro kuna mambo. Vakaviga muphukutu mu sara ya Erishama mutari vovhunja mambo zvese zvavainga vakazwa.
21 Ngo kudaro, mambo wakatuma Jehudhi kuti aende kotora muphukutu. Jehudhi wakaenda koutora mu sara ya Erishama mutari. Jehudhi wakatanga kuuverenga pamberi pa mambo no pamberi po vatungamiriri vese vainga vakaima pamberi pa mambo.
22 Wainga uri mweji wo cipfumbamwe,* mambo wainga akagara pa ndau yaanogara pa mukuvo wokutondhora. Iyena wainga ecikota muriro.
23 Jehudhi paaipeja kuverenga mativi matatu kana marongomuna, mambo waiceka mativiwo ngo cipanga co mutari ecikhandira pa muriro mbhera kupera kupisa muphukutu wese pa muriro.
24 Mambo pamwepo no vashandiri vake vainga vakazwa masoko ese aya, avazivi kuthya nee avazivi kumwesa nguvo javo.
25 Pikija Erinatani, Dheraya na Gemariya vakadeketerera mambo kuti atame kupisa muphukutu uu, mambo aazivi kuvapurukira.
26 Kusiyapo izvi, mambo wakaita kuti Jerameeri mwana wa mambo na Seraya mwana wa Aziriyeri pamwepo na Sheremiya mwana wa Abhidheeri vaende kosunga Bharuki mutari no muporofeti Jeremiya. Asi Jehovha wakaenderera mberi akavaviga.
27 Mambo paakapera kupisa muphukutu wainga no masoko ainga akatahwa ndi Bharuki ecivhunjwa ndi Jeremiya, Jehovha wakavhunjazve Jeremiya kudari:
28 “Torai muphukutu umweni utare masoko ese aingaya mu muphukutu wokutanga wakapiswaya ndi Jehoyakimi mambo wo Judha.
29 Iwewe unodikana kuvhunja Jehoyakimi mambo wo Judha kuti: ‘Jehovha anoti: “Iwewe wakapisa muphukutu wonanga kudari: ‘Ngenyi iwewe wakatara kudari: “Kunasa kunanga mambo wo Bhabhironi anozoviya wozoparaja nyika iyi no kupeja vanarume vese pamwepo no zvinyama.”’
30 Ngo kudaro, Jehovha anonanga kudari ngo pamusoro pa Jehoyakimi mambo wo Judha: ‘Iyena aazovi no mubarihwana unozogara pa cigaro co umambo ca Dhavhidhi,’ mutembo wake unozopiswa ngo zuva comasikati no kutondhorehwa co usiku.
31 Ndinozokhawisa iyena, mubarihwana wake pamwepo no vashandiri vake ngo ndava yo kuposa kwavo. Ndinozoviisira ivona, vagari vo Jerusarema no vandhu vo Judha matambujiko ese andakanangaya, kudari ivona vakatama kundipurukira.’”’”
32 Ngo kudaro, Jeremiya wakatora muphukutu umweni woupekeja Bharuki mutari mwana wa Neriya. Iyena wakatara zvaaivhunjwa ndi Jeremiya. Iyena wakatara masoko ese aingaya mu muphukutu* wakapiswa pa muriro ndi Jehoyakimi mambo wo Judha. Akaengejehwavo magama amweni mazinji ainga akaezana no ainga mu muphukutu wokutanga.
Masoko o Pasi
^ Gama ngo Gama: “muphukutu wo bhuku.”
^ Gama ngo Gama: “muphukutu wo bhuku.”
^ Gama ngo Gama: “muphukutu wo bhuku.”
^ Kana: “bhuku.”
^ Kana: “bhuku.”
^ Kana: “bhuku iri.”
^ Pakati po mweji wa Novembro mbhera pakati po mweji wa Dezembro. Vonanyi Masoko Okuengejera B15.
^ Kana: “bhuku.”
